11 ޖޫން 2020 - 09:44
ކޮވިޑް-19އާ ދެކޮޅަށް ރާއްޖެ އިން ކުރާ މަސައްކަތަށް ޗައިނާއިން އަނެއްކާ ވެސް އެހީތެރިކަން ފޯރުކޮށްދީފި އެވެ.
ބަލިމަޑުކަމުން އަރައިގަތުމަށް ރާއްޖެއިން ކުރާ މަސައްކަތަށް މީގެ ކުރިން ވެސް އެ ގައުމުގެ ސަރުކާރުންނާއި އަމިއްލަ ފަރާތްތަކުން ވަނީ ގިނަ އެހީތަކެއް ދީފަ އެވެ.
ރާއްޖޭގެ ފޮރިން މިނިސްޓްރީން ބުނިގޮތުގައި މި ފަހަރު ވެސް އެ ގައުމުން ދީފައިވަނީ ޕާސަނަލް ޕްރޮޓެކްޓިވް އިކުއިޕްމަންޓްތަކެވެ. އޭގެ ތެރޭގައި ހިމެނެނީ މެޑިކަލް ޕްރޮޓެކްޓިވް ފޭސް މާސްކާއި ސާޖިކަލް މާސްކާއި ޑިސްޕޯސަބަލް ކަވަރޯލްގެ އިތުރުން މެޑިކަލް ގޮގްލްސް އެވެ.
ފޮރިން މިނިސްޓްރީން ދެކޭ ގޮތުގައި މި އެހީއަކީ ނުރައްކާތެރި މި ބަލިމަޑުކަމާ ދެކޮޅަށް ކުރީ ސަފުގައި މަސައްކަތް ކުރާ މީހުންނަށް ލިބުނު އިތުރު ފަސޭހަ އެކެވެ. އަދި ޗައިނާއިން ވަމުން އަންނަ އެހީތަކަށް ސަރުކާރުގެ ފަރާތުން ވަނީ ޝުކުރު އަދާކޮށްފަ އެވެ.
ޗައިނާއިން މީގެ ކުރިން ވަނީ 10 ވެންޓިލޭޓަރު ރާއްޖެއަށް ހަދިޔާކޮށްފަ އެވެ. އަދި ގިނަ އަދަދެއްގެ މާސްކާއި ސިއްހީ އެހެނިހެން ސާމާނު ވެސް ވަނީ ދީފަ އެވެ.
ކޮވިޑް-19ގެ ބަލިމަޑުކަމުން އަރައިގަތުމަށް ގުޅިގެން މަސައްކަތްކުރުމަށާއި އެ މަސައްކަތްކުރާނެ އޮނިގަނޑެއް ރޭވުމާ ބެހޭ ގޮތުން ފޮރިން މިނިސްޓަރު އަބްދުﷲ ޝާހިދާއި ރާއްްޖޭގައި ހުންނަވާ ޗައިނާ ސަފީރު ޖަންގް ލޮޖޮންގް ވަނީ މިދިޔަ މަހުގެ ތެރޭގައި މަޝްވަރާ ކުރައްވާފަ އެވެ.