26 އޮކްޓޯބަރ 2016 - 08:35
ލަންޑަން (އޮކްޓޯބަރު 26) - އިނގިރޭސި ލީގް ކަޕްގައި ރޭ ކުޅުނު މެޗުތަކުން މޮޅުވެ އާސެނަލާއި ލިވަޕޫލް މުބާރާތުގެ ކުއާޓާ ފައިނަލުން ޖާގަ ހޯދައިފި އެވެ.
އާސެނަލް އަމިއްލަ ދަނޑުގައި ރެޑިން އަތުން މޮޅުވީ 2-0 އިންނެވެ. ލިވަޕޫލް ވަނީ 2-1 އިން ޓޮޓެންހަމް ބަލިކޮށްފަ އެވެ.
ރޭގެ މެޗަށް ލިވަޕޫލް ނުކުތީ، ވެސްޓް ބްރޮމްއާ ދެކޮޅަށް ކުޅުނު މެޗަށް އެރުވި ފުރަތަމަ އެގާރަ އަށް 11 ބަދަލު ގެނެސްގެންނެވެ. ޓޮޓެންހަމުން ވެސް ކުޅުނީ ގިނަ ބަދަލުތަކަކާ އެކު އެވެ. ރޭގެ މެޗުގައި ލިވަޕޫލްގެ ދެ ލަނޑު ވެސް ކާމިޔާބުކުރީ ޑެނިއަލް ސްޓަރިޖެވެ.
ޓޮޓެންހަމްގެ ހަމައެކަނި ލަނޑު ކާމިޔާބުކުރީ ލިބުނު ޕެނަލްޓީ އަކުން ވިންސެންޓް ޔެންސަން އެވެ. މި ޕެނަލްޓީ އަކީ ލިވަޕޫލްގެ ލޫކަސް ލެއިވާ އެ ޓީމުގެ އޭރިއާ ތެރެއިން ޓޮޓެންހަމްގެ އެރިކް ލަމޭލާ އަށް ކުރި ފައުލަކަށް ރެފްރީ ދިން ޕެނަލްޓީ އެކެވެ.
ލިވަޕޫލްގެ ކޯޗު ޔާގަން ކްލޮޕް ވަނީ ރޭގެ މެޗުގައި ސްޓަރިޖާއި އެ ޓީމުގެ ޒުވާން ކުޅުންތެރިން ދެއްކި ކުޅުމަށް ތައުރީފް ކޮށްފަ އެވެ.
ރޭ ރެޑިންއާ ދެކޮޅަށް އާސެނަލްގެ ދެ ލަނޑު ޖެހީ ވެސް އަލެކްސް އޮކްސްލޭޑް ޗަމްބަލެއިން އެވެ. ރޭގެ މެޗުގައި އާސެނަލުން ވެސް ކުޅުނީ ގިނަ ބަދަލުތަކަކާ އެކު އެވެ. ލަނޑު ޖަހާނެ ގިނަ ފުރުސަތުތަކެއް އާސެނަލަށް މި މެޗުގައި ލިބިގެންދިޔައިރު ބޭނުމެއް ނުކުރެވުނެވެ.
ރޭ ކުޅުނު އެހެން މެޗުތަކުގެ ނަތީޖާ އަށް ބަލާއިރު ބްރިސްޓޯލް ސިޓީ އަތުން 2-1 އިން ހަލް ސިޓީ ވަނީ މޮޅުވެފަ އެވެ. ޕްރެސްޓަން ނޯތު އެންޑާ ވާދަކޮށް ނިއުކާސަލުން ވަނީ 6-0 އިން މޮޅުވެފަ އެވެ.