24 އޮކްޓޯބަރ 2016 - 05:46
ޖޯޖިއާގެ ފުރާވަރުގެ ކުއްޖަކު ފުޓްބޯޅަ ކުޅެން އުޅެނިކޮށް ބޮލަށް ލިބުނު އަނިޔާއަކަށް ފަހު ކޯމާއެއްގައި އޮންނަތާ ތިން ދުވަސް ފަހުން ތެދުވެ ސްޕެއިން ބަހުން ވާހަކަ ދައްކަން ފަށައިފި އެވެ. އެކަމަކު އެއީ އެ ކުއްޖާ ކުރިން ވާހަކަ ދެއްކި ބަހެއް ވެސް ނޫނެވެ.
އުމުރުން 16 އަހަރުގެ ރޫބެން ސެމޯގެ އާއިލާއާ ހަވާލާދީ ޑަބްލިއު.އެސް.ބީ-ޓީވީ އިން ބުނީ ކޯމާއިން ތެދުވުމަށް ފަހު ވަރަށް ފަރިތަކޮށް ސްޕެއިން ބަހުން ވާހަކަ ދެއްކި ކަމަށެވެ. އެކަމަކު އެ ބަސް މަޑުމަޑުން ހަނދާން ނެތެމުން ގޮސް، މިހާރު ވާހަކަ ދައްކަނީ ކުރިން ވެސް ވާހަކަ ދެއްކި އިނގިރޭސި ބަހުން ކަމަށް ބުނެފައިވެ އެވެ.
ޑަބްލިޔު.އެސް.ބީ އަށް ދިން އިންޓަވިއުއެއްގައި ސެމޯ ބުނެފައި ވަނީ އޭނާ ކޯމާ އަށް ފަހު ރަނގަޅުވި އިރު ސްޕެއިން ބަހުން ވާހަކަ ދެއްކީ އަމިއްލަ އިޚްތިޔާރެއް އޮވެގެން ނޫން ކަމަށެވެ. އޭނާ ގަބޫލުކުރާ ގޮތުގައި އެ ދެއްކުނު ވާހަކަތަކަކީ އާއިލާގެ ބައެއް މެންބަރުންނާއި އެކުވެރިންގެ ތެރެއިން ސްޕެއިން ބަހުން ވާހަކަ ދައްކާ މީހުންގެ ފަރާތުން ކުރިން އިވިފައި ހުރި ވާހަކަތަކެވެ.
"އަހަރެންގެ ރައްޓެހިން ސްޕެއިން ބަހުން އަހަންނާ ވާހަކަ ދައްކައި އެ ބަސް ދަސްކޮށްދޭން ވެސް އުޅޭނެ. އަހަންނަކަށް އެ ބަސް ރަނގަޅަކަށް ނޭނގެ. އެކަމަކު ބޭބެ ވަރަށް ފަރިތަކޮށް ވާހަކަ ދައްކާނެ،" ސެމޯ ބުންޏެވެ.
ސެމޯގެ ކޯޗު ބުނީ ފުޓްބޯޅަ ކުޅެނިކޮށް ސެމޯގެ ބޮލަށް އަނިޔާވީ ވަރަށް ނުރައްކާތެރި ގޮތަކަށް ކަމަށެވެ. އެކަމަކު ސެމޯ މިހާރުވެސް ހުރީ އަލުން ކުޅެން ފަށަން ބޭނުންވެފައި ކަމަށް ބުންޏެވެ. އެކަމަކު ދެން ކުޅޭނީ ބޮލަށް ރައްކާތެރިކަން ލިބޭ ހެލްމެޓެއް ފަދަ އެއްޗެއް އަޅައިގެން ކަމަށް ބުންޏެވެ.