13 އޮކްޓޯބަރ 2020 - 15:54
މާލެ އަދި ވިލިމާލޭގައި ތިން ގޯއްޗެއް އިމާރާތްކޮށްދޭނެ ކަމަށް ބުނެ އެ ބިންތައް މޯގޭޖްކުރުމަށް ފަހު ބޭންކަކުން އަމިއްލަ ބޭނުމެއްގައި ލޯނެއް ނެގި ކަމަށް ތުހުމަތުކުރެވޭ ދެ މީހަކު ހޯދަން ފުލުހުން އިއުލާނުކޮށްފި އެވެ.
ފުލުހުން ބުނީ، އޭ ބޮސް ޕްރައިވެޓް ލިމިޓެޑްގެ ނަމުގައި އެ ތިން ގޯތި މޯގޭޖްކުރުމަށް ފަހު މޮރިޝަސް ކޮމާޝަލް ބޭންކުން، ކުންފުނީގެ އަމިއްލަ ބޭނުމަކަށް ލޯނެއް ނެގި ކަމަށް އެ ދެ މީހުންގެ މައްޗަށް ތުހުމަތުކުރެވޭ ކަމަށެވެ.
ފުލުހުން އިއްޔެ ނެރުނު އިއުލާނެއްގައި ބުނީ މި މައްސަލައިގެ ތަހުގީގަށް ހޯދަނީ އުމުރުން 50 އަހަރުގެ ހުސެއިން ނަސީރާއި އުމުރުން 48 އަހަރުގެ އާމިނަތު ލަތީފާ ކަމަށެވެ. މި ދެ މީހުންގެ ވެސް ދާއިމީ އެޑްރެސް އޮންނަނީ މާލޭ ދަފްތަރުގަ އެވެ.
ފުލުހުންގެ އިކޮނޮމިކް ކްރައިމް ޑިޕާޓްމަންޓުން ބަލާ މި މައްސަލައިގައި އެ ދެ މީހުން އާދިއްތަ ދުވަހުގެ ހެނދުނު 10:00 އަށް ފުލުސް އޮފީހަށް ހާޒިރުވާން ވަނީ އަންގައިފަ އެވެ.
އެ ދެ މީހުން ހޯދަން އިއުލާނުކުރީ އެ މީހުން އުޅޭ ތަނެއް ނޭނގުމުން އެ މީހުންނާ ޗިޓް ހަވާލުނުކުރެވުމުން ކަމަށް ފުލުހުން ބުންޏެވެ.