20 އޮކްޓޯބަރ 2016 - 13:27
އަންގާރަ ދުވަހުގެ ރޭ ރިލީޒް ކުރި ކްރިސްޓަލް އެންޓަޓައިންމަންޓްގެ ބިރުވެރި ފިލްމް 4426 (ފޯފޯޓޫސިކްސް) އޮލިމްޕަހުގައި ދައްކަން ކުރިން ލިބުނު 14 ޝޯގެ އިތުރަށް މަދުވެގެން އިތުރަށް 15 ޝޯ ދައްކަން އޮލިމްޕަސް ލިބިފައިވާ ކަމަށް ޑައިރެކްޓަރު/ޕްރޮޑިއުސަރު ފާތުމަތު ނަހުލާ މިއަދު ބުނެފި އެވެ.
އޭނާ ބުނީ ފުރަތަމަ 14 ޝޯ މިހާރު ފުލްވެފައިވާ ކަމަށާއި ކުރިއަށް ހުރި ޝޯތަކުގެ ޓިކެޓް މިއަދުން ފެށިގެން އޮލިމްޕަހުން ގަންނަން ލިބޭނެ ކަމަށެވެ.
"އެހެންވެ ވީހާ ވެސް އަވަހަކަށް ޓިކެޓް ނަގަން ފިލްމް ބަލަން ބޭނުންވާ މީހުންގެ ފަރާތުން އެދެން. އެހެން ނޫނީ އަނެއްކާ ވެސް ޓިކެޓް ލިބުމުގައި ދަތިތަކެއް ދިމާވެދާނެ،" ނަހުލާ ބުންޏެވެ. "އޮލިމްޕަސް އިތުރަށް ލިބުމަކީ މި ފިލްމް ދެތިން ފަހަރަށް ބަލާލުމުގެ ޝައުގުވެރިކަން ވެސް އޮތް މީހުންނަށް ލިބުނު ވަރަށް ރަނގަޅު ފުރުސަތަކަށް ވެގެން ދާނީ. އެހެންވެ ވީހާ ވެސް އަވަހަކަށް މީގެ ބޭނުން ހިފާށޭ ބުނާނީ. ބޭނުމަކީ ވީހާ ވެސް ގިނަ ބަޔަކަށް ފިލްމް ދައްކާލުން."
އޭނާ ބުނީ މިހާރު މަދުވެގެން އިތުރު 15 ޝޯ ދައްކަން އޮލިމްޕަސް ލިބިފައިވާތީ، ޝޯތައް އަދިވެސް އިތުރު ކުރަން އޮލިމްޕަސް ލިބޭތޯ މަސައްކަތް ކުރާނެ ކަމަށެވެ.
"ބޭނުން ވަނީ އަހަރެން އެންމެ ފަހުން ގެނެސް ދިން ޔޫސުފްގެ ރެކޯޑް މުގުރާލުން. އެ ފިލްމުގެ ފަންސާސް ޝޯ އޮލިމްޕަހުގައި ދެއްކި،" ނަހުލާ ބުންޏެވެ. "އެހެންވެ އެ ޓާގެޓް ފަހަނައަޅައި ދިއުން މި ފަހަރުގެ އަމާޒަކީ."
ނަހުލާ އާއި އަހުމަދު ޝިނާން ގުޅިގެން ޑައިރެކްޓްކޮށްފައިވާ ފިލްމަށް ވަރަށް ގިނަ ބަޔަކު އަންނަނީ ތައުރީފު ކުރަމުންނެވެ.
ފިލްމުގެ ބެލި ބައެއް މީހުންގެ ކޮމެންޓްތަކަށް ބަލާ އިރު "4426" އަކީ ވަރަށް މޮޅު އަދި ބުރަ މަސައްކަތްތަކެއްކޮށްފައިވާ ފިލްމެކެވެ.
މީގެ އިތުރުން ފިލްމުގެ ކާސްޓުންގެ ފަރާތުން ވަރަށް މޮޅު އެކްޓިންއެއް ދައްކުވައި ދީފައިވެ އެވެ.
ހާއްސަކޮށް ފިލްމުގައި ޒުވާން ބަތަލާ މަރިޔަމް އައްޒަ ދައްކުވައި ދީފައިވާ އެކްޓިން ގިނަ ބަޔަކު ފާހަގަކޮށްފައިވެ އެވެ.
އޭނާގެ އިތުރުން ފިލްމުގެ މުހިއްމު ރޯލްތަކުން ޔޫސުފް ޝަފީއު (ޔޫއްޕެ)، ޝީލާ ނަޖީބް، ޖުމައްޔިލް ނިމާލް (ޖުމަލް)، އިބްރާހީމް ޖިހާދު (ޖިމީ) އަދި އިސްމާއީލް ޖުމައިހް (ޖުމާ) ފަދަ ތަރިން ފެނިގެން ދެ އެވެ.
ނަހުލާ ބުނީ "4426" އަންނަ މަހުގެ ފުރަތަމަ ހަފުތާ ތެރޭގައި އަތޮޅު ތެރޭގައި ވެސް ދައްކަން ފަށާނެ ކަމަށެވެ. މީގެ އިތުރުން ބައެއް ރިސޯޓްތަކުގައި ވެސް ފިލްމް އަޅުވަން ވަނީ ނިންމައިފަ އެވެ.