26 މެއި 2020 - 21:06
ސިއްހީ ކުއްލި ނުރައްކަލުގެ ހާލަތުގެ ދަށުން ހެލްތް ޕްރޮޓެކްޝަން އޭޖެންސީ (އެޗްޕީއޭ) އިން އަންގާ އެންގުންތަކަށް އަމަލު ކުރުމާއި ނުކުރުމަކީ ރައްޔިތުންގެ މަޖިލީހުގެ އިހްތިޔާރުގައި އޮތް ކަމެއް ކަމަށް ކުރީގެ އުއްތަމަ ފަނޑިޔާރު އަހުމަަދު ފާއިޒް ހުސައިން މިއަދު ވިދާޅުވެެއްޖެ އެވެ.
ކޮވިޑް-19 އާ ގުޅިގެން މާލެ ސަރަހައްދު ލޮކްޑައުން ކޮށްފައި ވަނިކޮށް މަޖިލީހަށް މެމްބަރުން ހާޒިރުވެގެން ޖަލްސާތައް ބާއްވަން މިއަދު ވަނީ ފަށައިފަ އެވެ. މެމްބަރުން މަޖިލީހަށް ހާޒިރުވެގެން ޖަލްސާތައް ބާއްވަން ފެށީ ލޮކްޑައުން ނިމެންދެން އިތުރަށް މަޑުކުރެވެން ނެތް ކަމަށް ޑިރެކްޓާ ޖެނެރަލް އޮފް ޕަބްލިކް ހެލްތް މައިމޫނާ އަބޫބަކުރަށް އެންގެވުމަށް ފަހު ކަމަށް މަޖިލީހުގެ ރައީސް މުހައްމަދު ނަޝީދު ވަނީ ވިދާޅުވެފަ އެވެ. އެކަމާ ގުޅިގެން ބައެއް ފާޑުކިޔުންތައް ވަނީ އަމާޒުވެފަ އެވެ.
ފާއިޒް އޭނާގެ ފޭސްބުކްގައި ލިޔުއްވާފައިވަނީ ސިއްހީ ކުއްލި ނުރައްކަލުގެ ހާލަތުގެ ދަށުން އާންމު ޚިދުމަތްތަކާއި އެއާޕޯޓްތަކާއި ސްކޫލްތައް ބަންދުކޮށް، އަސާސީ ބައެއް ހައްގުތައް ހިފެހެއްޓުމުގެ ބާރު އޮތަސް، ދުސްތޫރީ މުއައްސަސާތަކުގެ ބާރުތައް ކުރިއެކޭ ވެސް އެއްގޮތަށް ދެމި އޮންނާނެ ކަމަށެވެ. އެހެންވެ، ގާނޫނީ ގޮތުން ރައީސް ނިންމަވަން ކަމެއް ކުރައްވަން އެންގުމުގެ ބާރު ސިއްހީ ކުއްލި ނުރައްކަލުގެ ހާލަތުގެ ދަށުން ވިޔަސް، ހެލްތް މިނިސްޓަރަށް ނޯންނާނެ ކަމަށާއި ހަމައެގޮތަށް މަޖިލީހަށް ވެސް އެޗްޕީއޭގެ އެންގުންތަކަށް އަމަލު ކުރުމާއި ނުކުރުމުގެ އިހްތިޔާރު އެބައޮތް ކަމަށް ފާއިޒް ލިޔުއްވާފައިވެ އެވެ.
"އެޗްޕީއޭގެ އުސޫލުތަކާ އެއްގޮތަށް ސަރުކާރު ބަންދު ކުރެއްވުމަކީ ރައީސްގެ އިހްތިޔާރީ ބާރެކެވެ. ހަމައެގޮތަށް، ރައްޔިތުންގެ މަޖިލީހުގެ މަސައްކަތް އެޗްޕީއޭގެ އުސޫލުތަކާ އެއްގޮތަށް ގެންދިއުމަކީ މަޖިލީހުގެ އިހްތިޔާރުގައި އޮތް ކަމެކެވެ." ދާއިމީ ސުޕްރީމް ކޯޓުގެ ފުރަތަމަ އުއްތަމަ ފަނޑިޔާރު ފާއިޒް ލިޔުއްވާފައިވެ އެވެ.
