24 ސެޕްޓެމްބަރ 2020 - 06:39
އިންސާނުންގެ ސިކުނޑި އަށް ވެރިވާ ހިޔާލުތައް ތަސްވީރެއްގެ ގޮތުގައި ކުރަހައިދޭނެ ޓެކްނޮލޮޖީއެއް އީޖާދުކުރުމުގެ މަސައްކަތް ރިސާޗަރުންގެ ޓީމަކުން ފަށައިފި އެވެ.
މިކަން ކުރިއަށް ގެންދަނީ ޑެންމާކްގެ ކޯޕަންހޭގަން ޔުނިވަސިޓީގެ ޕްރޮފެސަރެއްގެ އިތުރުން ހެލްސިންކީ ޔުނިވަސިޓީގެ ރިސާޗަރު ޓޫކާ ރޯޓްސާލޯ އިސްކޮށް ހުންނަވައިގެންނެވެ. އޭނާ ވިދާޅުވި ގޮތުގައި އިންސާނުންގެ ވިސްނުންތައް ތަސްވީރަކަށް ބަދަލުކޮށް ދިނުމުގެ ގާބިލުކަން ހުންނަ ކޮމްޕިއުޓަރަކީ ނިއުޓްރަލް ނެވޯކެއްގެ ތެރެއިން އީއީޖީ (އިލެކްޓްރޯންސެފަލަގްރަޕީ) އާއި އިންސާނު ސިކުނޑިއާ ވަރަށް ބޮޑަށް ގުޅިފައި ހުންނާނެ އެއްޗެކެވެ. އެގޮތުން ސިކުނޑީގެ އެލޮގްރިދަމާ އެކު ހިޔާލުތައް ތަސްވީރުތަކަށް ބަދަލުކޮށް ދިނުމުގެ ގާބިލުކަން ލިބިގެން ދާނެ އެވެ. މިކަމުގެ ސަބަބުން، މީހާގެ މޫނުމައްޗަށް އަންނަ ކުލަވަރުން އޭނާގެ ސިކުނޑި އަށް ފޮނުވާ މެސެޖްތަކާ އެކު ހިޔާލުތައް ސިފަކޮށްދޭނެ އެވެ.
ޓޫކާ ވިދާޅުވި ގޮތުގައި މިގޮތަށް ގެނެސްދޭ ތަސްވީރުގެ ސައްހަކަން 83 ޕަސެންޓަށް އަސްލާ އެއްގޮތްވާނެ އެވެ.
މި ކޮމްޕިއުޓަރުގެ އުފެއްދުމުގެ މަސައްކަތް ކުރިއަށްދާ އިރު އިންސާނުން ބައިވެރިކޮށްގެން އަންނަނީ ގިނަ ޓެސްޓްތަކެއް ވެސް ހަދަމުންނެވެ. އެގޮތުން މީގައި ބައިވެރިވާ މީހުންގެ ސިކުނޑީގެ ހަރަކާތްތައް މޮނިޓަކޮށް، ނަތީޖާތައް އަންނަނީ ހޯދަމުންނެވެ.
"މިއީ އިންސާނާ އަށް ގުދުރަތީ ގޮތުން ކުއްލިއަކަށް އަންނަ ހިޔާލުތަކާއި ކޮމްޕިއުޓަރުން ދޭ މައުލޫމާތު އެއްކޮށްލައިގެން މަސައްކަތްކުރާނެ ޓެކްނިކެއް،" ޓޫކާ ވިދާޅުވި އެވެ.
ރިސާޗަރުންގެ ޓީމުން ބުނާ ގޮތުގައި އިންސާނާގެ ހިޔާލުތައް ތަސްވީރަކަށް ބަދަލުކުރެވޭ ގޮތް ވުމަކީ ގިނަ ފަހަރަށް އިންސާނާގެ ވިސްނުން ނުފޯރާ ހިސާބު ވެސް ތަސައްވުރުކޮށް ދޭނެ ކަމެކެވެ.
"މިސާލަކަށް މުޅިން އާ އެއްޗެއް އިލަސްޓްރޭޓްކުރަން ބޭނުންވި ނަމަވެސް އަމިއްލަ އަށް އެއަށް ސިފައެއް ގެންނާނެ ގޮތް ނޭނގެނީ. އެފަދަ ހާލަތެއްގައި މި އުފައްދާ ކޮމްޕިއުޓަރަކީ ވަރަށް ވެސް ބޭނުންތެރި އެއްޗަކަށް ވާނެ،" ރޫކާ ވިދާޅުވި އެވެ. "މީގެ ސަބަބުން އިންސާނުން ކަންކަމާ ދޭތެރޭ ގޮތާއި ކްރިއޭޓިވިޓީ ވެސް އިތުރުކޮށްދޭން މަގުފަހިކޮށްދޭނެ."