20 ސެޕްޓެމްބަރ 2020 - 11:17
ރާއްޖޭގައި ކޮވިޑް-19 އަށް ޕޮޒިޓިވްވާ ރޭޓް އޯގަސްޓް މަސް ތެރޭ 15 ޕަސެންޓާ ހިސާބަށް މައްޗަށް ދިއުމަށް ފަހު މިދިޔަ ހަފުތާގައި އެ ރޭޓް އެވްރެޖްކޮށް ހަ ޕަސެންޓާ ހަމަ އަށް ދަށްވެފައިވާ ކަމަށް އެޗްޕީއޭގެ ހިސާބުތަކުން ދައްކައިފި އެވެ.
މިދިޔަ އާދީއްތަ ދުވަހުން ފެށިގެން އިއްޔެއާ ހަމަ އަށް އެޗްޕީއޭ އިން ހާމަކޮށްފައި ހުރި ދުވަހު ހިސާބުތަކަށް ބަލާއިރު ކޮންމެ 24 ގަޑިއިރަކު އެވްރެޖްކޮށް 1،365 ސާމްޕަލް ނަގާފައިވެ އެވެ. މި އަދަދާ އަޅާކިޔާއިރު އެއިން ކޮންމެ 24 ގަޑިއިރަކު ފެނިފައިވާ ކޮވިޑްގެ ޕޮޒިޓިވް ކޭސްތަކުގެ އެވްރެޖް ނިސްބަތަކީ 6.28 އެވެ. ނަމަވެސް އެޗްޕީއޭ އިން ހިސާބުތައް އާންމުކުރާއިރު، ބައެއް މީހުންގެ ރިޕީޓް ސާމްޕަލްތަކުގެ އަދަދާ އެކު ހާމަކުރާތީ މި އަދަދުގައި ކުޑަ ތަފާތެއް ހުރުން އެކަށީގެންވެ އެވެ.
މިދިޔަ މަހު، ކޮވިޑަށް ކޮންމެ ދުވަހަކު ޕޮޒިޓިވްވާ އަދަދު އެންމެ މައްޗަށް ދިޔައިރު، ޕޮޒިޓިވްވާ ރޭޓް 15.54 ޕަސެންޓަށް ވެސް އެރި އެވެ. މިދިޔަ މަހުގެ 19 ގައި 1،125 ސާމްޕަލުން 146 ސާމްޕަލް ޕޮޒިޓިވްވި އެވެ. އެއީ 12.98 ޕަސެންޓެވެ. ޖެހިގެން އައި ދުވަހު 933 ސާމްޕަލުން 145 ސާމްޕަލް ޕޮޒިޓިވް ވެފައިވެ އެވެ. މިއީ 15.54 ޕަސެންޓެވެ.
މިދިޔަ ހަފުތާގެ ހިސާބުތަކަށް ބަލާއިރު ޕޮޒިޓިވްވި ރޭޓް އެންމެ މަތީގައި ހުރީ އާދީއްތަ ދުވަހު އެވެ. އެއީ 9.30 ޕަސެންޓެވެ. އެކަމަކު އޭގެ ފަހުން އެންމެ މައްޗަށް ވެސް މި ނިސްބަތް އަރާފައިވަނީ 6.76 ޕަސެންޓަށެވެ. މި ރޭޓް މިދިޔަ ހަފުތާގައި އެންމެ ދަށްވީ ބުރާސްފަތި ދުވަހު އެވެ. އެ ދުވަހުގެ ރޭޓަކީ 4.66 ޕަސެންޓެވެ.
ރާއްޖޭން ކޮވިޑް-19 ގެ ފުރަތަމަ ކޭސް ފެނުނުތާ އިއްޔެ އަށް 196 ދުވަސް ވެފައި ވާއިރު އިއްޔެ އިރުއޮއްސި 6:00 އަށް ހަމަ އަށް 9،649 މީހުން ވަނީ ބައްޔަށް ޕޮޒިޓިވް ވެފަ އެވެ. މީގެ ތެރެއިން 6،104 މީހުންނަކީ ދިވެހިންނެވެ. ބަލި ޖެހުނު މީހުންގެ ތެރެއިން މިހާތަނަށް 8،188 މީހުން ރަނގަޅުވެ އަދި 33 މީހަކު މަރުވެފައި ވާތީ، ބައްޔަށް ޕޮޒިޓިވްކޮށް މިހާރު ތިބި އަދަދަކީ 1،428 އެވެ. އެހެންވެ ބަލި ޖެހުނު މީހުންގެ ތެރެއިން 84.86 ޕަސެންޓް މީހުން ވަނީ ރަނގަޅުވެފަ އެވެ.