އޭގެ ހުއްޖަތެއްގެ ގޮތުން ފާއިޒް ނެންގެވީ ގާނޫނު އަސާސީގެ ދަށުން ރައީސް އިއުލާން ކުރައްވާ ކުއްލި ނުރައްކަލުގެ ހާލަތު (ސްޓޭޓް އޮފް އިމަޖެންސީ) ގެ ހާލަތެވެ. ރައީސަކީ ސަރުކާރުގެ އެންމެ އިސްވެރިޔާގެ އިތުރުން ދައުލަތުގެ އެންމެ މަތީވެރިޔާ ކަމަށް ވިޔަސް، ކުއްލި ނުރައްކަލުގެ ހާލަތުގައި ވެސް ދައުލަތުގެ އަނެއް ދެ ބާރު ކަމަށްވާ މަޖިލީހާއި ޖުޑިޝަރީގެ މައްޗަށް ބަސް ކިޔުމުގެ ބާރު ރައީސަށް ގާނޫނީ ގޮތުން ނޯންނަ ކަން އޭނާ ފާހަގަ ކުރެއްވި އެވެ. އެ ހާލަތުގައި ވެސް، މަޖިލީހާއި ކޯޓުތަކުގެ ބާރުތައް ކުރިއެކޭ ވެސް އެއްގޮތަށް ދެމި އޮންނާނެ ކަމަށް އެމަނިކުފާނު ލިޔުއްވާފައިވެ އެވެ.
"ދުސްތޫރީ މި މުއައްސަސާތައް ކުއްލި ނުރައްކަލުގެ ހާލަތު މެދުވެރިވުމުގެ ކުރިން ހިނގަމުން އައި ގޮތަށް މަސައްކަތުގައި ދެމި އޮންނާނެ އެވެ." ފާއިޒް ލިޔުއްވާފައިވެ އެވެ.
މަޖިލީހުގެ ޖަލްސާތައް އޮންލައިންކޮށް ކުރިއަށް ގެންދިއުމަށް ފަހު، މެމްބަރުން ހާޒިރުވެގެން ޖަލްސާތައް ބާއްވަން މިއަދު ފެށީ މިހާރު ތިބި ކައުންސިލް މެމްބަރުންގެ ދައުރު ދެމިގެންދާ ގޮތަށް ސަރުކާރުން ގާނޫނު އަސާސީއަށް ހުށަހެޅި އިސްލާހު އެޖެންޑާ ކުރުމުންނެވެ. ގާނޫނު އަސާސީއަށް އިސްލާހު ގެނައުމުގެ މަސައްކަތް މަޖިލިސް ނޫން ތަނެއްގައި ކުރުން ރަނގަޅު ނޫން ކަމަށް ނަޝީދު ވަނީ ވިދާޅުވެފަ އެވެ. އެހެންވެ، މަޖިލީހުގެ ޖަލްސާއެއް މާދަމާ ވެސް ބާއްވަން ވަނީ ނިންމައިފަ އެވެ.
އާންމުން މަގުތަކަށް ނިކުތުން މަނާ ކޮށްފައި ވަނިކޮށް ޖަލްސާއަށް މެމްބަރުން މަޖިލީހަށް ހާޒިރުވާން ގޮތަށް ނިންމުމުން ބައެއް މެމްބަރުން ވެސް އެކަމާ ދެކޮޅަށް ވާހަކަ ދެއްކެވި އެވެ. އަދި ހުއްދަ ނުދެނީސް، ޖަލްސާއަށް ނުދެވޭނެ ކަމަށް ބައެއް މެމްބަރުން ވިދާޅުވަމުން ދަނިކޮށް ފުލުހުން ވަނީ އެޗްޕީއޭ އިން ކަނޑައެޅި އުސޫލުތަކެއްގެ ހުއްދައެއްގެ ދަށުން މެމްބަރުން ޖަލްސާއަށް ދާން ހުއްދަ ދީފަ އެވެ.