13 އޯގަސްޓް 2020 - 10:13
މޮސްކޯ (އޮގަސްޓް 13) - ކޮވިޑް-19 އަށް ރަޝިޔާ އިން އުފެއްދި ވެކްސިންގެ ރައްކާތެރިކަމާ މެދު ސުވާލު އުފައްދާ ފަރާތްތަކަށް އެ ގައުމުން ރައްދުދީފި އެވެ.
އިންސާނުން ބޭނުންކޮށްގެން، ގާތްގަނޑަކަށް ދެ މަހެއްހާ ދުވަހަށް ކުރިއަށް ގެންދިޔަ ޓްރަޔަލްތަކަށް ފަހު ރަޝިޔާގެ ވެކްސިނަށް އަންގާރަ ދުވަހު ވަނީ ހުއްދަދީފަ އެވެ. ނަމަވެސް ރަޝިޔާ އިން ވެކްސިން އުފެއްދި ސްޕީޑާ މެދު ކަންބޮޑުވުން ފާޅުކޮށް، ބައެއް ފަރާތްތަކުން ވަނީ ވެކްސިންގެ ރައްކާތެރިކަމާ މެދު ޝައްކު އުފައްދައިފަ އެވެ. ރަޝިޔާގެ ވެކްސިންއާ މެދު ސަމާލުވުމަށް ވަނީ ފްރާންސް، ޖަރުމަން، ސްޕޭން އަދި އެމެރިކާގެ ސައެންސްވެރިން ގޮވާލައިފަ އެވެ.
"ހީވާ ގޮތުން އަޅުގަނޑުމެންގެ ވާދަވެރިން އުޅެނީ ރަޝިޔާ އިން އުފެއްދި ވެކްސިންގެ އެޑްވާންޓޭޖް ނެގުމަށް. އެކަމަކު އެ މީހުން ކުރާ ތުހުމަތުތަކުގައި އެއްވެސް އަސާސެއް ނެތް،" ރަޝިޔާގެ ހެލްތު މިނިސްޓަރު މިޚައިލް މުރަޝްކޯ އިންޓަފެކްސް ނިއުސް އަށް ވިދާޅުވި އެވެ.
ވެކްސިންގެ ފުރަތަމަ ޕެކޭޖް ކުރިއަށް އޮތް ދެ ހަފުތާ ތެރޭ ލިބޭނެ ކަމަށާއި ވެކްސިން ފުރަތަމަ ދޭނީ ޑޮކްޓަރުންނަށް ކަމަށް އޭނާ ވިދާޅުވި އެވެ.
ރަޝިޔާގެ އޮފިޝަލުން ބުނެފައި ވަނީ ފުޅާދާއިރާއެއްގައި ވެކްސިން ދޭން ފަށާނީ އޮކްޓޯބަރު މަހު ކަމަށެވެ.
ރަޝިޔާގެ ވެކްސިނަށް ހުއްދަ ދިންކަން އަންގާރަ ދުވަހު އިއުލާން ކުރެއްވީ ރަޝިޔާ ލަޑިމިއާ ޕުޓިންނެވެ. އޭނާ ވިދާޅުވީ ހުއްދަ ދިނީ ހުރިހާ ގޮތަކުން ޗެކް ކުރުމަށް ފަހު ކަމަށެވެ. އަދި ދަރިކަނބަލަކަށް ވެސް އެ ވެކްސިން ދީފައިވާ ކަމަށް ޕުޓިން ވިދާޅުވި އެވެ.
ރަޝިޔާގެ ވެކްސިންއާ މެދު ބައެއް ގައުމުތަކުން ސުވާލު އުފެއްދި ނަމަވެސް ފިލިޕީންސްގެ ރައީސް ރޮޑްރިގޯ ޑުޓާޓޭ ވަނީ އެ ވެކްސިން އަމިއްލަފުޅަށް ޓެސްޓްކުރައްވާނެ ކަމަށް ވިދާޅުވެފަ އެވެ.
ރަޝިޔާގެ ސައެންސްވެރިން ބުނެފައި ވަނީ ވެކްސިންގެ ފުރަތަމަ ސްޓޭޖްތައް ކާމިޔާބު ކަމަށެވެ. ނަމަވެސް ގިނަ ބަޔަކަށް ދީގެން ޓެސްޓް ކުރާ ތިން ވަނަ މަރުހަލާގެ ކުރިން ރަޝިޔާ އިން މި ވަނީ ވެކްސިނަށް ހުއްދަ ދީފަ އެވެ.
މޮސްކޯގެ ގަމަލެޔާ އިންސްޓްޓިއުޓުން އުފެއްދި ވެކްސިނަށް ދީފައިވާ ނަމަކީ ސްޕުޓްނިކް-ވީ އެވެ. ވެކްސިން އަށް ނަންދީފައި ވަނީ ދުނިޔޭގެ ފުރަތަމަ ސެޓެލައިޓުގެ ނަމާ ގުޅުވައިގެންނެވެ. ސްޕުޓްނިކް އަކީ ރަޝިޔާ ބަހުން ސެޓެލައިޓެވެ.
ސްޓޭޖް ތިނެއްގައި މިހާރުވާ ކަމަށް ޑަބްލިއުއެޗްއޯ އިން އިއުލާންކޮށްފައިވާ ހަ ވެކްސިންގެ ތެރޭގައި ރަޝިޔާގެ ވެކްސިން އަދި ނުހިމެނެ އެވެ. ދުނިޔޭގެ އެކި ކުންފުނިތަކުން މިހާރު އަންނަނީ ކޮރޯނާވައިރަހަށް 100 އަށް ވުރެ ގިނަ ވެކްސިން އުފެއްދުމުގެ މަސައްކަތް ކުރަމުންނެވެ. އޭގެ ތެރޭން ބައެއް ވެކްސިން މިހާރު ވަނީ އިންސާނުން ބޭނުންކޮށްގެން ޓެސްޓްކޮށްފަ އެވެ. ގިނަ ތަޖްރިބާކާރުން ބުނަނީ ކޮރޯނާވައިރަހަށް ރަނގަޅު ވެކްސިނެއް ލިބޭވަރު ވާނީ އަންނަ އަހަރުގެ ކުރީކޮޅު ކަމަށެވެ.