20 އޮކްޓޯބަރ 2020 - 16:31
އާމްދަނީގައި އަންހެނުންނާއި ފިރިހެނުންނާ ދެމެދު ބޮޑު ފަރަގެއް ހުރި ކަމަށް ގޭބިސީގެ އާމްދަނީ އާއި ހަރަދުކުރުން ހުރި ގޮތުގެ ސާވޭ (ހަޔަސް) އިން ދައްކައިފި އެވެ.
ދުނިޔޭގެ ތަފާސް ހިސާބުގެ ދުވަސް ފާހަގަކުރަން މިއަދު އޮންލައިންކޮށް ބޭއްވި ރަސްމިއްޔާތުގައި، ނެޝަނަލް ބިއުރޯ އޮފް ސްޓެޓިސްޓިކްސް އިން މިދިޔަ އަހަރު ހެދި ހަޔަސް ސާވޭގެ ހޯދުންތައް އާންމުކުރަން ވީޑިއޯއެއް ދެއްކި އެވެ. އެ ސާވޭގެ ހިސާބުތަކުން ފެންނަ ގޮތުގައި ރާއްޖޭގެ ޖުމްލަ އާބާދީގެ ހިމެނޭ 451,622 މީހުންގެ ތެރެއިން 52 ޕަސެންޓަކީ އަންހެނުންނެވެ. އޭގެ ތެރެއިން މަސައްކަތްތެރިންގެ ގޮތުގައި ހަރަކާތްތެރިވާ އާބާދީގެ 60 ޕަސެންޓަކީ ފިރިހެނުންނެވެ.
"މަސައްކަތް ލިބިފައިވާ 59 އިންސައްތަ އަކީ ފިރިހެނުން. އަދި 49 އިންސައްތަ އަކީ އަންހެނުން،" ހަޔަސްގެ ހޯދުންތަކުގައި ބުނެފައިވެ އެވެ.
ހަޔަސްގެ ހޯދުންތަކުން ދައްކާ ގޮތުގައި ދުވާލަކު ނުވަ ގަޑި އިރު ފިރިހެނުން އާންމުކޮށް މަސައްކަތްކުރާ އިރު އަންހެނުން މަސައްކަތްކުރަނީ ހަތް ގަޑި އިރު އެވެ. އަދި މަސައްކަތްތެރިންނަށް އެވްރެޖްކޮށް މަހަކު 10،474ރ. ލިބޭ އިރު ފިރިހެނުންނަށް ލިބެނީ 12،169ރ. ކަމަށް ދައްކަ އެވެ. އަންހެނުންނަށް ލިބެނީ 7،995ރ. އެވެ. މިއީ 34.4 ޕަސެންޓުގެ ފަރަގެކެވެ.
އިގްތިސާދީ ގޮތުން ހަރަކާތްތެރި ނުވާ މީހުންގެ ތެރޭގައި ވެސް ގިނައީ އަންހެނުން ކަމަށް އެ ހިސާބުތަކުން ދައްކަ އެވެ. އުމުރުން 15 އަހަރުން މަތީގެ 40 ޕަސެންޓު މީހުން އިގްތިސާދީ ހަރަކާތްތަކުގައި ބައިވެރި ނުވާއިރު އޭގެ ތެރެއިން 73 ޕަސެންޓަކީ އަންހެނުންނެވެ.
"ގޭތެރޭގެ މަސައްކަތުގަ އާއި ކުދިންގެ ބެލުމުގައި ދުވާލަކު ހަތަރު ގަޑި އިރު އަންހެނުން ހޭދަ ކުރާ އިރު ފިރިހެނުން ހޭދަކުރަނީ ދެ ގަޑި އިރު،" އެ ހިސާބުތަކުން ދައްކަ އެވެ.
ރާއްޖޭގެ މީހުން އުޅޭ ހުރިހާ ރަށެއްގައި ކުރިއަށް ގެންދިޔަ ސާވޭގެ ނަތީޖާތަކުގެ ތެރޭގައި މ، ނ. އަދި ޏ އަތޮޅު ނުހިމެނެ އެވެ. އެ ސާވޭގެ ހޯދުންތަކުގެ ތެރޭގައި ރާއްޖޭގެ އާބާދީގެ 48 ޕަސެންޓު އުޅެނީ މާލޭގެ ކަމަށާއި އޭގެ ތެރެއިން ހަތަރު ބައި ކޮޅު ތިން ބައި މީހުން މާލޭގައި އުޅެނީ ކުލި ދައްކައިގެން ކަމަށް ބުންޏެވެ. އަދި މާލޭގެ ކޮންމެ 10 ގެއެއްގެ ތެރެއިން އެއް ގެއެއްގައި މީހުން އުޅެނީ ތޮއްޖެހިގެން ކަމަށް ވެސް ބުނެފައި ވެ އެވެ. މާލެ އާއި އަތޮޅުތަކުގައި އުޅޭ މީހުންނަށް ލިބޭ އާމްދަނީގައި ވެސް ބޮޑު ފަރަގެއްވާ ކަން އެ ހިސާބުތަކުން ފެނެ އެވެ. އަދި ކުލީގެ ގޮތުގައި ހަރަދުކުރަން ޖެހޭ މިންވަރުގައި ވެސް ބޮޑެތި ފަރަގެއްވާ ކަމަށް ދައްކަ އެވެ.