16 އޮކްޓޯބަރ 2016 - 11:42
ޕީޕީއެމްގެ ހިންގުން ރައީސް އަބްދުﷲ ޔާމީނާ ހަވާލުކުރުމަށް ސިވިލް ކޯޓުން މިއަދު ނެރުނު އަމުރު އިސްތިއުނާފު ކުރަން ވިސްނާ ކަމަށް، އެ ޕާޓީގެ ރައީސް މައުމޫން އަބްދުލް ގައްޔޫމްގެ ދަރިކަލުން އަހުމަދު ފާރިސް މައުމޫން ވިދާޅުވެއްޖެ އެވެ.
ދިއްގަރު ދާއިރާގެ މެމްބަރު ފާރިސް ވިދާޅުވީ، މައުމޫންގެ ބާރުތައް އަތުލި މައްސަލަ ހައި ކޯޓުގައި އިސްތިއުފާނު ކުރުމާ ގުޅޭ މަޝްވަރާތައް މިހާރު ކުރިއަށް ދާ ކަމަށެވެ.
އޭނާ ވިދާޅުވި ގޮތުގައި އެއީ ޕާޓީގެ އަސާސީ ގަވައިދު އަދި އުސޫލުތަކާ ވެސް ހިލާފު އަމުރެއް ކަމަށް ދެކެވަޑައިގަންނަވަ އެވެ.
ސިވިލް ކޯޓުގެ ފަނޑިޔާރު މުހަންމަދު ހަލީމް ނެރުއްވި ހުކުމްގައި ވަނީ، ޕީޕީއެމްގެ ކައުންސިލުން ވަކި ގޮތަކަށް ކަނޑައަޅަންދެން އެ ޕާޓީ ހިންގުމުގެ އެންމެހައި ޒިންމާ އުފުލަން ޖެހޭ ފަރާތަކީ ޕާޓީގެ މުޝްތަޝާރު (ރައީސް އަބްދުﷲ ޔާމީން) ކަމަށް ކަނޑައަޅާ ކަމަށެވެ. އަދި މިއަދުން ފެށިގެން 24 ގަޑިއިރުގެ ތެރޭގައި ޕީޕީއެމްގެ ކައުންސިލްގެ ރަސްމީ ޖަލްސާއެއް ބޭއްވުމަށް މުޝްތަޝާރު ގެ މައްޗަށް ހުކުމްގައި ވަނީ އަމުރުކޮށްފަ އެވެ.
ޕީޕީއެމްގެ އަސާސީ ގަވައިދުގައި ބުނެފައިވާ ގޮތުގައި ޕީޕީއެމްގެ މުޝްތަޝާރަކީ ޕާޓީ ހިންގުމުގައި އަދި ޕާޓީގެ ސިޔާސަތުތައް ކަނޑައެޅުމުގައި އެއްވެސް އަމަލީ ދައުރެއް އޮންނަ ފަރާތެއް ނޫނެވެ. މުޝްތަޝާރަކީ ޕާޓީގެ ރައީސް (މައުމޫން އަބްދުލްގައްޔޫމް) އަށް ފަހު އެންމެ ގަދަރުވެރި މަގާމު ކަމަށް އަސާސީ ގަވައިދުގައިވެ އެވެ.