13 އޮކްޓޯބަރ 2020 - 21:54
ޏ. ފުވައްމުލަކާއި ސ. މީދޫ މެޖިސްޓްރޭޓް ކޯޓުގެ އިސް މެޖިސްޓްރޭޓް، އަހުމަދު އަކުރަމާއި މުހައްމަދު ތޮއްޔިބުގެ ސުލޫކީ މައްސަލައެއް ޖުޑީޝަލް ސާވިސް ކޮމިޝަނުން ބަލަން ނިންމައިފި އެވެ.
އެ ކޮމިޝަނުން މިރޭ ބުނިގޮތުގައި ފުވައްމުލަކު ކޯޓުގެ އަކްރަމްއާ ގުޅޭ ގޮތުން ހުށަހަޅާފައިވަނީ އޭނާ ހުކުމް ކުރެއްވި މައްސަލައެއްގައި، ޝަރީއަތް ނިމުނު ގޮތުގެ ހުލާސާ ރިޕޯޓު ދޫކުރި ފަހުން، އެ ރިޕޯޓަށް ބަދަލު ގެނެސް، ބައެއް ނުކުތާ އިތުރު ކުރި ކަމަށް ބުނާ މައްސަލަ އެކެވެ.
އަދި ސ. މީދޫ ކޯޓުގެ ތޮއްޔިބާ ދެކޮޅަށް މައްސަލަ ހުށަހަޅާފައިވަނީ، ކޯޓަށް ހުށަހެޅި މައްސަލައެއްގައި ތުހުމަތު ކުރެވޭ މީހާގެ ބަންދުގެ މުއްދަތު އިތުރު ކުރުމަށް ގެންދިޔުމުން، އެ މައްސަލައިގައި ގޮތެއް ނިންމެވުމުގައި ގާނޫނާ ހިލާފަށް އަމަލުކުރައްވާފައިވާ ކަމަށް ބުނެ އެވެ.
މި ދެ މެޖިސްޓްރޭޓުންގެ ސްލޫކީ މައްސަލަތައް ތަހުގީގު ކުރުމަށް، ޖޭއެސްސީން މިހާރު ވަނީ ތަހުގީގު ކޮމެޓީއެއް އެކުލަވާލާފަ އެވެ.
ފުވައްމުލަކު ކޯޓުގެ މެޖިސްޓްރޭޓް މުލްހާ އަލީއާ ދެކޮޅަށް ހުށަހަޅާފައިވާ ގިނަ މައްސަލަތަކެއް ތަހުގީގު ކުރުމަށް، މިދިޔަ ޖުލައި މަހުގެ ތެރޭގައި އޭނާ ވެސް ވަނީ ސަސްޕެންޑްކޮށްފަ އެވެ. އޭގެ ތެރޭގައި ކޯޓުގައި ހިނގަމުންދާ މައްސަލަތަކުގައި ހިމެނޭ ފަރާތްތަކާ އެކު، ފަނޑިޔާރަކު ބާއްވަން ނުޖެހޭ ގުޅުންތައް ބޭއްވުމާއި ޖިންސީ ގޯނާގެ މައްސަލައެއްގައި ތުހުމަތު ކުރެވޭ މީހެއްގެ ބަންދުގެ މުއްދަތު އެހެން މެޖިސްޓްރޭޓަކު އިތުރު ކޮށްފައި ވަނިކޮށް އެ އަމުރު މުރާޖާކުރި މައްސަލަ އަކާއި ވިޔަފާރީގައި އަމަލީ ގޮތުން ބައިވެރިވުމުގެ އިތުރުން ފުލުހުން ހިންގި ތަހުގީގަކަށް ހުރަސް އަޅައި، ހެކި ނައްތާލަން މަސައްކަތް ކުރިކަމަށް ތުހުމަތު ކުރެވޭ މައްސަލައެއް ހިމެނެ އެވެ.
ރިޝްވަތު ނެގުމާއި ޖިންސީ ފުރައްސާރަ ފަދަ ސީރިއަސް ތުހުމަތުތަކާ އެކު، ހދ. ޖުޑީޝަލް ދާއިރާގެ އިސް މެޖިސްޓްރޭޓް މުހައްމަދު މައުސޫމް ވެސް މިދިޔަ ޖޫން މަހުގެ ތެރޭގައި ވަނީ ސަސްޕެންޑްކޮށްފަ އެވެ.
ސުލޫކީ މައްސަލަތަކުގައި މީގެ ކުރިން ބައެއް ފަނޑިޔާރުން މަގާމުން ވެސް ވަކިކޮށްފައި ވެ އެވެ.