17 ޖޫން 2020 - 16:34
ވޮޝިންޓަން (ޖޫން 17) - އެމެރިކާގެ ކުރީގެ ނޭޝަނަލް ސެކިއުރިޓީ އެޑްވައިޒަރު ޖޯން ބޯލްޓަން ވައިޓް ހައުސްގައި ހޭދަކުރެއްވި މުއްދަތުގައި ކަންކަން ހިނގާފައިވާ ގޮތުގެ މައްޗަށް އޭނާ ލިޔުއްވި ފޮތް ނެރުން ހުއްޓުވަން ޖަސްޓިސް ޑުޕާޓްމަންޓުން ކޯޓަށް ހިނގައްޖެ އެވެ.
ކޯޓަށް ހުށަހެޅި މައްސަލައިގައިވާ ގޮތުން ބޯލްޓަންގެ ފޮތުގައި ވަނީ "ސިއްރު މައުލޫމާތުތައް" ހިމަނައިފަ އެވެ.
ފޮތް ނެރުން ހުއްޓުވުމުގެ މަސައްކަތް ފަށާފައި މި ވަނީ އެ ފޮތް ނެރެފި ނަމަ ބޯލްޓަން އަށް ޖިނާއީ މައްސަލަތަކަކާ ކުރިމަތިލާން ޖެހިދާނެ ކަމަށް ރައީސް ޑޮނަލްޑް ޓަރްމަޕް އިންޒާރު ދެއްވައިފައި ވަނިކޮށެވެ.
"ރައީސްގެ ހައިސިއްޔަތުން އަޅުގަނޑާ ދައްކާ ކޮންމެ ވާހަކައެއް ވާނީ ސިއްރު މައުލޫމާތަކަށް ކަމަށް އަޅުގަނޑު ގަބޫލް ކުރަނީ،" ނޫސްވެރިންނާ ވާހަކަ ދައްކަވަމުން ޓްރަމްޕް ވިދާޅުވި އެވެ. "އެހެންވެ އޭގެ މާނައަކީ ބޯލްޓަން ލިޔެފައިވާ އޮތް ނެރެފި ނަމަ އެއީ ގާނޫނާ ޚިލާފަށް ކޮށްފައިވާ ކަމެއްކަން. ބޯލްޓަން އަށް ޖިނާއީ މައްސަލަތަކާ ކުރިމަތިވާނެ."
"ދަ ރޫމް ވެއާ އިޓް ހެޕަންޑް" ގެ ނަމުގައި ބޯލްޓަން ލިޔެފައިވާ ފޮތް ނެރެން ހަމަޖެހިފައި ވަނީ މި މަހު 23 ގަ އެވެ.
ފޮތުގައި ވަރަށް ބޮޑެތި ސިއްރުތަކާ ބެހޭ މައުލޫތު ހިމެނޭ ކަމަށް ބުނެ އެ މައުލޫމާތު އުނި ކުރުމަށް ވައިޓް ހައުސް އިން ވަނީ ޖެނުއަރީ މަހު އަންގައިފަ އެވެ. ނަމަވެސް ބޯލްޓަން ވަނީ އެކަމަށް ދެކޮޅު ހައްދަވައިފަ އެވެ.
ބޯލްޓަން ވައިޓް ހައުސްގެ މަގާމަށް ވަޑައިގެންނެވީ އެޕްރީލް 2018 ގަ އެވެ. މަގާމުން ވަކިވެވަޑައިގެންނެވީ ޖެހިގެން އައި އަހަރުގެ ސެޕްޓެމްބަރު މަހު އެވެ. ނޭޝަނަލް ސެކިއުރިޓީ އެޑްވައިޒަރުގެ މަގާމުން އިސްތިއުފާ ދެއްވީ ކަމަށް ބޯލްޓަން ވިދާޅުވި ނަމަވެސް ޓްރަމްޕް ވިދާޅުވެފައި ވަނީ ޚިޔާލު ތަފާތުވެގެން އޭނާ މަގާމުން ދުރުކުރީ ކަމަށެވެ.