20 އޮކްޓޯބަރ 2016 - 00:47
ކުރީގެ ޑިފެންސް މިނިސްޓަރު މުހައްމަދު ނާޒިމަކީ ކުށެއް ނެތް މީހެއްކަން އެނގި ތިބެ ދިގު މުއްދަތުގެ ޖަލު ހުކުމެއް އިއްވައި އިންސާފު ހޯދެން ހުރި ހުރިހާ ދޮރުތަކެއް ވެސް ބަންދުކޮށް، ތަޅު އަޅުވާފައިވާ ކަމަށް ބުނެ އާއިލާ އާއި ވަކީލުންގެ ޓީމުން މިއަދު ކަންބޮޑުވުން ފާޅުކޮށްފި އެވެ.
ނާޒިމާ މެދު ސަރުކާރުން އަނިޔާވެރިވަމުންދާ ކަމަށް ބުނެ ކަންބޮޑުވުން ފާޅުކުރީ އޭނާ މިނިވަންކުރަން ގޮވާލާ ފަށާފައިވާ ކެމްޕޭންގެ ދަށުން ސްރީ ލަންކާގައި ބޭއްވި ނޫސްވެރިންގެ ބައްދަލުވުމެއްގަ އެވެ. އެ ބައްދަލުވުމުގައި ކުރީގެ ބަންޑާރަ ނައިބު ހުސްނުއްސުއޫދާއި ކުރީގެ ޕޮލިސް ކޮމިޝަރު އަބްދުﷲ ރިޔާޒާއި ނާޒިމްގެ ކޮއްކޮ، އެސްޓީއޯގެ ކުރީގެ މެނޭޖިން ޑިރެކްޓަރު އާދަމް އާޒިމާއި ގާނޫނީ ވަކީލް އަދި ކެންދޫ ދާއިރާގެ މެމްބަރު އަލީ ހުސެންގެ އިތުރުން އިންސާނީ ހައްގުތަކަށް މަސައްކަތް ކުރާ ބޭރުގެ ތަޖުރިބާކާރެއް ކަމަށްވާ އައްބާސް ފާއިޒު ވެސް ބައިވެރިވެވަޑައިގެންނެވި އެވެ.
ނާޒިމް މިނިވަންކުރަން ލަންކާގައި ކުރިއަށް ގެންދާ ހަރަކާތްތަކާ ގުޅޭ ގޮތުން ރިޔާޒު "މިހާރު" އަށް ވިދާޅުވީ ބޭރުގެ ގިނަ މީޑިއާތަކުން ބައިވެރިވި ޕްރެސް ކޮންފަރެންސްގައި، ނާޒިމަށް ހުކުމް ކުރީ، އޭނާގެ މައްޗަށް ތުހުމަތުކުރި ފިސްތޯލައިގެ ހަގީގަތް ހޯދިފައި ވަނިކޮށް އެކަން ކަމަށް ރިއާޔަތް ނުކޮށްކަން ސާފުކޮށްދީފައި ވާނެ ކަމަށެވެ. އަދި އޭގެ ފަހުން ވެސް ދައުލަތުގެ އެއްވެސް މުއައްސަސާއަކުން ނާޒިމަށް އިންސާފު ނުލިބުނުކަން ވެސް ހާމަކޮށްފައި ވާނެ ކަމަށް ރިޔާޒް ވިދާޅުވި އެވެ.
"ފިސްތޯލަ އެއީ ކާކުގެ އެއްޗެއް ކަމާއި އެ ތަނުގައި ބޭއްވީ ކާކުކަން ހުށަހެޅީމަ ވެސް ނާޒިމަށް ހުކުމްކޮށްފައި ވާކަން ސާފުކޮށްދެމުން އަޅުގަނޑުމެން މި އަންނަނީ،" އޭނާ ވިދާޅުވި އެވެ.
ރިޔާޒު ވިދާޅުވި ގޮތުގައި ނާޒިމަށް ދިގު މުއްދަތުގެ ޖަލު ހުކުމެއް އިއްވީ ކުޑަ ދުވަސްކޮޅެއްގެ ތެރޭގައި ރައްޔިތުންގެ މަގުބޫލުކަން ލިބުމާ ގުޅިގެންނެވެ. ރައީސް އަބްދުﷲ ޔާމީން ކަންބޮޑުވެވަޑައިގެންނެވީ ނާޒިމް ރިޔާސީ އިންތިހާބުގައި ވާދަކުރައްވައި ކާމިޔާބީ ހޯއްދަވާފާނެތީ ކަމަށް ވެސް ރިޔާޒް ވިދާޅުވި އެވެ.
