22 ޖޫން 2020 - 14:44
ކޮވިޑް-19 ފްރީ ޒޯންތަކެއް ކަނޑައަޅައި، އިގްތިސާދީ ހަރަކާތްތަކަށް ހުޅުވާލަން ގޮވާލައި ރައްޔިތުންގެ މަޖިލީހަށް ހުށަހެޅި ގަރާރު މަޖިލީހަށް ބަލައިގެންފި އެވެ.
ހިތަދޫ މެދު ދާއިރާގެ މެމްބަރު އަހުމަދު ރަޝީދު ހުށަހެޅުއްވި ގަރާރުގައި އެދިފައި ވަނީ އިގްތިސާދީ ހަރަކާތްތަކަށް ޚާއްސަ ސަރަހައްދުތަކެއް ކަނޑައަޅައި، ވަކި އުސޫލުތަކެއްގެ ތެރެއިން އިގްތިސާދީ ހަރަކާތްތައް ފެށުމަށެވެ.
އެ ގަރާރު މަޖިލީހަށް ބަލައިގަތުމަށް މިއަދުގެ ޖަލްސާގައި 62 މެމްބަރުންގެ ވޯޓުން ވަނީ ފާސްކޮށްފަ އެވެ. އެހެންވެ، އެ ގަރާރު ދިރާސާ ކުރުމަށްޓަކައި އިގްތިސާދީ ކޮމެޓީ އަށް ވަނީ ފޮނުވައިފަ އެވެ.
އެ ގަރާރަށް ބަހުސް ކުރައްވަމުން ގިނަ މެމްބަރުން ވަނީ އިގްތިސާދު ހުޅުވުމުގެ މުހިންމު ކަން ފާހަގަ ކުރައްވައި، އެ ގަރާރަށް ތާއީދު ކުރައްވައިފަ އެވެ. އަދި އެހެން ގައުމުތަކުގައި އަމަލު ކުރާ އުސޫލުން ވަކި ސަރަހައްދުތަކެއް ކަނޑައެޅުމުގެ މުހިންމު ކަން މެމްބަރުން ފާހަގަ ކުރެއްވި އެވެ. އަދި މާލެ ސަރަހައްދު ލޮކްޑައުން ކުރުމުން މުޅި ރާއްޖޭގެ އިގްތިސާދަށް ގެއްލުންވީ ހުރިހާ ކަމެއް މަރުކަޒީ އުސޫލަކުން ކަންކަން ކުރަމުންދާތީ ކަމަށް މެމްބަރުން ވިދާޅުވި އެވެ.
ކުޅުދުއްފުށީ އުތުރު ދާއިރާގެ މެމްބަރު ޔާސިރު އަބްދުއްލަތީފް ވިދާޅުވީ ޒަމާނުއްސުރެ ފެށިގެން މާލެ އަންނަން ހުރިހާ ރައްޔިތުންނަށް މަޖުބޫރު ކުރަމުން ދިއުމުގެ ސަބަބުން އިގްތިސާދީ ހުރިހާ ހަރަކާތްތަކެއް އޮތީ މާލެ ސަރަހައްދަށް ޖަމާވެފައި ކަމަށެވެ. އަދި އުތުރާއި ދެކުނުގައި ހުރި ސަރަހައްދީ ދެ ބަނދަރު ކުރިއަރުވަން މަސައްކަތްކުރީ އެމްޑީޕީގެ ކުރީގެ ވެރިކަމުގައި އެކަނި ކަމަށް އޭނާ ވިދާޅުވި އެވެ.
"މިސާލަށް އެސްޓީއޯއިން މި ފޯރުކޮށްދޭ ޚިދުމަތްތައް ރާއްޖޭގެ އެކި ސަރަހައްދުތަކުގައި ނެތީ ކީއްވެގެންތޯ؟. ތެޔޮ ހަމައެކަނި ރައްކާ ކުރަން ޖެހެނީ މި ކައިރީގައި މި އޮތް ފޮނަދޫގައި ތޯ؟. އެހެން ސަރަހައްދެއް ނެތީތޯ ތެޔޮ ރައްކާކުރާނެ." ޔާސިރު ވިދާޅުވި އެވެ.
