02 ނޮވެމްބަރ 2020 - 14:04
އައިޖީއެމްއެޗާ ދިމާ ބޭރުން މޫދުގައި މަރުވެފައި އޮއްވާ ފެނުނު މުހައްމަދު ސިދުރަތުﷲގެ ހަށިގަނޑު ޕޯސްޓްމޯޓަމް ހަދަން މިއަދު އިންޑިއާ އަށް ގެންގޮސްފި އެވެ.
ފުލުހުންގެ މީޑިއާ އޮފިޝަލަކު ވިދާޅުވީ ސިދުރަތުﷲގެ ޕޯސްޓްމޯޓަމް ހަދަން ނިންމާފައި ވަނީ ޓްރިވެންޑްރަމްގައި ހުންނަ މެޑިކަލް ކޮލެޖުންނެވެ. ޕޯސްޓްމޯޓަމް ހަދައި ނިންމުމަށް ފަހު ހަށިގަނޑު ރާއްޖެ ގެނެސް އާއިލާއާ ހަވާލުކުރާނެ ކަމަށް ވިދާޅުވި އެވެ.
ސިދުރަތުﷲ، 31، މަރުވެފައި އޮއްވައި ފެނުނީ މިދިޔަ މަހުގެ 23 ވަނަ ދުވަހު އެވެ. ޕޯސްޓްމޯޓަމް ހަދަން އޭނާގެ ހަށިގަނޑު ގެންގޮސްފައި ވަނީ 10 ދުވަސް ފަހުންނެވެ. ފުލުހުން ކުރިން ބުނިގޮތުގައި ސިދުރަތުﷲގެ ހަށިގަނޑު ރާއްޖޭން ބޭރަށް ގެންދިއުން ލަސްވީ ކަންތައްތަކެއް ފުރިހަމަ ކުރުމަށެވެ. އޭގެ އިތުރުން ކޮވިޑް-19ގެ ބަލިމަޑުކަމުގެ ހާލަތު އޮތުމަކީ ވެސް އެ ކަން ލަސްވި ސަަބަބެއް ކަމަށް ވިދާޅުވި އެވެ.
ނަމަވެސް ސިދުރަތުﷲގެ ޕޯސްޓްމޯޓަމް ހަދައި، މަރު ތަހުގީގު ކުރުމަށް އޭނާގެ އާއިލާ ދެކޮޅެވެ. އޭނާގެ ހަށިގަނޑު އާއިލާއާ ހަވާލުކުރުމަށް އެދި ފުލުހުންނަށް ސިޓީއެއް ވެސް ފޮނުވާފައި ވެ އެވެ.
އެކަމަކު ފުލުހުން ބުނީ އާއިލާ އިން އެހެން އެދުނަސް ފުލުހުންގެ ނިންމުމަށް ބަދަލެއް ނާންނަ ކަމަށާއި ޕޯސްޓްމޯޓަމަށް ހަށިގަނޑު ބާއްވާފައި އޮތީ ޖިނާއީ އިޖުރާއަތުގެ ގާނޫނުގެ ދަށުން ފުލުހުންނަށް ލިބިދީފައިވާ ބާރުގެ ދަށުން ކަމަށެވެ.
މިދިޔަ އަންގާރަ ދުވަހު ފުލުހުން އާއްމުކުރި ސީސީޓީވީ ފުޓޭޖުން ފެންނަ ގޮތުގައި، ސިދުރަތުﷲ އެންމެ ފަހުން ފެނިފައިވަނީ، މިދިޔަ ބުރާސްފަތި ދުވަހު ހެނދުނު 9:00-12:00 އާ ދެމެދު ރަސްފަންނު ދިމާލުން މޫދަށް ދިމާލަށް ދަނިކޮށެވެ.