"އަޅުގަނޑުމެން ބައިނަލްއަގުވާމީ ފަރާތްތަކުގައި ވެސް މި ދަންނަވަނީ ނާޒިމަކީ ކުށެއް ނެތް މީހެކޭ، އޭނާ ވަގުތުން މިނިވަންކުރަން ޖެހެޔޭ،" އޭނާ ވިދާޅުވި އެވެ.
ނާޒިމް ދިރިއުޅުއްވާ އެޕާޓްމެންޓުން ފިސްތޯލައެއް ފެނުނު މައްސަލަ ސާބިތުވެ 11 އަހަރުގެ ހުކުމެއް އިއްވިތާ އަހަރެއްހާ ދުވަސް ފަހުން، އެ ބަޑިން ކުރީގެ ނައިބު ރައީސް އަހުމަދު އަދީބުގެ ޑީއެންއޭ ފެނުނުކަން ފުލުހުން ވަނީ ޔަގީންކޮށް ދީފަ އެވެ. އެއީ ތަހުގީގުކުރަން ޖެހޭ ކަމެއް ކަމަށް ނާޒިމްގެ ވަކީލުން ވިދާޅުވަމުން ގެންދެވި ނަމަވެސް އެ މައްސަލަ ތަހުގީގު ކުރާ ކަމެއް ނުވަތަ ނޫން ކަމެއް ފުލުހުން ނުބުނެ އެވެ.
ނާޒިމަށް ތުހުމަތުކުރި މައްސަލައިގައި އެންމެ ފުރަތަމަ ދުވަހުން ފެށިގެން ވެސް އަދީބަށް ތުހުމަތުތަކެއް ކުރެވުނުއިރު، އެ ތުހުމަތުތައް އެއްވެސް މުއައްސަސާއަކުން ބަލާފައި ނުވާ ކަމަށް ނާޒިމްގެ ވަކީލުން ވިދާޅުވެ އެވެ.
ނާޒިމްގެ އިސްތިއުނާފު ބަލައިގަތުމާ މެދު ސުޕްރީމް ކޯޓުން ގޮތެއް ނިންމުމުގެ މަރުހަލާ ކުރިއަށް ދަނިކޮށް އަދީބުގެ ޑީއެންއޭ ފެނުނުކަން ފުލުހުން ކަށަވަރުކޮށްދިނުމުން ނާޒިމްގެ ހުކުމް ބާތިލްކޮށްފާނެ ކަމަށް ގިނަ ބަޔަކު ގަބޫލުކުރި އެވެ. އެކަމަކު ސުޕްރީމް ކޯޓުން ނިންމީ ހައި ކޯޓުގެ ހުކުމް ރަނގަޅު ކަމަށާއި އެ މައްސަލަ ބަލާނެ ޖާގަ ނެތް ކަމަށެވެ. އެކަމަކު، އެ ހުކުމުގެ ސައްހަކަމާ މެދު ނާޒީމްގެ ގާނޫނީ ވަކީލުން ގެންދަވަނީ ސުވާލު އުފައްދަވަމުންނެވެ.
ސުޕްރީމް ކޯޓަކީ އިސްތިއުނާފްގެ އެންމެ ފަހު މަރުހަލާ ކަމަށް ވުމުން ނާޒިމްގެ ހުކުމަށް މިހާރު އެ އޮތީ ގާނޫނީ ބާރު ލިބިފަ އެވެ. އެ އަދަބުން ނާޒިމަށް ދެން ސަލާމަތްވެވޭނީ މާފު ދިނުމާއި އަދަބު ލުއިކޮށް ދިނުމުގެ ގާނޫނުގެ ދަށުން އޭނާ އަށް ރައީސް އަބްދުﷲ ޔާމީން މާފު ދެއްވުމުން ނުވަތަ އަދަބު ލުއިކޮށް ދެއްވުމުންނެވެ.