31 އޮކްޓޯބަރ 2020 - 09:44
ޓިއުރިން (އޮކްޓޫބަރު 31) - އިޓާލިއަން ލީގުގެ މި ހަފްތާގެ މެޗުތަކުގެ ކުރިން ކުރި ކޮވިޑް-19 ޓެސްޓްތަކުން ޔުވެންޓަސްގެ ތަރި ކްރިސްޓިއާނޯ ރޮނާލްޑޯ ވައިރަހަށް ނެގެޓިވްވެފައިވާ އެ ކްލަބުން ބުނެފި އެވެ.
ރޮނާލްޑޯ ކޮވިޑަށް ޕޮޒިޓިވްވީ މި މަހުގެ 13 ވަަނަ ދުވަހު ޕޯޗުގަލްގެ ގައުމީ ޓީމާ އެކުގައި ހުއްޓަ އެވެ. އެކަމަކު އޭގެ ދެ ދުވަސް ފަހުން އޭނާ ވަނީ އިޓަލީގެ ޓިއުރިން އަށް ގޮސް އަމިއްލަ އަށް އައިސޮލޭޓްވެފަ އެވެ. ރޮނާލްޑޯ ވައިރަހަށް ޕޮޒިޓިވް ނަމަވެސް އަލާމާތެއް ނެތެވެ. ކޮވިޑުން ރަނގަޅުވެ އެނބުރި ކުޅުމަށް އަންނަން ބޭނުންވާތީ ރޮނާލްޑޯ ވަނީ އެތައް ފަހަރެއްގެ މަތިން ޓެސްޓް ކޮށްފަ އެވެ. އެ ގޮތުން އޭނާ އެންމެ ބޭނުންވީ ޗެމްޕިއަންސް ލީގުގައި މިދިޔަ ބުދަ ދުވަހުގެރޭ ބާސެލޯނާއާ ދެކޮޅަށް ޔުވެންޓަސް ކުޅުނު މެޗަށް އެނބުރި އަންނާށެވެ. އެކަމަކު އެ މެޗުގެ ކުރިން ހެދި ޓެސްޓުން ވެސް ރޮނާލްޑޯ ވަނީ ޕޮޒިޓިވްވެފަ އެވެ.
ކޮވިޑް ޖެހުމުން އުމުރުން 35 އަހަރުގެ ރޮނާލްޑޯ އަށް ވަނީ ޔުވެންޓަސްގެ ހަތަރު މެޗު ގެއްލިފަ އެވެ. ރޮނާލްޑޯ ވަނީ އައިސޮލޭޝަނުގައި ހުރެ އޭނާ ކުރި އިންސްޓަގްރާމް ލައިވްއެއްގެ ތެރެއިން ކޮވިޑްގެ ޕީސީއާރް ޓެސްޓާ މެދު ހިތްހަމަނުޖެހުން ފާޅުކޮށްފަ އެވެ.
ޔުވެންޓަސް އިން އިއްޔެ ބުނީ ޓެސްޓް ނެގެޓިވްވެފައިވާތީ 19 ދުވަހުގެ އައިސޮލޭޝަނަށް ފަހު މިހާރު ރޮނާލްޑޯ ޓީމާ ގުޅިފައިވާ ކަމަށެވެ. އަދި މާދަމާރޭ އިޓާލިއަން ލީގުގައި ރަށުންބޭރުގައި ސްޕެޒިއާއާ ދެކޮޅަށް ކުޅޭ މެޗުގައި ރޮނާލްޑޯ ފެނުމުގެ ފުރުސަތު ބޮޑު ކަމަށް ޔުވެންޓަސް އިން ވަނީ ބުނެފަ އެވެ.
އަލަށް ޕްރޮމޯޓްވި ސްޕެޒިއާއާ ދެކޮޅަށް ޔުވެންޓަސް ކުޅޭ މެޗަށް އެއްވެސް ވަރަކަށް ސަޕޯޓަރުން ނުވައްދަން ވަނީ ނިންމައިފަ އެވެ. އެއީ ފާއިތުވި ދުވަސްތަކުގައި އިޓަލީގައި އަނެއްކާވެސް ކޮވިޑް-19ގެ ކޭސްތައް އިތުރުވެފައިވާތީ އެވެ. އެ ގޮތުން އިއްޔެ އެކަނި ވެސް އެ ގައުމުން ވަނީ 24 ގަޑިއިރުތެރޭ 31000 މީހުން ކޮވިޑަށް ޕޮޒިޓިވްވެފަ އެވެ.
ކޮވިޑް-19ގެ ޕްރޮޓޮކޯލްގެ ކަންތައްތަަކެއްގެ ތެރޭގައި ރޮނާލްޑޯ އާއި އިޓަލީގެ ސްޕޯޓްސް މިނިސްޓަރު ވިންޗެންޒޯ ސްޕަޑަފޯރާއާ ދެމެދު ހިޔާލު ތަފާތުވުންތަކެއް އުފެދިފަ އެވެ. އެއީ ރޮނާލްޑޯ އެންމެ ފުރަަތަމަ ގައުމީ ޓީމާ ގުޅެން އިޓަލީ ދޫކޮށް ޕޯޗުގަލް އަށް ފުރައިގެންދިޔައި ކޮވިޑަށް ޓެސްޓްކޮށް ނަތީޖާ ލިބުމުގެ ކުރިން އިޓަލީ ސަރުކާރުގެ ގަވާއިދަކާ ހިލާފަށް ކަމަށްވުމުންނެވެ. އަދި ރޮނާލްޑޯ ކޮވިޑް ޖެހިފައިވަނިކޮށް އަމިއްލަ ޖެޓުގައި އިޓަލީ އަށް އެނބުރި އައީ އުސޫލުގެ ތެރެއިން ކަމާ މެދު ސްޕަޑަފޯރާ ވަނީ ސުވާލު އުފައްދައިފަ އެވެ. ރޮނާލްޑޯ އެކަމާ ބެހޭގޮތުން ބުނީ އެއީ އެއްވެސް ހަގީގަތެއް ނެތް ވާހަކައެއް ކަަމަށެވެ.
އިޓަލީގެ ސަރުކާރުގެ އޮފިޝަލަކު އެ ގައުމުގެ މީޑިއާ އަށް ބުނީ ރޮނާލްޑޯ އާއި އުސޫލާ ހިލާފުވި ޔުވެންޓަސްގެ އެހެން ކުޅުންތެރިންގެ މައްސަލަ އިޓަލީގެ ހެލްތު އޮތޯރިޓީން އެ ގައުމުގެ ޕްރޮސެކިއުޓަރުންނާ މަޝްވަރާކޮށް ނިންމުމަށް މަސައްކަތްކުރަމުން އަންނަ ކަމަށެވެ.