26 ޖުލައި 2020 - 13:30
ރާއްޖޭގެ މިނިވަން ކަމަށް 55 އަހަރު މިއަދު ފުރުމާ ގުޅިގެން، ރާއްޖެ އާއި އިންޑިއާގެ ގުޅުންތައް ދައްކައިދޭ ފޮޓޯތަކަށް ރާއްޖޭގައި ހުންނަ އިންޑިއާ ހައި ކޮމިޝަންގެ ފާރު ހާއްސަކޮށްފި އެވެ.
އަމީރު އަހުމަގު މަގުގައި ހުންނަ އިންޑިއާ ހައި ކޮމިޝަންގެ ފާރުގައި ބޮޑުކޮށް ދިވެހި ދިދަ އާއި އެ ގައުމުގެ ދިދަ ވަނީ ކުރަހައިފަ އެވެ. އަދި އެ ފާރުގައި ރާއްޖެ އާއި އިންޑިއާގެ ގުޅުން ދައްކައިދޭ 17 ފޮޓޯ ވަނީ ހަރުކޮށްފަ އެވެ.
އޭގެ ތެރޭގައި ރައީސް އިބްރާހިމް މުހައްމަދު ސޯލިހާއި އިންޑިއާގެ ބޮޑުވަޒީރު ނަރެންދުރަ މޯދީ އެކުގައި ނަންގަވާފައިވާ ފޮޓޯތަކުގެ އިތުރުން އެކި ދުވަސްވަރު ދެ ގައުމުގެ ވެރިންގެ ގޮތުގައި ތިއްބެވި ބޭފުޅުން އެކުގައި ނަންގަވާފައިވާ ފޮޓޯތައް ހިމެނެ އެވެ.
އިންޑިއާ ހައި ކޮމިޝަނުން ކުރި ޓްވީޓެއް ބުނީ އެ ފޮޓޯ އެގްޒެބިޝަން ހާއްސަކޮށްފައި ވަނީ މިއަދު ފާހަގަ ކުރާ ރާއްޖޭގެ މިނިވަން ދުވަހަށް ކަމަށެވެ. އެ ސަރަހައްދަށް ގޮސް އެ ފޮޓޯތައް ބަލާލުމަށް ހައި ކޮމިޝަނުން އެދިފައިވެ އެވެ.
އަވައްޓެރި އިންޑިއާ އާއި ރާއްޖެއާ ދެމެދު ޒަމާނުންސުރެ ގާތް ގުޅުމެއް އޮވެ އެވެ. ނަމަވެސް އިންޑިއާއާ ވާދަވެރި ޗައިނާއާ އެކު ރައީސް އަބްދުﷲ ޔާމީންގެ ސަރުކާރުން ބޭއްވި ގާތްގުޅާ އެކު ރާއްޖެ އާއި އިންޑިއާގެ ގުޅުމަށް ބުރޫއެރި އެވެ. ރައީސް އިބްރާހިމް މުހައްމަދު ސޯލިހް ވެރިކަމާ ހަވާލުވެވަޑައިގެންނެވުމަށް ފަހު އަނެއްއްކާ ވެސް ދެ ގައުމުގެ ގުޅުން ވަނީ ބަދަހިވެފަ އެވެ.
އިންޑިއާއަކީ އެކި ދާއިރާތަކުން ރާއްޖެ އަށް ގިނަ އެހީތަކެއް ފޯރުކޮށްދޭ ގައުމެކެވެ. އޭގެ ތެރޭގައި ކާބޯތަކެތީގެ އިތުރުން ތައުލީމީ ދާއިރާ ވެސް ހިމެނެ އެވެ.