04 ޖުލައި 2020 - 13:17
ނިއު ދިއްލީ (ޖުލައި 4) - އިންޑިއާގަައި ވޭތުވެދިޔަ 24 ގަޑިއިރު ތެރޭ 22،772 މީހުން ކޮރޯނާވައިރަހަށް ޕޮޒިޓިވްވެ 442 މީހުން މަރުވެއްޖެ އެވެ.
އިންޑީއާގެ ހެލްތު މިނިސްޓްރީން ބުނީ މިއީ އެއް ދުވަސްތެރޭ ޕޮޒިޓިވްވި މީހުންގެ ރެކޯޑް އަދަދެއް ކަމަށެވެ.
އިންޑިއާ އިން މިހާތަނަށް ވަނީ ކޮރޯނާވައިރަހަށް 649,889 މީހުން ޕޮޒިޓިވްވެ 18,669 މީހުން މަރުވެފަ އެވެ. އިންޑިއާ އިން ބަލިން ރަނގަޅުވެފައި ވަނީ 394,319 މީހުންނެވެ.
އެންމެ ހާލަތު ގޯހީ މަހާރާޝްތުރާ ސްޓޭޓުގަ އެވެ. އެ ސްޓޭޓުން ވަނީ 192،990 މީހުން ޕޮޒިޓިްވްވެ 8،376 މީހުން މަރުވެފަ އެވެ. ހުކުރު ދުވަހު އެކަނިވެސް ވަނީ 198 މީހުން މަރުވެފަ އެވެ. ދެ ވަނަ އަށް އެންމެ ހާލަތު ގޯސް ޓަމިލް ނާޑޫ ސްޓޭޓުން އިއްޔެ ޕޮޒިޓިވްވި 4،329 މީހުންނާ އެކު ލައްކަ އަކަށް ވުރެ ގިނަ މީހުން ވަނީ އެ ސްޓޭޓުން ޕޮޒިޓިވްވެފަ އެވެ. އެ ސްޓޭޓުން ވަނީ 1،385 މީހުން މަރުވެފަ އެވެ.
ކަރްނާޓަކާ ސްޓޭޓުން ހުކުރު ދުވަހު ވަނީ 1،694 މީހުން ޕޮޒިޓިވްވެފަ އެވެ. އެ ސްޓޭޓުން ޕޮޒިޓިވްވި މީހުންގެ އަދަދަކީ 19،710 އެވެ. ކަރްނާޓަކާ އިން ވަނީ 293 މީހުން މަރުވެފަ އެވެ.
ވެރިރަށް ނިއު ދިއްލީން މިހާތަނަށް ޕޮޒިޓިވްވި މީހުންގެ އަދަދު ވަނީ 94،000 އަށް އަރައިފަ އެވެ. ދިއްލީން ވަނީ 2،923 މީހުން މަރުވެފަ އެވެ.