12 އޯގަސްޓް 2020 - 10:37
ޖެނީވާ (އޮގަސްޓް 12) - އިންސާނުން ބޭނުންކޮށްގެން ދެ މަސް ދުވަހުގެ ޓްރަޔަލްތައް ހެދުމަށް ފަހު، ރަޝިޔާ އިން ކޮރޯނާވައިރަހުގެ ވެކްސިނަށް ހުއްދަ ދިން ނަމަވެސް، އިތުރު ޓްރަޔަލްތައް ނުހަދާ އެ ވެކްސިން ކުރިއަށް ނުގެންދިއުމަށް ދުނިޔޭގެ ސިއްހަތު ޖަމިއްޔާ، ޑަބްލިއުއެޗްއޯ އިން އަންގައިފި އެވެ.
ޑަބްލިއުއެޗްއޯ އިން ބުނެފައި ވަނީ ރަޝިޔާ އިން ހެދި ވެކްސިންއާ ބެހޭ އެއްވެސް މައުލޫމާތެއް އަދި ލިބިފައި ނުވާ ކަަމަށެވެ. އެހެންވެ އެ ވެކްސިން އިވެލުއޭޓް ކުރަން ވެސް ނޭނގޭ ކަމަށް ބުނެފައިވެ އެވެ.
ޑަބްލިއުއެޗްއޯގެ ބައެއް ކަމަށްވާ ޕޭން އެމެރިކަން ހެލްތު އޮގަނައިޒޭޝަންގެ އެސިސްޓެންޓް ޑިރެކްޓަރު ޖަރްބާސް ބަރްބޯސާ ވިދާޅުވީ ވެކްސިންގެ ގިނަ ޑޯޒްތަކެއް ބްރެޒިލްގައި އުފައްދަން އުޅޭކަން އެނގިފައިވާ ކަަމަށާއި އެކަމަކު އިތުރު ޓްރަޔަލްތައް ފުރިހަމަ ނުކޮށް އެކަން ކޮށްގެން ނުވާނެ ކަމަށެވެ.
"އެއްވެސް ވެކްސިނެއް އުފައްދަން ވާނީ އެ ވެކްސިނެއްގެ ރައްކާތެރިކަން ގެރެންޓީ ކުރުމަށް ފަހު. ޑަބްލިއުއެޗްއޯގެ ރެކޮމެންޑޭޝަނަކީ އެއީ،" އޭނާ ވިދާޅުވި އެވެ.
ކޮވިޑް-19 އަށް ވެކްސިން އުފެއްދުމުގައި ބައިނަލްއަގުވާމީ ގައިޑްލައިންތަކަށް ތަބާވުމަށް ޑަބްލިއުއެޗްއޯ އިން މިދިޔަ ހަފުތާގައި ވަނީ ރަޝިޔާ އަށް އަންގައިފަ އެވެ.
ރަޝިޔާގެ ރައީސް ލަޑިމިއާ ޕުޓިން ވަނީ ކޮރޯނާވައިރަހަށް އެންމެ ފުރަތަމަ ވެކްސިނެއް އުފެއްދި ގައުމަކީ ރަޝިޔާކަން އަންގާރަ ދުވަހު އިއުލާން ކުރައްވައިފަ އެވެ. އެ ވެކްސިން ބޭނުން ކުރުމުގެ ހުއްދަ ވެސް ޕުޓިން ވަނީ ދެއްވައިފަ އެވެ.
ރަޝިޔާގައި ފުޅާ ދާއިރާއެއްގައި، ގިނަ ބަޔަކަށް އޮކްޓޯބަރު މަހު ވެކްސިން ދިނުމަށް ހަމަޖެހިފައިވާ ކަމަށް އޮފިޝަލުން ވަނީ ބުނެފަ އެވެ.
މޮސްކޯގެ ގަމަލެޔާ އިންސްޓްޓިއުޓުން އުފެއްދި ވެކްސިނަށް ދީފައިވާ ނަމަކީ ސްޕުޓްނިކް-ވީ އެވެ. ވެކްސިން އަށް ނަންދީފައި ވަނީ ދުނިޔޭގެ ފުރަތަމަ ސެޓެލައިޓުގެ ނަމާ ގުޅުވައިގެންނެވެ. ސްޕުޓްނިކް އަކީ ރަޝިޔާ ބަހުން ސެޓެލައިޓެވެ.
ސްޓޭޖް ތިނެއްގައި މިހާރުވާ ކަމަށް ޑަބްލިއުއެޗްއޯ އިން އިއުލާންކޮށްފައިވާ ހަ ވެކްސިންގެ ތެރޭގައި ރަޝިޔާގެ ވެކްސިން އަދި ނުހިމެނެ އެވެ. ދުނިޔޭގެ އެކި ކުންފުނިތަކުން މިހާރު އަންނަނީ ކޮރޯނާވައިރަހަށް 100 އަށް ވުރެ ގިނަ ވެކްސިން އުފެއްދުމުގެ މަސައްކަތް ކުރަމުންނެވެ. އޭގެ ތެރޭން ބައެއް ވެކްސިން މިހާރު ވަނީ އިންސާނުން ބޭނުންކޮށްގެން ޓެސްޓްކޮށްފަ އެވެ. ގިނަ ތަޖްރިބާކާރުން ބުނަނީ ކޮރޯނާވައިރަހަށް ރަނގަޅު ވެކްސިނެއް ލިބޭވަރު ވާނީ އަންނަ އަހަރުގެ ކުރީކޮޅު ކަމަށެވެ.