25 ޖޫން 2020 - 10:46
މެލްބަން (ޖޫން 25) - ކޮރޯނާވައިރަހުގެ ކޭސްތައް އިތުރުވެ ދެ ވަނަ ރާޅެއްގެ ބިރު ބޮޑުވެދާނެތީ، ވައިރަސް ކޮންޓްރޯލް ކުރުމަށް އެހީތެރިވެދިނުމުގެ ގޮތުން އޮސްޓްރޭލިއާ ސިފައިން މެލްބަން އަށް ފޮނުވަން ނިންމައިފި އެވެ.
ވޭތުވެދިޔަ ހަފުތާއެއްހާ ދުވަހު ތެރޭ ވިކްޓޯރިއާ ސްޓޭޓުގައި ކޮރޯނާވައިރަހަށް ޕޮޒިޓިވްވާ މީހުންގެ އަދަދު ވަނީ އިތުރުވާން ފަށައިފަ އެވެ. މެލްބަން އިން ފެންނަން ފެށި އާ ކްލަސްޓާތަކާ އެކު ހަފުތާއެއްހާ ދުވަހު ތެރޭ ވަނީ 150 މީހުން ޕޮޒިޓިވްވެފަ އެވެ. ބުރާސްފަތި ދުވަހު އެކަނިވެސް ވަނީ ޕޮޒިޓިވް 37 ކޭސް ފެނިފަ އެވެ. މިއީ އެޕްރީލް މަހު މެދުތެރޭން ފެށިގެން އެއް ދުވަސްތެރޭ އެންމެ ގިނައިން ޕޮޒިޓިވް ކޭސް ފެނުނު ދުވަހެވެ.
އޮސްޓްރޭލިއާ އިން އާ ކޭސްތައް ފެންނަން ފެށިއިރު އެ ގައުމުން ވަނީ ވައިރަސް ވަރަށް ބޮޑަށް ކޮންޓްރޯލްކޮށް ފިޔަވަޅުތަކަށް ލުއިދޭން ފަށައިފަ އެވެ.
ޑިފެންސް މިނިސްޓަރު ލިންޑާ ރޭނޯލްޑްސް މިއަދު ވިދާޅުވީ ކުރިއަށް އޮތް ދުވަސްތަކުގައި 1،000 ސިފައިން ވިކްޓޯރިއާ އަށް ފޮނުވާނެ ކަމަށެވެ. ވިކްޓޯރިއާ އަށް ޒިޔާރަތް ކުރާ ބައިނަލްއަގުވާމީ ދަތުރުވެރިން ކަރަންޓީނު ކުރުމުގައި އޮސްޓްރޭލިއާގެ ޑިފެންސް ފޯސްގެ 850 މީހުން އެހީތެރިވާނެ އެވެ. ކޮވިޑް-19 އަށް ޓެސްޓްކުރުމާއި މެޑިކަލް ސަޕޯޓް އަދި ލޮޖިސްޓިކް ކަންކަމުގައި 200 ސިފައިން އެހީތެރިވާނެ އެވެ. މީގެ އިތުރުން ވިކްޓޯރިއާ ސްޓޭޓުގެ ބޯޑަރު ބެލެހެއްޓުމުގައި ވެސް ސިފައިން އެހީތެރިވެދޭނެ އެވެ.
ވިކްޓޯރިއާ ސްޓޭޓުން ބުނީ ގޭބިސީތަކަށް ޒިޔާރަތްކޮށް ޓެސްޓް ކުރުމުގައި 1،000 ސިއްހީ އޮފިޝަލުން ހަރަކާތްތެރިވާނެ ކަމަށެވެ. އަދި ކުރިއަށް އޮތް 10 ދުވަސްތެރޭ 100،000 ޓެސްޓް ކުރެވޭނެ ކަމަށް އެ ސްޓޭޓުން ބުނެ އެވެ.
އާބާދީގައި 15 މިލިއަން މީހުން ހިމެނޭ އޮސްޓްރޭލިއާ އިން ޕޮޒިޓިވްވެފައި ވަނީ 7,558 މީހުންނެވެ. އެ ގައުމުން މަރުވެފައި ވަނީ 104 މީހުންނެވެ.