12 ސެޕްޓެމްބަރ 2020 - 14:35
މާލެ ސަރަހައްދުން ފުރައިގެން ގދ. މަޑަވެއްޔަށް ދިޔަ މަސްދޯންޏެއް، 24 ފަޅުވެރިންނާއެކު ކަރަންޓީނުކޮށްފި އެވެ.
އެ ރަށު ކައުންސިލްގެ ރައީސް ހަމީޒު އަހުމަދު ވިދާޅުވީ "ސީ ވޯލްޑް" ދޯނި ކަރަންޓީނުކުރީ، މިދިޔަ ހަފުތާގެ އަންގާރަ ދުވަހު ހުޅުމާލެއަށް މަސްކިރުވުމަށްފަހު ޖެހިގެން އައި ދުވަހު ހުޅުމާލެއިން ފުރާފައިވާތީ އެވެ.
އެ ދޯނީގެ ކައްޕިއާ ވާހަކަދެއްކުމުން، ދޯނީގެ ފަޅުވެރިއަކު ހުޅުމާލެއަށް ނުފައިބާކަމެއް އަދި އެ ދޯންޏަށް ވެސް އިތުރު ބަޔަކު ނާރާކަމެއް ޔަގީންކަމާއެކު ބުނެނުދެވުނު ކަމަށް ވިދާޅުވި އެވެ. ދޯނީގައި އެ މީހުން ކަރަންޓީނުކުރީ، މާލެއަށް އަދި ހުޅުމާލެއަށް ވެސް ދޯނިން ބަޔަކު ނުފައިބާކަން ޔަގީންކޮށްދެވިފައިނުވާތީ ކަމަށް ވިދާޅުވި އެވެ.
"ޔަގީންކަން ދިން ނަމަ ކަރަންޓީން ނުކޮށް ދޫކޮށްލެވުނީސް. އެކަމަކު ޓާސްކް ފޯހާ މަޝްވަރާކޮށްގެން އެންމެ ރައްކާތެރިގޮތަކީ އެއީ ކަމަށްވާތީ ކަރަންޓީނުކުރީ،" ހަމީޒު ވިދާޅުވި އެވެ.
އެ ދޯނި މިިދިޔަ ބުރާސްފަތި ދުވަހު ކަރަންޓީނުކުރިއަސް، ކަރަންޓީނުގެ މުއްދަތު ގުނަނީ ހުޅުމާލެއިން ފުރި ދުވަހުން ފެށިގެން 14 ދުވަހަށެވެ.
ކޮވިޑް-19 ގެ ބަލި އެންމެ ބޮޑަށް ފެތުރޭ މާލެ ސަރަހައްދުން ރަށްރަށަށް ދާ މީހުން 14 ދުވަހަށް ކަރަންޓީނުވާންޖެހެ އެވެ. ދޯނީގައި ވެސް އެ މީހުން ކަރަންޓީނުކުރީ އެ އުސޫލުގެ ތެރެއިންނެވެ.
ދޯނީގައި ތިބި މީހުންގެ ފަރާތުން ކޮވިޑުގެ އަލާމާތެއް ނުފެންނަ ކަމަށް ކައްޕިއާ ހަވާލަދެއްވައި އެ ކައުންސިލުން ބުންޏެވެ.
މަޑަވެލި މިހާރު އޮތީ ވެސް، އެ ރަށާ ކޯޒްވޭއަކުން ގުޅާލާފައިވާ ހޯނޑެއްދޫން ބަޔަކު ކޮވިޑަށް ޕޮޒިޓިވްވުމުން މޮނިޓަރިންގެ ހާލަތަށް ގެނެސްފަ އެވެ. އެކަމަކު އެ ރަށުން ނެގި އެއްވެސް ސާމްޕަލްއެއް މިހާތަނަށް ޕޮޒިޓިވްވެފަ އެއް ނުވެ އެވެ. މޮނިޓަރިންގައި އޮތް ކަމުގައި ވެސް ރަށުގެ ހާލަތު ރަނގަޅުކަމަށް ހަމީޒް ވިދާޅުވި އެވެ.
ހޯނޑެއްދޫން މިހާތަނަށް 36 މީހަކު ޕޮޒިޓިވްވެފައި ވެ އެވެ. މިއީ މާލެ ފިޔަވައި އެއް ރަށަކުން އެންމެ ގިނަ މީހުން ޕޮޒިޓިވްވި ރަށެވެ.