12 ޖުލައި 2020 - 14:42
ސްޓެލްކޯގެ މުވައްޒަފުންނާއި ކަސްޓަމަރުން ކޮވިޑް-19 އިން ރައްކާތެރިކުރުމަށްޓަކައި، އެ ކުންފުނީގެ ދޮރުމަތީގައި ޑިސްއިންފެކްޝަން ގޭޓެއް މިއަދު ހަރުކޮށްފި އެވެ.
ސްޓެލްކޯގެ މީޑިއާ އޮފިޝަލަކު ވިދާޅުވީ، އެއީ އަސާސީ ހިދުމަތްތަކެއް ދޭ ކުންފުންޏަކަށް ވުމުން، މުވައްޒަފުންނާއި ކަސްޓަމަރުންގެ ރައްކާތެރިކަން ކަށަވަރު ކުރުމަކީ މުހިއްމު ކަމެއް ކަމަށެވެ.
އޭނާ ވިދާޅުވީ، ކޮވިޑް ޖެހިފައިވާ މީހުން ރާއްޖެ އިން ފެންނަން ފެށުމާއެކު، ޑިސްއިންފެކްޝަން ގޭޓަށް އޯޑަރުކުރި ކަމަށެވެ. ގޭޓު އެތުރުމުގެ މަސައްކަތް ކުރިއަށް ގެންދިޔައީ ސްޓެލްކޯގެ މުވައްޒަފުން ކަމަށެވެ.
"މިދިޔަ އޭޕްރިލް މަހު ހިސާބު އަޅުގަނޑުމެން މި ގޭޓް އޯޑަރު ކޮށްފިން،" އޮފިޝަލް ވިދާޅުވި އެވެ.
ސެނިޓައިޒަރަކާއި ތާމަލް ކެމެރާއެއް ހަރުކޮށްފައި ހުންނަ މި ގޭޓުން ހުރަސްކުރާ ކޮންމެ މީހެއްގެ އަތް ސެނިޓައިޒް ކުރެވޭނެ އެވެ. ހުމުގެ އަލާމާތެއް ހުރި ނަމަ ތާމަލް ކެމެރާ އިން އެކަން ދެނެގަނެވޭނެ އެވެ. ގޭޓުގެ ޕްލަޓްފޯމަށް މީހާ އެރުމުން، ޑިސްއިންފެކްޓް ކުރަން ހާއްސަ ފޮގް ޖަހާނެ ކަމަސް ސްޓެލްކޯ އިން ބުންޏެވެ.
ޑިސްއިންފެކްޓް ކުރުމުގައި އެތަނުގެ މުވައްޒަފުން އެހީތެރިވާނެ ކަމަށް ވެސް އޮފިޝަލް ވިދާޅުވި އެވެ.
ކޮވިޑް-19 ޖެހިފައިވާ މީހަކު މިދިޔަ އޭޕްރިލް މަހު މާލެއިން ފެނުމުން، ރައްކާތެރިކަމުގެ ފިޔަވަޅެއްގެ ގޮތުން މާލެ ސަރަހައްދު ބަންދުކުރި އެވެ. ނަމަވެސް ހާލަތު ރަނގަޅުވަމުން އަންނަ ގޮތަށް ރިއާޔަތްކޮށް، މި މަހުގެ ފުރަތަމަ ދުވަހު ވަނީ ސަރުކާރު އޮފީސްތަކާއި ސްކޫލްތަކާއި ކެފޭ އާއި ރެސްޓޯރަންޓް ފަދަ ތަންތަން އާންމުންނަށް އަލުން ހުޅުވާލައިފަ އެވެ.