30 އޯގަސްޓް 2020 - 11:59
ބީއެމްއެލް އިން ނަގާފައިވާ ލޯނުތަކާއި ފައިނޭންސް ސްކީމްތަކަށް ފައިސާ ދައްކަން ދީފައިވާ ހަ މަސް ދުވަހުގެ މޮރިޓޯރިއަމްގެ މުއްދަތު އިތުރުކޮށް، ނޮވެމްބަރުގެ ނިޔަލަށް ދަންމާލައިފި އެވެ. އެކަމަކު ކުރިން ހަމަޖެހިފައިވާ ގޮތުން މި މަހުގެ ނިޔަލަށް މޮރިޓޯރިއަމް ހަމަވާ ލޯނުތަކަށް ލުއި ހޯދަން އަލުން ޖެހޭނީ އެދޭށެވެ.
ބޭންކުން މިއަދު ނެރުނު ބަޔާނުގައި ބުނެފައިވާ ގޮތުން، އެ ލޯނުތައް ފަސްކޮށްދޭން އެދުމުގެ ފުރުސަތު ވެސް މިހާރު ވަނީ މި އަހަރުގެ ނިޔަލަށް އިތުރުކޮށްދީފަ އެވެ.
އެ ބޭންކުން މިއަދު ނެރުނު ބަޔާނެއްގައި ބުނީ މިދިޔަ މާޗު މަހު ހުޅުވާލި ފުރުސަތުގައި ޖުލައި މަހުގެ ނިޔަލަށް ޕާސަނަލް އާއި ހައުސިން އަދި ވިޔަފާރި ލޯނާއި ފައިނޭންސް ހިމެނޭ ގޮތަށް 17،700 ލޯނު ހަ މަސްދުވަހަށް ފަސްކޮށްދިނުމަށް އެދި ހުށަހަޅާފައިވާ ކަމަށެވެ. އަދި އެ މުއްދަތު އިތުރު ކުރުމަށް ނިންމީ ޝަރުތު ހަމަވާ އިތުރު ކަސްޓަމަރުންނަށް ފުރުސަަތު ދިނުމުގެ ގޮތުން ކަމަށް ބީއެމްއެލް އިން ބުންޏެވެ.
މާޗު މަހު ހުޅުވާލި ފުރުސަތުގައި ފަސްކޮށްދިން ލޯނުތައް ދެއްކުމުގެ މުއްދަތު ކުރިން އޮތް ގޮތުން ނަމަ މި މަހުގެ ނިޔަލަށް ހަމަވާނެ އެވެ. ނަމަވެސް މިހާރު ހަމަޖެއްސިގޮތުން ދެން ލޯނުތައް ދައްކަން ފަށަން ޖެހޭނީ ނޮވެމްބަރުގެ ފަހުންނެވެ.
ކުރިއަށް އޮތް ތިން މަސްދުވަހުގެ މޮރިޓޯރިއަމް މުއްދަތު އިތުރު ކޮށްދިނުމަށް އެދި ހުށަހަޅަން ޖެހޭނީ މާޗު މަހު ހުޅުވާލި ފުރުސަތުގައި މޮރިޓޯރިއަމަށް އެދިފައިވާ މީހުން އެކަންޏެވެ. ނަމަވެސް ލޯނު އަނބުރާ ދެއްކުން ފައިސާ ފަސްކޮށްދިނުމަށް އެދި ހުށަހަޅާފައިވާ ފަރާތްތަކުގެ ތެރެއިން މި މުއްދަތުގެ ތެރޭގައި ފައިސާ ދެއްކޭ ނަމަ ލޯނު ފަސްކޮށްދިނުމަށް އެދި ހުށަހަޅަން ނުޖެހޭނެ ކަމަށް ބީއެމްއެލް އިން ބުންޏެވެ.
ބީއެމްއެލް އިން ބުނީ މޮރިޓޯރިއަމް އަށް އިތުރު ކުރި ތިން މަހުގެ ފުރުސަތަށް އެޕްލައިކުރުމުގެ ފުރުސަތު އަންނަ މަހުގެ ތެރޭގައި ހުޅުވާލާނެ ކަމަށެވެ.
ބީއެމްއެލްގެ އިތުރުން އެސްއެމްއީ ބޭންކުން ވެސް ވަނީ އެ ބޭންކުން ނަގާފައިވާ ލޯނުތައް ދެއްކުމުގެ މުއްދަތު އިތުރުކޮށްދީފަ އެވެ. މިއީ ކޮވިޑް-19އާ ގުޅިގެން އިގްތިސާދު ދަށްވެ ގިނަ ބައެއްގެ އާމްދަނީ އަށް އަސަރު ކުރުމާ ގުޅިގެން ބޭންކުތަކުން ކަސްޓަމަރުންނަށް ލޯނު ދެއްކުމުގައި ލުއިކޮށްދިނުމަށް ދޭ ފުރުސަތެކެވެ.