27 އޯގަސްޓް 2020 - 17:59
ތ. ވަންދޫގައި މަސްވެރިކަން ކުރާ ދެ ދޯނީގެ ތެރެއިން "އަސްދާން" ދޯނި ފަރަށް އެރުންވީ އެ ރަށުގެ އެންމެންނަށް ވެސް ލިބުނު ބޮޑު ހިތާމައަކަށެވެ. ގާތްގަނޑަކަށް 400 އެއްހާ މީހުން ދިރިއުޅޭ އެ ރަށުގެ ގިނަ އާއިލާތައް މާލީ ގޮތުން ބަރޯސާ ވެފައި އޮންނަނީ އެ ދޯނިން ލިބޭ އާމްދަނީ އަށެވެ. އެހެންވެ، މި މަހުގެ 15 ދުވަހުގެ ރޭ، ވ. ރަކީދޫ ފުއްޓަރު ބޭރަށް ދޯނި އަރައި، ވަރަށް ބޮޑަށް ހަލާކުވުމުން އޭގެ އަސަރު ރަށުގެ ގިނަ ބަޔަކަށް ކުރި އެވެ.
އެކަމަކު މި ހިތާމައިގައި ބައިވެރިވެ، އެކުވެރިކަން ދައްކަމުން އަންނަނީ ހަމައެކަނި އެ ރަށު މީހުން އެކަންޏެއް ނޫނެވެ. ފަރަށް އަރައި، ދޯނީގެ ބޮޑުބައެއް ހަލާކުވުމުން، އެ އަތޮޅު ދިޔަމިނގިއްޔަށް އެހެލައިގެން، ދޯނި މަރާމާތު ކުރަމުން އަންނައިރު އެ މަސައްކަތް ކުރާ މީހުންނަށް، އެ އަތޮޅުގެ އެހެން ރަށްރަށުން ވެސް އަންނަނީ އެހީތެރިކަން ފޯރުކޮށްދެމުންނެވެ. ހާއްސަކޮށް އެ ރަށްރަށުގެ އަންހެނުން، ފޯރުކޮށްދޭ ކެއުންތައް ފާހަގަކޮށްލެވެ އެވެ.
"ދިޔަމިނގިލީގައި [މަރާމާތުގެ] މަސައްކަތް ކުރާއިރު ކާ އެއްޗެހި އެބަ ގެންދޭ އެ ރަށުންނާއި ވަންދުއިންނާއި ގުރައިދުއާއި މަޑިފުށިން ވެސް. ހަމަ އަންހެންވެރިން، ދަތުރު ހަދައިގެން، އެ ރަށަށް ކާއެއްޗެހި ހިފައިގެން ދަނީ،" ވަންދޫ ކައުންސިލްގެ ރައީސް މުހައްމަދު ގިޔާސް ވިދާޅުވި އެވެ.
"މިއީ ހަމަ އިޖްތިމާއީ ރޫހުގެ ނަމޫނާއެއް،"
ދިގުމިނުގައި 85 ފޫޓު ހުންނަ އަސްދާން ދޯނި ފަރަށް އެރުމުން، ދޯނީގެ ބަނޑުފިލައާއި ގެގަނޑާއެކު ބޮޑުބައެއް އެއްކޮށް ހަލާކުވެ، ދޯނި އަޑިއަށް ދިޔަ އެވެ. އެކަމަކު ހިރިލަންދު އާއި ދ. ކުޑަހުވަދޫ މަސްވެރިންގެ އެހީގައި އެމްޓީސީސީގެ ޓަގެއްގެ ބޭންކޮށްގެން ދޯނި ވަނީ ފުންކޮށްފަ އެވެ. އަދި ހޮރައިޒަން ފިޝަރީޒްގެ ބޯޓެއްގައި ކަފު ޖަހައިގެން، ދޯނި ގެންދިޔައީ، ވަންދުއާ 18 މޭލު ދުރުގައި އޮންނަ އެ އަތޮޅު ދިިޔަމިނގިއްޔަށެވެ.
