11 އޯގަސްޓް 2020 - 11:43
ޖެނީވާ (އޮގަސްޓް 11) - ކޮރޯނާވައިރަސް ކޮންޓްރޯލް ކުރެވޭނެ ކަމަށާއި އެކަމަކު ވައިރަސް ފެތުރުން ހުއްޓުވުމަށް ސަރުކާރުތަކުން ފިޔަވަޅު އަޅައިގެން ކަމަށް ދުނިޔޭގެ ސިއްހަތު ޖަމިއްޔާ، ޑަބްލިއުއެޗްއޯ އިން ބުނެފި އެވެ.
ޑިރެކްޓަރު ޖެނެރަލް ޑރ. ޓެޑްރޯސް އަދަނޮމް ގްރެޔެސުސް ވިދާޅުވީ، ކޮވިޑް-19 އަށް ވެެކްސިނެއް އަދި ލިބިފައި ނުވާއިރު ބަލި ފެތުރުން ކޮންޓްރޯލް ކުރުމަށް ކުރެވޭނެ ހަމައެކަނި ކަންކަމަކީ އެންމެ އަސާސީ ކަންތައް ކަމަށްވާ ގިނަގިނައިން އަތްދޮވުމާއި އިޖްތިމާއީ ގައިދުރުކަން ބެހެއްޓުމާއި މާސް އެޅުމާ އަދި ޓެސްޓް ކުރުމާއި ޓްރޭސް ކުރުމާއި އައިސޮލޭޓް ކުރުން ކަމަށެވެ.
"ބަލި ފެތުރުން ކޮންޓްރޯލް ކުރުމަށް ބޭނުންވާ އެންމެ އަސާސީ ކަންކަމަކީ އެއީ. ސަރުކާރުތަކުން ޔަގީން ކުރަން ޖެހޭ މުޖްތަމައުގައި ބަލި ފެތުރުން ހުއްޓުވުމަށް އެކަށީގެންވާ ފިޔަވަޅުތައް އަޅާފައިވާކަން،" ޖެނީވާގައި ވާހަކަ ދައްކަވަމުން ޓެޑްރޯސް ވިދާޅުވި އެވެ. "އަޅުގަނޑުގެ މެސެޖް ވަރަށް ސާފު. އެއީ ވައިރަސް ކޮންޓްރޯލް ކުރުން."
ކޮރޯނާވައިރަހަށް މުޅި ދުނިޔެ އިން މިހާތަނަށް ވަނީ 20,258,229 މީހުން ޕޮޒިޓިވްވެފަ އެވެ. އެ ބަލީގައި ވަނީ 738,965 މީހުން މަރުވެފަ އެވެ. އަދި ބަލިން ރަނގަޅުވެފައި ވަނީ 13,189,347 މީހުންނެވެ.