އޭނާ ވިދާޅުވީ އަލުން ރިސޯޓްތައް ހުޅުވާލާއިރު، އެތަންތަނުގައި ދިވެހި މުވައްޒަފުން ތިބެންޖެހޭ މިންވަރަށް ދިވެހިން ތިބިތޯ ކަށަވަރު ކުރަންޖެހޭ ކަމަށާއި އެއީ ސަރުކާރުން ބަލަންޖެހޭ ކަންކަން ކަމަށެވެ.
ފޭދޫ ދާއިރާގެ މެމްބަރު މުހައްމަދު ނިހާދު ވިދާޅުވީ ސްޕެޝަލް އިކޮނޮމިކް ޒޯން (އެސްއީޒެޑް) އެއްގެ ގޮތުގައި އައްޑު އާއި އުތުރުގެ ސަރަހައްދެއް ޚާއްސަ ކުރަންޖެހޭ ކަމަށާއި ބޭރުގެ ގައުމުތަކާ އެކު ވިޔަފާރީގެ ގުޅުން ބޭއްވުމުގެ ފުރުސަތު އެ ސަރަހައްދަށް ލިބެންޖެހޭ ކަމަށެވެ. އަދި މާލެ ނޫން އެހެން ސަރަހައްދުތަކަށް ޓޫރިޒަމް ގެންދެވޭނީ ސަރުކާރުން ލުއިތަކެއް ދީގެން ކަމަށާއި ހުރިހާ ކަމެއް މަރުކަޒީ އުސޫލުގެ ތެރެއިން ކަންކަން ކުރުމުގެ ވިސްނުން ދޫކޮޮށްލަން ޖެހޭ ކަމަށް އޭނާ ވިދާޅުވި އެވެ.
"ޖަޒީރާ މެނިފެސްޓޯގައި އެބައޮތް ގޭގައި ހުންނަ ކޮޓަރި ވިއްކޭނެ އިންތިޒާމް ހަމަޖައްސާނެ ވާހަކަ. ހައުސް ސްޓޭ ތައާރަފް ކުރާނެ ވާހަކަ. މިއީ ވެސް ކުޑަކުޑަ ގަވާއިދެއްގެ ދަށުން ކުރެވިދާނެ ކަމެއްގެ ވާހަކަ،" ނިހާދު ވިދާޅުވި އެވެ.
ވިލިނގިލީ ދާއިރާގެ މެމްބަރު ސައުދު ހުސައިން ވިދާޅުވީ އިންޑިއާ ކަނޑުގެ ދެވަނަ ދުބާއީއަކަށް ރާއްޖެ ހެދޭނީ އިގްތިސާދީ ބާރުވެރިކަން އަތޮޅު ތެރެއަށް ދީގެން ކަމަށެވެ. ލާ މަރުކަޒުކޮށް، އަތޮޅު ތެރެއަށް ބާރުތައް ދިނުމަށް އަބަދުވެސް ދެކެވޭ ވާހަކަތަކެއް ކަމަށާއި އަމަލީ ސިފައެއް އެއްވެސް ކަމަކަށް ގެނެވިފައި ނެތް ކަމަށް އޭނާ ވިދާޅުވި އެވެ.
"މި ފުއްޕާހަން ފުއްޕަމުން ފުއްޕަމުން ގޮސް ފަޅައިގެން ދަންދެން ފުއްޕަން ވީހޭ،" ސައުދު ސުވާލު ކުރެއްވި އެވެ.
މީގެ އިތުރުން އިގްތިސާދީ ހަރަކާތްތައް އަލުން ފަށާއިރު ދިވެހި މުވައްޒަފުންނަށް ވަޒީފާގެ ފުރުސަތުތައް އިތުރަށް ލިބޭ ގޮތްތައް ހަމަޖައްސަން ވެސް މެމްބަރުން ގޮވާލެއްވި އެވެ.