23 އޯގަސްޓް 2020 - 08:24
ހިންދީ ސިނަމާގެ ކުރީގެ ވަރަށް މަޝްހޫރު ބަތަލާއެއް ކަމަށްވާ މީނާ ކުމާރީގެ ވާހަކަ ކިޔައިދޭ ވެބް ސީރީޒަކާއި ފީޗާ ފިލްމެއް ހަދަން ނިންމައިފި އެވެ.
މި ސީރީޒާއި ފިލްމު ހަދަން ނިންމާފައި ވަނީ ނޫސްވެރިޔާ އަޝްވިނީ ބަޓްނާގަރު މީނާ ކުމާރީއާ ބެހޭ ގޮތުން ލިޔުނު ފޮތް "މެހެޖަބީން އޭޒް މީނާ ކުމާރީ" އަށް ބިނާކޮށެވެ. އޭގެ ރައިޓްސް ވިއްކާލާފައި ވަނީ އޯލް މައިޓީ މޯޝަން ޕިކްޗާޒްއަށެވެ.
އަޝްްވިނީ ބުނީ އޭނާގެ ފޮތުގެ ރައިޓްސް އެ ސްޓޫޑިއޯ އަށް ދޫކޮށްލީ ފޮތަށް ވަރަށް ފުރިހަމަ އަށް އިންސާފުކޮށްދޭ ގޮތަށް މީނާ ކުމާރީގެ ބައޮގްރަފިކަލް ޑްރާމާ ގެނެސްދޭނެކަމުގެ އިތުބާރާ އެކު ކަމަށެވެ. އަދި މިފަދަ ޕްރޮޖެކްޓެއްގައި ހިއްސާވުމަކީ ޝަރަފެއް ކަމަށާއި މީނާ ކުމާރީ އަކީ އިންޑިއާގެ ސިނަމާ ދުށް އެންމެ ހުނަރުވެރި އެއް ބަތަލާއަށްވާތީ އޭނާގެ ވާހަކަ އަކީ ވަރަށް ޝައުގުވެރި ވާހަކަތަކެއް ކަމަށް ބުންޏެވެ.
އޯލް މައިޓީ މޯޝަން ޕިކްޗާޒްގެ ހިއްސާދާރު އެކްޓަރު/ޕްރޮޑިއުސަރު ޕްރަބްލީން ކޯރް ބުނީ މީނާ ކުމާރީގެ ވާހަކަ ކިޔައިދޭން ފުރުސަތު ލިބުމަކީ ވަރަށް ބޮޑު ޝަރަފެއް ކަމަށެވެ. އަދި އަވަސް އަރުވާލައިގެން މި މަސައްކަތްކުރުމުގެ ބަދަލުގައި ވަރަށް ރަނގަޅަށް ތައްޔާރުވެގެން މަސައްކަތް ފަށާނެ ކަމަށް ބުންޏެވެ.
"ފުރަތަމަ ވެބް ސީރީޒް ގެނެސްދީފައި ދެން އަހަރެމެން ބޭނުން ވަނީ ފީޗާ ފިލްމެއް ގެނެސްދޭން،" އޭނާ ބުންޏެވެ.
ތައްޔާރީތައް މިހާރު ވެސް ވާން ފެށި ނަމަވެސް މީނާ ކުމާރީގެ ރޯލް ކުޅޭނެ ބަތަލާއަކާ ދޭތެރޭ އަދި ގޮތެއް ނުނިންމަ އެވެ. އެކަމަކު އެ ރޯލަކީ ބޮލީވުޑްގެ ވަރަށް ގިނަ ބަތަލާއިން ލޯ އަޅާނެ ރޯލަކަށް ވާނެ އެވެ.
އަސްލު ނަމުން ނަމަ މެހެޖަބީން އަދި ސްކްރީން ނަމަކަށް މީނާ ކުމާރީގެ ނަމުން މަޝްހޫރުވި ބަތަލާ އަކީ ހިންދީ ސިނަމާގެ އަބަދަށްފެހި ފިލްމުތަކެއް ކުޅުނު ތަރިއެކެވެ. ތެއްތިރީސް އަހަރަށް ދެމިގެން ދިޔަ މީނާ ކުމާރީގެ ކެރިއަރުގައި ކުޅުނު ފާހަގަކޮށްލެވޭ ބައެއް ފިލްމުތަކުގެ ތެރޭގައި ބައިޖޫ ބަވްރާ (1952)، ޕަރިނީތާ (1953)، ދޯ ބިގާ ޒަމީން (1953)، ދިލް އަޕްނާ އޯރް ޕްރީތު ޕަރާއީ (1960)، ސާހިބު، ބީވީ އޯރް ގުލާމް (1962)، ޕޫލް އޯރް ޕައްތަރު (1966) އަދި ޕަކީޒާ (1972) ހިމެނެ އެވެ.
ޒާތީ ދިރިއުޅުން ވަރަށް ހިތްދަތި އަދި އެކަމާ ގުޅިގެން "ޓްރެޖެޑީ ކްއީމް" ގެ ނަމުން މީޑިއާތަކުގައި ސިފަކުރެވުނު މީނާ ކުމާރީ އެންމެ 38 އަހަރުގައި މަރުވީ މާޗް 31، 1972 ގަ އެވެ.