09 ސެޕްޓެމްބަރ 2020 - 06:28
ރަސްމީ ނަމަކަށް ރިޕަބްލިކް އޮފް ޗައިނާ ކިޔާ ޓައިވާނުގައި ބޭނުންކުރާ ޕާސްޕޯޓްގެ ސަބަބުން އެތަނުގެ ރައްޔިތުން ބޭރު ގައުމުތަކަށް ދަތުރުކުރާ އިރު، ޗައިނާ މީހުން ކަމަށް ހީކޮށް އޮޅުން އަރާ މައްސަލާގައި ޕާސްޕޯޓަށް ބަދަލު ގެންނަން، ގާނޫނު ހަދާ މަޖިލީހުން ނިންމުމުން އެކަން ތަންފީޒުކުރުމުގެ ގޮތުން ނެރޭ އާ ޕާސްޕޯޓް ދައްކާލައިފި އެވެ.
މިދިޔަ ބުދަ ދުވަހު ދައްކައިލި ޕާސްޕޯޓަށް ގެނައި އެންމެ ބޮޑު ބަދަލަކީ ކަވަރުގައި ފެހި ކުލަ އިންނަ ޕާސްޕޯޓްގެ މަތީގައި ކުރިން ބޮޑު އަކުރުން ލިޔެފައި އިންނަ "ރިޕަބްލިކް އޮފް ޗައިނާ" އޭގެ ތިރިން ވަށް ބުރަކަށް އިންނަ ނިޝާނުގެ ވަށަށައިގެން ވަރަށް ކުދި އަކުރުން ލިޔެފައިވުމެވެ. އަދި އާ ޕާސްޕޯޓްގެ ތިރީގައި ބޮޑު އަކުރުން "ޓައިވާން" ލިޔެފައިވެ އެވެ.
ޕާސްޕޯޓަށް ބަދަލު ގެންނަން ޖެހުނު ސަބަބާ ބެހޭ ގޮތުން ޓައިވާންގެ ފޮރިން މިނިސްޓަރު ޖޯސެފް ވޫ ވިދާޅުވީ ދުނިޔޭގެ ނުފޫޒު ގަދަ ގައުމެއްގެ ގޮތުގައި މަޝްހޫރު ޗައިނާގެ ނަން، ޓައިވާނުގެ ޕާސްޕޯޓްގައި ބޮޑު އަކުރުން ލިޔެފައި އޮތުމަކީ ރައްޔިތުންނަށް އުފުލަން ޖެހިފައި އޮތް އިންސާފެއް ނެތް، ބުރައެއް ކަމަށެވެ.
"އެހެންވެ އެ ދަތިކަން ފިލުވާލުން މީގެ އެންމެ ބޮޑު މަގުސަދަކީ. ގައުމުތަކަށް ދަތުރުކުރުމުގައި ޓައިވާނުގެ ރައްޔިތުންނަށް މިހާރު މި ބޭނުންކުރާ ޕާސްޕޯޓާ ހެދި ދިމާވާ މައްސަލަތައް ގިނަ. އެ މައްސަލަ މިދިޔަ ފެބްރުއަރީ މަހުން ފެށިގެން ވަކިން ބޮޑު. ސަބަބަކީ ބައެއް ގައުމުތަކުން ކޮވިޑް-19 ގެ ފަހުން ޗައިނާގެ ޓޫރިސްޓުން އެ ގައުމުތަކަށް ދަތުރުކުރުމުގައި ރެސްޓްރިކްޝަންތަކެއް ގެންގުޅޭތީ،" މިނިސްޓަރު ވިދާޅުވި އެވެ. "ޕާސްޕޯޓާ ހެދި ޓައިވާން މީހުން ޗައިނާ މީހުން ކަމަށް ހީކޮށް އޮޅުން އަރާތީ ދަތުރުފަތުރު ކުރަން ދިމާވާ ދަތިތަކާ ހެދި ލިބޭ ޝަކުވާތައް ވެސް ގިނަ."
އޭނާ ވިދާޅުވި ގޮތުގައި އާ ޕާސްޕޯޓް ބޭނުންކުރަން ފެށުމަކީ ޓައިވާނުގެ ރައްޔިތުން އެތައް ދުވަހެއް ވަންދެން ދެކެމުން އައި ހުވަފެނެއް ހަގީގަތަކަށްވުން ކަމަށެވެ.
މިއީ ޓައިވާނުގެ ޕާސްޕޯޓަށް ފާއިތުވި 20 އަހަރުގެ ތެރޭގައި ބަދަލުތަކެއް ގެނައި ދެވަނަ ފަހަރެވެ. ޕާސްޕޯޓްގެ ކަވަރުގައި "ޓައިވާން" ލިޔެފައި ވަނީ ކުރީގެ ރައީސް ޗެން ޝުއީ-ބިއާންގެ ވެރިކަމުގައި 2003 ގަ އެވެ.
އާ ޕާސްޕޯޓް ދޫކުރަން ފަށާނީ އަންނަ އަހަރުގެ ޖެނުއަރީ މަހުން ފެށިގެންނެވެ. އެހާ ތަނަށް މިހާރު ބޭނުންކުރަމުން އަންނަ ޕާސްޕޯޓް ބޭނުންކުރާނެ ކަމަށް ބިއުރޯ އޮފް ކޮންސިއުލާ އެފެއާޒް (ބީއޯސީއޭ) އިން ބުންޏެވެ. އަދި މިހާރު ބޭނުންކުރާ ޕާސްޕޯޓްގެ މުއްދަތު ހަމަނުވި ނަމަވެސް އާ ޕާސްޕޯޓަށް މިހާރު ވެސް އެޕްލައިކުރެވޭނެ އެވެ.