ގިޔާސް ވިދާޅުވި ގޮތުގައި ހިރިލަންދޫ ވަޑިންނާއި ދޯނީގެ ފަޅުވެރިން، މަރާމާތުގެ މަަސައްކަތް ކުރާއިރު ކެއުން ބުއިމާ ހަވާލުވެފައި އޮންނަނީ އެކި ރަށްރަށުންނެވެ. ކިތަންމެ ދުރުގައި އޮތް ނަމަވެސް، ވަންދޫގެ އަންހެނުން ވެސް ހަތަރު ފަހަރެއްގެ މަތިން މެންދުރުގެ ކެއުން އެ މީހުންނަށް ގެންގޮސްދީފި އެވެ. ބޮނޑިބަތާއި ކުޅިމަހާއި އެހެނިހެން ބާވަތް ހިމެނޭ ގޮތަށް ބޮޑެތި ކެއުންތައް ހިފައިގެން ދަނީ އެ މީހުން އަމިއްލަ ހަރަދުގައި ލޯންޗެއް ހިފައިގެންނެވެ. ގުރައިދު އާއި މަޑިފުށިން ވެސް ކެއުން ހިފައިގެން އަންހެންވެރިން އެ ރަށަށް ދަނީ، އެ މީހުންގެ އަމިއްލަ ހަރަދުގަ އެވެ. ކޮންމެ ދުވަހަކުހެން، ކޮންމެވެސް އެއް އިރެއްގެ ކެއުން އެ މީހުން ގެންގޮސްދެ އެވެ.
"ކުރީ ޒަމާނުގައި އޮޑި ބަންނައިރު އަންހެންވެރިން ދާނެ ކެއުމާއި ސައި ހިފައިގެން، އޮޑި ދޮށަށް. ހަމަ އެ މަންޒަރު މިހާރު ވެސް މި ފެންނަނީ،" ގިޔާސް ވިދާޅުވި އެވެ.
"އެ ހުރިހާ ކަމެއް ވެސް އެ މީހުން ކުރަނީ އޮންނަ ރަހުމަތްތެރިކަމާއި ގާތްކަމެއްގެ ބޮޑުކަމުން، ހިލޭ ސާބަހަށް. އަޅުގަނޑުމެން ގަބޫލު ކުރާ ގޮތުގައި މި ރަށުގެ ހުރިހާ ރަށެއްގައި ވެސް މި ގާތްކަން އޮންނާނެ،"
ތ. އަތޮޅުން ދައްކަމުން އަންނަ މި މިސާލަށް، ފިޝަރީޒް މިނިސްޓަރު ޒަހާ ވަހީދު ވެސް ވަނީ ތައުރީފް ކުރައްވައިފަ އެވެ. ފޮޓޯތަކާ އެކު ޒަހާ ކުރެއްވި ޓްވީޓެއްގައި ވިދާޅުވީ މިއީ އެތައް ޖީލުތަކަކަށް ދެމިގެން އަންނަ ދިވެހިންގެ އިޖްތިމާއީ ސަގާފަތެއް ކަމަށާއި ފަޅުވެރިންނާއި ވަޑިންގެ ހިތްވަރު އާލާކުރުމަށް ދޭ މި ކެއުންތަކުގެ ސަބަބުން ހިތްހަމަޖެހުން ލިބިވަޑައިގަންނަވާ ކަމަށެވެ. އަދި މިއީ ރަށުގެ އިޖްތިމާއީ ރޫހު ވަރުގަދަކަން ފެންނަ ކަމެއް ކަމަށް ވިދާޅުވި އެވެ.
އާބާދީގެ 80 ޕަސެންޓް މަސްވެރިކަމަށް ބަރޯސާވެފައި އޮންނަ ވަންދޫގެ ރައްޔިތުންގެ އުއްމީދަކީ ވީހާވެސް އަވަހަކަށް ދޯނީގެ މަސައްކަތް ނިމި، އަލުން މަހަށް ނިކުމެވޭ ގޮތްވުމެވެ. އެ ރަށު ކައުންސިލުން ލަފާ ކުރާ ގޮތުގައި އަންނަ ހަފުތާ ތެރޭގައި އެ މަސައްކަތް ނިމޭނެ އެވެ. މި ވަގުތު، އެ ރަށުގެ ރައްޔިތުންގެ ހިތް ފުރިފައި އޮތީ އެހެން ރަށްރަށުގެ މަސްވެރިންނާއި އެ މީހުންގެ އާއިލާތަކުން ދެމުން އަންނަ އެހީތެރިކަމުންނެވެ.