17 ޖޫން 2020 - 07:34
އެކައުންޓް ހުޅުވާފައިވާ ބޭންކް ޕަންޖާބް އެންޑް މަހާރަޝްތުރާ (ޕީއެމްސީ) ބޭންކް ބަނގުރޫޓުވެ މިދިޔަ އަހަރު ބަންދުކުރުމުން ހާލުގައި ޖެހިފައިވާ ޓީވީ ބަތަލާ ނުޕޫރް އަލަންކާރަށް ބޮލީވުޑްގެ އެކްޓަރު އަކްޝޭ ކުމާރު އެހީވެއްޖެ އެވެ.
އޭނާ ވެދިން އެހީގެ ތަފުސީލުތައް ހާމަނުކުރި ނަމަވެސް، "ހަމް އާޕް ކޭ ހޭ ކޯން" ފަދަ ފިލްމުތަކުން ފެނިފައިވާ ބަތަލާ ރެނޫކާ ސަހާނޭ ވަނީ އަކްޝޭގެ އިތުރުން ނުޕޫރަށް އެހީވެދިން ހުރިހާ އެންމެންނަށް ސޯޝަލް މީޑިއާގައި ޝުކުރު އަދާކޮށްފަ އެވެ.
ނުޕޫރްގެ ހާލަތު އެންމެ ފުރަތަމަ މި މަހުގެ 9 ވަނަ ދުވަހު ފޭސްބުކްގައި ވެސް ކިޔައިދިނީ ވެސް ރެނޫކާ އެވެ.
އޭގައި އޭނާ ފާހަގަކޮށްފައިވާ ގޮތުގައި މާލީ ގޮތުން ލިބުނު ގެއްލުމާ އެކު ރެނޫކާ އަށް ވަރަށް ބޮޑަށް ދަތިވެފައިވެ އެވެ. އަދި އޭނާގެ ބަލި މަންމަ ހޮސްޕިޓަލްގައި އެޑްމިޓްކޮށްގެން ފަރުވާދޭން ޖެހޭ ހާލަތެއްގައި އޮތް ނަމަވެސް އަތްމަތި ދަތިކަމުން އެކަން ނުވެފައި ހުރި ކަމަށް ބުނެފައިވެ އެވެ. އެހެންވެ ވީހާ ވެސް ގިނަ ބަޔަކު ނުޕޫރަށް އެހީވާން ރެނޫކާ އެދުނެވެ.
މި ޕޯސްޓް އަކްޝޭ އަށް ފެނިގެން އޭނާ ވަނީ އެކަމާ ބެހޭ އިތުރު މައުލޫމާތު ހޯދުމަށް ފަހު، ނުޕޫރަށް ފައިސާގެ އެހީ ދީފަ އެެވެ. އަކްޝޭގެ ފަރާތުން ލިބުނު އެހީ ފާހަގަކޮށް ރެނޫކާ ވަނީ ސޯޝަލް މީޑިއާގައި އަކްޝޭ އަކީ ދީލަތިކަމުގެ ނަމޫނާއެއް ކަމަށް ބުނެ ތައުރީފުކޮށްފަ އެވެ.
ރެނޫކާ ބުނި ގޮތުގައި އަކްޝޭ އަކީ އެހީވުމުގައި ދެވަނައެއް ނެތް މިސާލެކެވެ. އަަދި އޭނާގެ ސަބަބުން މިހާތަަނަށް އެތައް ބައެއްގެ ދިރިއުޅުމަށް ހެޔޮ ބަދަލުތަކެއް އައިސްފައިވާ ކަމަށް ބުންޏެވެ. ރެނޫކާ ވަނީ އަކްޝޭގެ ހިތަކީ ސާފު ރަންގަނޑެއް ފަދަ ހިތެއް ކަމަށާއި އެއީ ހިތްހެޔޮކަމާއި އަޅާލުމާއި ދީލަތިކަމުގެ ނަމޫނާއެއް ކަމަށް ވެސް ބުނެފަ އެވެ.
ނުޕޫރް ކުޅެފައިވާ ސިލްސިލާތަކުގެ ތެރޭގައި "އިސް ޕިޔާރު ކޯ ކިޔާ ނާމް ދޫ" އާއި "ދިޔާ އޯރް ބާތީ ހަމް" އަދި "އޭކް ބާރް ޕިރް" ހިމެނެ އެވެ. އޭނާ ވަނީ ބައެއް ފިލްމުތަކުގައި ވެސް މަސައްކަތްކޮށްފައިވެ އެވެ. އޭގެ ތެރޭގައި "ސާވަރިޔާ" އާއި "ހަސްރަތޭ" ހިމެނެ އެވެ.
މާލީ ގޮތުން ކުރިމަތިވި ދަތިތަކާ ހެދި ގޮތްހުސްވެގެން އޭނާ ވަނީ އަތުގައި ހުރި ގަހަނާކޮޅު ވެސް ވިއްކާލައިފަ އެވެ.