20 އޯގަސްޓް 2020 - 21:26
ދުނިޔޭގެ އިގްތިސޯދު ހުއްޓުވާލި ކޮވިޑް-19ގެ ބަލިމަޑުކަމާއެކު އުޅެން ދިވެހިން މިހާރު ދަސްކޮށްފި ކަމަށް، ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު މިއަދު ވިދާޅުވެއްޖެ އެވެ.
ރާއްޖެ އާއި ލަންކާއާ ދެމެދުގެ ވިޔަފާރީގެ ގުޅުން ވަރުގަދަ ކުރަން އުފައްދާފައި އޮންނަ ސްރީ ލަންކާ މޯލްޑިވްސް ބިޒްނަސް ކައުންސިލްގެ 12 ވަނަ އަހަރީ ޖަލްސާގައި ނަޝީދު ވިދާޅުވީ ކޮވިޑް-19ގެ ބަލިމަޑުކަމުގައި އެންމެ މުހިއްމީ ސިއްހަތާއި އަމިއްލަ ރައްކާތެރިކަން ކަމަށެވެ. ހަމައެއާ އެކު ދިރިއުޅުމަށް މަސައްކަތް ވެސް ކުރަން ޖެހޭ ކަމަށް ވެސް ވިދާޅުވި އެވެ.
އެމަނިކުފާނު ވިދާޅުވި ގޮތުގައި މި ބަލިމަޑުކަމުގައި އެއްވެސް ސަރުކާރަކަށް ދާއިމީ ގޮތެއްގައި ރައްޔިތުންނަށް އެހީތެރިކަން ފޯރުކޮށް ނުދެވޭނެ އެވެ.
"ބަލި، ދިވެހިންގެ ތެރޭގައި އަދިވެސް އެބައުޅޭ. އެކަމަކު މިހާރު މި ބައްޔާ އެކު އުޅެން ދިވެހިން ވަނީ ދަސްކޮށްފައި،" އޮންލައިންކޮށް ބޭއްވި އެ ބައްދަލުވުމުގައި ނަޝީދު ވިދާޅުވި އެވެ.
މިދިޔަ އޭޕްރީލް މަހު 15ގައި މާލޭން ކޮވިޑް-19 ފެނުމާ އެކު، ދޮޅު މަހަށް ވުރެ ގިނަ ދުވަހު މާލެ ވަނީ ލޮކްޑައުން ކޮށްފަ އެވެ. އެކަމަކު ހަތަރު ފަހަރަށް ދިގު ދަންމާލި ލޮކްޑައުން ނުނިމެނީސް، ނަޝީދު ވަނީ މަޖިލީހުގެ ޖަލްސާތައް ފަށަން ޖެހޭނެ ކަމާއި އަބަދު އޮންލައިންކޮށް ޖަލްސާތައް ނުބޭއްވޭނެ ކަމަށް ވިދާޅުވެފަ އެވެ. އޭރުން ފެށިގެން އެ މަނިކުފާނު ވިދާޅުވަމުން ދިޔައީ ބަލިމަޑުކަމާއެކު ދިވެހިން ދިރިއުޅެން ދަސްކުރަން ޖެހޭނެ ކަމަށެވެ.
ލޮކްޑައުންގެ ލުއިތައް ދޭން ފެށުމާއެކު ބަލި ޖެހޭ މީހުންގެ އަދަދު ވަރަށް ބޮޑަށް އިތުރުވި ނަމަވެސް، ނަޝީދު މިއަދު ވިދާޅުވީ ބަލި ފެތުރޭ މިންވަރު މިހާރު ހިފެހެއްޓިފައިވާ ކަމަށެވެ. އަދި އެކަމުގައި ރައީސް އިބްރާހިމް މުހައްމަދު ސޯލިހުގެ ދައުރު ބޮޑުކަން ފާހަގަ ކުރައްވައި އެ މަނިކުފާނަށް ތައުރީފް ކުރެއްވި އެވެ.
ނަޝީދު ވިދާޅުވި ގޮތުގައި މި ދަނޑިވަޅު ރައީސްގެ ފަރާތުން ފެނިވަޑައިގެންނެވީ ކެތްތެރި ކަމާއި ހިތްވަރުފުޅު ގަދަކަމެވެ. އަދި އެހެން އެކަކަށް ވުރެން ވެސް ރާއްޖެ އޮތް ހާލަތު އެމަނިކުފާނު ދެނެވަޑައިގަންނަވާ ކަމަށާއި ބަލި ފެތުރޭ މިންވަރު މިހާރު ހިފެހެއްޓިފައި ވަނީ އޭގެ ސަބަބުން ކަމަށް ވިދާޅުވި އެވެ.
ބައްޔާ އެކު ދިވެހިން ދިރިއުޅުމަށް، ބޯޑަރު ހުޅުވާލައި ޓޫރިސްޓުން ގެންނަން ފެށި ނަމަވެސް، ޓޫރިސްޓުން އައުން މަދުކަން ނަޝީދު ފާހަގަ ކުރެއްވި އެވެ. އެކަމަކު ކުރިއަށް އޮތްތަނުގައި އެކަން ހައްލު ވާނެ ކަމަށް ޔަގީން ކުރައްވާ ކަމަށާއި ރިސޯޓުތައް ހުޅުވައި، މުވައްޒަފުން އަލުން މަސައްކަތަށް ނިކުތުމަކީ މިހާރު ލިބިފައިވާ ވަރަށް ބޮޑު އުފަލެއް ކަމަށް އެ މަނިކުފާނު ވިދާޅުވި އެވެ.
"ސަރުކާރުން ޔަގީންކުރޭ، ހަމަ މަދު ދުވަސްކޮޅެއްގެ ތެރޭގައި، ކުރިން ރާއްޖެއަށް ޓޫރިސްޓުން އައި ވަރަށް އަންނާނެ ކަމަށް،" ބިޒްނަސް ކައުންސިލްގައި ހިމެނިވަޑައިގަންނަވާ ލަންކާގެ މެމްބަރުންނަށް ރާއްޖޭގެ ހާލަތު އޮޅުން ފިލުއްވައިދެއްވަމުން ނަޝީދު ވިދާޅުވި އެވެ.
ކޮވިޑުން ރައްކާތެރިވުމުގެ ފިޔަވަޅެއްގެ ގޮތުން ރާއްޖޭގެ ބޯޑަރު ބަންދުކުރުމަށް ފަހު، އަލުން ހުޅުވިތާ މަހެއް ވީއިރު، ރާއްޖެ އައިސްފައި ވަނީ މަދު ފްލައިޓްތަކެކެވެ. އަދި ޒިޔާރަތް ކުރި ޓޫރިސްޓުންގެ އަދަދު ވެސް އުއްމީދު ކުރިވަރަށް ވުރެ މަދެވެ.