31 މެއި 2016 - 20:22
ހުޅުމާލޭގެ ހާބާވިއު އޭރިއާގައި 60 މިކްސް ރެސިޑެންޝަލް ޔުނިޓްތަކެއް އަޅަން ބެޗް ކޮންސްޓްރަކްޝަނާއެކު ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)ން އެއްބަސްވުމުގައި މިއަދު ސޮއިކޮށްފި އެވެ.
ހުޅުމާލޭގެ ފެރީ ޓާމިނަލް ސަރަހައްދުގައި އަޅަން ހަމަޖެހިފައިވާ ފްލެޓްތަކުގެ މަސައްކަތުގެ އެއްބަސްވުމުގައި އެޗްޑީސީގެ ފަރާތުން ސޮއިކުރެއްވީ މެނޭޖިން ޑިރެކްޓަރު މުހައްމަދު ސައިމަން އެވެ. ބެޗްގެ ފަރާތުން ސޮއިކުރެއްވީ މެނޭޖިން ޑިރެކްޓަރު މުހައްމަދު ސައީދެވެ.
އެޗްޑީސީގެ އޮފިޝަލަކު ވިދާޅުވީ 18 މަސް ދުވަހުގެ ތެރޭގައި ނިންމާ ގޮތަށް ކުރިޔަށް ގެންދާ ޕްރޮޖެކްޓަކީ ބެޗް ކޮންސްޓަރަކްޝަނުން އަމިއްލައަށް ތަރައްގީކޮށް، ވިއްކާ ގޮތަށް ކުރިޔަށް ގެންދާ ޕްރޮޖެކްޓެއް ކަމަށެވެ.
"އެ ފަރާތުން ހުށަހެޅި ޕްރޮޕޯސަލް ބެލުމަށް ހަވާލުކުރި ޕްރޮޖެކްޓެއް މިއީ. 20 ޕަސެންޓް ސިވިލް ވާކްސް ނިމުމުން ވިއްކަން ޖެހޭ ގޮތަށް އެ ފަރާތުން އެއްބަސްވެފައި ވަނީ،" އެ އޮފިޝަލް ވިދާޅުވި އެވެ.
އޭނާ ވިދާޅުވީ ހުޅުމާލޭގައި އެފަދަ އިތުރު ޕްރޮޖެކްޓްތަކެއް ހިންގަން ވަރަށް އަވަހަށް ބަޔަކާ ހަވާލުކުރެވޭނެ ކަމަށެވެ.