13 މެއި 2020 - 13:42
ކޮވިޑް-19އާ ގުޅިގެން އާމްދަނީ ދަށްވުމުގެ ސަބަބުން ގޭގެ ކުލި ދައްކަން ދަތިވެފައިވާ ފަރާތްތަކަށް ސަރުކާރުން އެހީތެރިވުމަށް، މަރަދޫ ދާއިރާގެ އެމްޑީޕީގެ މެމްބަރު އިބްރާހީމް ޝަރީފް (މަވޯޓާ) މަޖިލީހަށް މިއަދު ހުށަހަޅުއްވައިފި އެވެ.
ކޮވިޑް-19 އާ ގުޅިގެން ސަރުކާރުން އަޅާ ފިޔަވަޅުތަކާ ބެހޭގޮތުން މަޖިލީހުގެ އިޖުތިމާއީ ކޮމިޓީން ތައްޔާރުކޮށް، މަޖިލީހަށް ހުށަހެޅި ރިޕޯޓުގައި ވަނީ އަމިއްލަ ފަރާތްތަކަށާއި ސަރުކާރަށް ކުއްޔަށް ދޫކޮށްފައިވާ ތަންތަނުގެ ކުލި ކުޑަވާނެ ގޮތަކަށް އިގްތިސާދީ ޕެކޭޖްގެ ދަށުން ލުއި ދިނުމަށާއި ކުލި ނުދެއްކިގެން މީހުުން މަގުމަތިިވިޔަ ނުދިނުމަށްޓަކައި ސަރުކާރާއި ކައުންސިލްތަކުން ފިޔަވަޅު އެޅުމަށެވެ.
އެ ރިޕޯޓަށް ބަހުސް ކުރައްވަމުން ޝަރީފް ވިދާޅުވީ ކުލި ނުދެއްކޭ ފަރާތްތަކަށް ދައުލަތުން އެހީތެރިކަމެއް ފޯރުކޮށް ނުދެވޭ ކަމަށްވާ ނަމަ އެއީ މައްސަލައެއް ކަމަށެވެ. އެހެންކަމުން ކުލި ނުދެއްކިގެން ސަރުކާރަށް ހުށަހަޅާ ފަރާތްތަކަށް ދައުލަތުން އެހީތެރިކަމެއް ދިނުމަށް ޝަރީފް ވަނީ ހުށަހަޅުއްވައިފަ އެވެ.
"ސީދާ ފައިސާގެ ގްރާންޓް އެހީއެއް ދައުލަތުން ދެވެން އޮތް މިންވަރަކުން އަދި އެ މީހުންނަށް ލިބޭ އާމްދަނީ ޓެސްޓް ކުރުމަށް ފަހުގައި ލިބޭނެ ގޮތަކަށް މި ކޮމެޓީގެ ރިޕޯޓްގައި ހިމަނައި ދެއްވުމަކީ މުހިންމު ކަމެއް،" އޭނާ ވިދާޅުވި އެވެ.
ޝަރީފް ވިދާޅުވީ ކުލި ނުދެއްކޭ ފަރާތްތަކަށް އެހީތެރިވުމަކީ އެދޭ ކަމެއް ކަމަށް ބުނުމުން އެކަން އަދި ނުހިނގާނެ ކަމަށެވެ. އެހެންކަމުން ކުލި ނުދެއްކޭ ފަރާތްތަކަށް ސަރުކާރުން ފައިސާގެ އެހީތެރިކަން ދިނުމަށް ހިމަނަން އޭނާ ވަނީ ހުށަހަޅުއްވައިފަ އެވެ.
ކޮމެޓީގެ ހުށަހެޅުން ތަފްސީލް ކޮށްދެއްވަމުން ރައްޔިތުން މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވީ ކޮމެޓީން ނިންމާފައި ވަނީ ވެސް ކުލި ނުދެއްކޭ ފަރާތްތަކަށް ސަރުކާރުން ގޮތްތަކެއް ހަމަޖައްސައި ދިނުން ކަމަށެވެ.
