04 އޯގަސްޓް 2020 - 14:26
ރ. އުނގޫފާރު ރީޖަނަލް ހޮސްޕިޓަލުން މާލެ ގެނައި އަންހެނަކު ކޮވިޑް-19 އަށް ޕޮޒިޓިވްވުމުން، އެ ބަލި ފެތުރަ ނުދިނުމަށްޓަކައި އެ ރަށަށް އަރައިފޭބުން އެޗްޕީއޭ އިން މިއަދު މަނާކޮށްފި އެވެ.
އެ އިދާރާ އިން ބުނީ، ވަކި ގޮތެއް ނިންމަންދެން، އުނގޫފާރަށް އަރައިފޭބުން މިހާރު މަނާ ކަމަށެވެ.
އުނގޫފާރު ހޮސްޕިޓަލްގެ މެނޭޖަރު އިބްރާހިމް ޒަޔާން "މިހާރު" އަށް މިއަދު ވިދާޅުވީ، ކޮވިޑަށް ޕޮޒިޓިވްވެފައި ވަނީ ޅ. ކުރެންދޫން މިދިޔަ ބުރާސްފަތި ދުވަހު އުނގޫފާރަށް ގެންދިޔަ އުމުރުން 50 އަހަރުގެ އަންހެނެއް ކަމަށެވެ. އެ އަންހެން މީހާ އަށް ކޮވިޑް ޖެހިފައި ހުރިތޯ ބަލަން އުނގޫފާރު ހޮސްޕިޓަލްގައި ޓެސްޓުކުރި އިރު ނަތީޖާ ދެއްކީ ނެގެޓިވް ކަމަށެވެ. އެކަމަކު، އޭނާ ކޮވިޑަށް ޕޮޒިޓިވްވިކަން އެނގުނީ، އިތުރު ފަރުވާ އަށް އިއްޔެ މާލެ ގެނެސް އައިޖީއެމްއެޗުން ޓެސްޓު ހެދުމުންނެވެ. ދެވަނަ ފަހަރަށް ޓެސްޓު ކުރުމުން އެ އަންހެންމީހާގެ ނަތީޖާ ޕޮޒިޓިވްވި ކަމަށް ޒަޔާން ވިދާޅުވި އެވެ.
އަންހެން މީހާ އަށް ކޮވިޑް ޖެހިފައިވާކަން އުނގޫފާރު ހޮސްޕިޓަލަށް އެނގުނީ ރޭގަ އެވެ. ވަގުތުން ރައްކާތެރިކަމުގެ ފިޔަވަޅުތައް އަޅަން ފެށި ކަމަށް ޒަޔާން ވިދާޅުވި އެވެ.
"އޭނާ [އެ އަންހެން މީހާ] އާ ޑައިރެކްޓް ކޮންޓެކްޓް ވި އެންމެން ފާހަގަކޮށް، ހައި ރިސްކު މީހުންގެ ސާމްޕަލް ނެގުމުގެ މަސައްކަތް އަޅުގަނޑުމެން މިހާރު މި ކުރަނީ. އޭނާއާ ޑައިރެކްޓް ކޮންޓެކްޓް ވި ހޮސްޕިޓަލް މަސައްކަތްތެރިން ވެސް މިހާރު ވާނީ އެކަހެރިކޮށްފައި،" ޒަޔާން ވިދާޅުވި އެވެ.
އެކަހެރިކޮށްފައިވާ މީހުންގެ ތެރޭގައި ހަތް ޑޮކްޓަރަކާއި 25 ނަރުހަކާއި ހޮސްޕުޓަލްގެ އިތުރު މަސައްކަތްތެރިން ހިމެނެ އެވެ. އުނގޫފާރު ހޮސްޕިޓަލުގައި އާންމުކޮށް 33 ޑޮކްޓަރުންނާއި 50 އެއްހާ ނަރުހުން މަސައްކަތް ކުރާ ކަމަށް ޒަޔާން ވިދާޅުވި އެވެ. ގިނަ އަދަދެއްގެ މަސައްކަތްތެރިން އެކަހެރި ކުރަން ޖެހުމުން ހޮސްޕިޓަލް ހިންގުމުގައި ގޮންޖެހުންތަކެއް ކުރިމަތިވެފައިވާ ކަމަށް އޭނާ ވިދާޅުވި އެވެ.
މިދިޔަ ހަފުތާގައި ފާހަގަކުރި މިނިވަން ދުވަހާއި އަޟްހާ އީދު ބަންދަށް ފަހު ހޮސްޕިޓަލް އަލުން ހުޅުވިއިރު، ގިނަ އަދަދެއްގެ މީހުންނަށް އެ ތަނުން ފަރުވާ ހޯދަން ދާ ކަމަށް ވެސް ޒަޔާން ވިދާޅުވި އެވެ.
"މިކަހަލަ ދުވަހެއްގައި އާންމުކޮށް 300-400 މީހުންނަށް ހޮސްޕިޓަލުން ހިދުމަތް ދެން،" އޭނާ ވިދާޅުވި އެވެ.
ކޮވިޑުން ރައްކާތެރިވާން އެޅި ހަރުކަށި ފިޔަވަޅުތަކަށް ލުއި ދޭން ފެށުމުން މި ބަލި ފެތުރޭ މިންވަރު އިތުރުވެ، ހޮސްޕިޓަލުގައި އެޑްމިޓްކޮށްގެން ފަރުވާ ދޭން ޖެހޭ މީހުންގެ އަދަދު ވެސް ވަނީ ގިނަވެފަ އެވެ. މި ބަލި ޖެހިފައިވާ 19 މީހަކު މިހާތަނަށް ވަނީ މަރުވެފަ އެވެ.