19 އޮކްޓޯބަރ 2016 - 11:42
ބާސެލޯނާ (އޮކްޓޯބަރު 19) - ބާސެލޯނާގެ ފެންވަރަށް ދިއުމަށް މެންޗެސްޓާ ސިޓީ އަށް ވަގުތު ބޭނުންވާ ކަމަށް އެ ޓީމުގެ ކޯޗު ޕެޕް ގާޑިއޯލާ ބުނެފި އެވެ.
ޗެމްޕިއަންސް ލީގުގައި މިރޭ ބާސެލޯނާއާ ދެކޮޅަށް ސިޓީ ކުޅޭ މެޗުގެ ކުރިން ގާޑިއޯލާ ބުނީ ބާސެލޯނާ އަކީ ދުނިޔޭގެ ފުޓްބޯޅައިގައި ވެސް ވަރުގަދަ ބާރެއް ކަަމަށާއި ސިޓީ އަށް އެ ފެންވަރަށް ދެވެން އޮތީ ގިނަ ހަރުފަތްތަކެއް ގިރާކޮށްގެން ކަމަށެވެ.
"ސިޓީން ޔޫރަޕްގައި ނުކުޅެ 35 ހޭދަކުރި. އެކަމަކު ބާސެލޯނާ އިން އެހާ ދުވަހެއް ނުނަގާ. ކާމިޔާބީތަކަށް ބަލާއިރު ބާސެލޯނާ އޮތީ މާ އުހުގައި. ސިޓީ އަށް ޗެމްޕިއަންސް ލީގުގެ ސެމީ ފައިނަލަށް ދެވުނީ އަދި އެންމެ ފަހަރަކު ބާސެލޯނާ މި މުބާރާތް ފަސް ފަހަރު ކާމިޔާބު ކޮށްފި. މިއީ މި ވަގުތު މި ދެ ކްލަބްގެ ތަފާތު. އެކަމަކު ބާސެލޯނާ ފެންވަރަށް ސިޓީ ދާން ބޭނުންނަމަ އެކަން ހާސިލްވެދާނެ. އެކަމަކު އެއީ ވަގުތު ނަގާނެ ކަމެއް،" ގާޑިއޯލާ ބުންޏެވެ.
މިރޭގެ މެޗަށް ނުކުންނައިރު ސިޓީ އެންމެ ފަހުން ކުޅުނު ތިން މެޗުން ވެސް މޮޅެއް ނުލިބެ އެވެ. ގާޑިއޯލާ ބުނީ ކޮންމެ ޓީމެއް ގޮވައިގެން ވެސް ބާސެލޯނާ ދަނޑަށް ދާއިރު ކުރެވެނީ ތަފާތު އިހުސާސެއް ކަމަށެވެ.
"އަހަންނަކީ ބާސެލޯނާ މީހެއް. އެ ކްލަބްގެ ކެޕްޓަނެއް. ކޮންމެ ކްލަބެއް ގޮވައިގެން އައި ނަމަވެސް އެކަން ބަދަލެއް ނުކުރެވޭނެ. އެކަމަކު ކޯޗެއްގެ ގޮތުގައި ހުރެ އަހަރެން ބާސެލޯނާއާ ދެކޮޅަށް ނުކުންނައިރު ބޭނުންވާނީ އަހަރެންގެ ވަޒީފާ އަދާކުރަން. އަހަރެން ކޯޗުކޮށްދޭ ޓީމު މޮޅުކުރަން،" ގާޑިއޯލާ ބުންޏެވެ.
ލިއޮނަލް މެސީ އަކީ ދުނިޔޭގެ އެންމެ މޮޅު ކުޅުންތެރިއާ ކަމަށާއި ކޮންމެ ޓީމަކުން ވެސް އޭނާ ބޭނުންވާނެ ކަމަށް ގާޑިއޯލާ ބުންޏެވެ.
"އަހަރެން ކީއްވެ މެސީ ބޭނުން ނުވާންވީ؟ އެއީ ދުނިޔޭގެ އެންމެ މޮޅު ކުޅުންތެރިއާ. މެސީ ބާސެލޯނާގައި ހުރެ ކެރިއަރު ނިންމާލާތަން ދެކެން ބޭނުން. އެކަމަކު ފުޓްބޯޅައިގައި ކަންތައްތައް ވަރަށް އަވަހަށް ބަދަލުވޭ. ކުޅުންތެރިން އަބަދުވެސް އާ ޗެލެންޖްތަކަށް ލޯބިކުރޭ. ކިހިނެއް އެނގެނީ މެސީ އިންގްލެންޑަށް ނާންނާނެ ކަމެއް؟،" މެސީއާ ބެހޭގޮތުން ގާޑިއޯލާ ބުންޏެވެ.
ބާސެލޯނާ ދަނޑުގައި ސިޓީއާ ދެކޮޅަށް ކުޅޭ މެޗު ފަށާނީ މިރޭ ރާއްޖެ ގަޑިން 23:45 ގަ އެވެ.