"ގެ ކުއްޔަށް ދީގެން ހުރި މީހާ، އޭނާ ކުލި ކުޑަކުރުމަކަށް ނޫން މި ކޮމެޓީން މިހުށަހަޅަނީ. އެހެން ނަމަވެސް ކުލި ނުދެއްކޭ، އާމްދަނީ ދަށްވުމުގެ ސަބަބުން ކުލި ނުދެއްކޭ މީހާޔަށް ދައުލަތުގެ އެހީތެރިކަމެއް ދިނުމަށް ހުށަހެޅުން އެކެއްގައި މިވަނީ،" ނަޝީދު ވިދާޅުވި އެވެ.
ލޮކްޑައުންގައި ގިނަ ދުވަހު ތިބެން ޖެހޭތީ ދިމާވާ ދަތިތަކުގެ ސަބަބުން ވީހާވެސް އަވަހަކަށް ލޮކްޑައުންގެ ހާލަތު ނިމުމަކަށް ގެނެސް ދިނުމަށް ވެސް ރިޕޯޓްގައި ހިމަނަން ޝަރީފް ވަނީ ހުށަހަޅުއްވައިފަ އެވެ.
"އެއްގޮތަކަށް ވެސް ދާއިމީ ގޮތެއްގައި އަޅުގަނޑުމެންނަކަށް ލޮކްޑައުންއެއްގައި ނުތިބެވޭނެ. އެހެންވީމަ ދުނިޔޭގެ އެހެން ގައުމުތަކުގައި ވެސް ހަދާގޮތަށް ކޭސްތަކަށް އަންނަ ބަދަލުތަކަށް ބަލައި އަދި ސިއްހީ މާހިރުންނާ މަޝްވަރާ ކޮށްގެން ވީހާވެސް ހަލުވި ސްޕީޑެއްގައި ވީހާވެސް އަވަހަކަށް ލޮކްޑައުންގެ ހާލަތުން އަރައި ގަންނާނެ ގޮތަށް ކަންތައްތައް ކުރުން،" ޝަރީފް ވިދާޅުވި އެވެ.
އިޖުތިމާއީ ކޮމެޓީން ސަރުކާރަށް ހުށަހަޅަން ފާސްކޮށްފައިވާ ކަންތައްތަކުގެ ތެރޭގައި އިގްތިސާދީ ޕެކޭޖް ދިނުމަށް ފަހު، އެ ފަރާތަކުން އަމަލު ކުރަމުންދާ ގޮތް ޖޮބް ސެންޓަރުން ބަލަމުން ގެންދިއުމަށް ހިމަނާފައިވެ އެވެ. އަދި އެ ޕެކޭޖް އެއްފަހަރާ ދޫނުކުރުމަށާއި މުވައްޒަފުންނާ މެދު އިހާނެތިކޮށް އަމަލުކުރާ ނަމަ، އޭގެ ވަކި ޕަސެންޓެއް ޖޫރިމަނާ ގޮތުގައި ނެގުމަށް ވެސް އެ ކޮމިޓީން ހުށަހަޅާފައިވެ އެވެ.
އިޖުތިމާއީ ކޮމިޓީގެ އެއް ހުށަހެޅުމަކީ، މާލެ އާއި އަތޮޅުތަކުގެ ތަފާތު ކުރުމެއް ނެތި ސްކޫލް ކުދިންނަށް ޚާއްސަ އިންޓަނެޓް ޕެކޭޖްތަކެއް ތައާރަފް ކުރުމާއި ސްކޫލްތައް ބަންދު ވިޔަސް، ތައުލީމު މެދުނުކެނޑި ގެންދިއުށްޓަކައި އޮންލައިން ކްލާސްތައް ކުރިއަށް ގެންދިއުމެވެ.
އެ ރިޕޯޓް ފާސްކުރުމާ މެދު މިއަދު ގޮތެއް ނިންމާނެ އެވެ. ބަހުސްގައި ބައިވެރިވި ހުރިހާ މެމްބަރުންވެސް ވަނީ ކޮމެޓީގެ ނިންމުންތަކަށް ތާއީދުކޮށްފަ އެވެ.