11 މެއި 2020 - 19:13
ޓޫރިޒަމްގެ އެންމެ ބޮޑެތި ވިޔަފާރިވެރިން ހިމެނޭ މޯލްޑިވްސް އެސޯސިއޭޝަން އޮފް ޓޫރިޒަމް އިންޑަސްޓްރީ (މަޓީ) އާއި ސަރުކާރުގެ ދެބަސްވުމެއް ނެތް ކަމަށާއި ޓޫރިޒަމް ދާއިރާ އަށް ގެންނަންޖެހޭ ބަދަލުތަކާ މެދު އެ އެސޯސިއޭޝަނާ އެކު މަޝްވަރާތައް ކުރާ ކަމަށް ޓޫރިޒަމް މިނިސްޓަރު އަލީ ވަހީދު ވިދާޅުވެއްޖެ އެވެ.
ދަރުބާރުގޭގައި މިއަދު ހަވީރު ބޭއްވި ނޫސްވެރިންގެ ބައްދަލުވުމުގައި އަލީ ވަހީދު ވިދާޅުވީ، މަޓީގެ ޗެއާމަން މުހައްމަދު އުމަރު މަނިކާއި ވައިސް ޗެއާމަން ހުސައިން އަފީފާ ގުޅައިގެން ރާއްޖޭގެ ޓޫރިޒަމް ސެކްޓަރުގެ ހާލަތު އިޔާދަކުރުމަށްޓަކައި މަޝްވަރާތައް ކުރައްވާ ކަމަށެވެ.
"ހުރިހާ ޓޫރިޒަމް އެސޯސިއޭޝަނެއް ކޮވިޑް-19 ގެ ހާލަތުގައި ސަރުކާރަށް ބޮޑު އެއްބާރުލުމެއް ވަނީ ދީފައި. އިރާދަކުރެއްވިއްޔާ އެންމެން ގުޅިގެން މި ރާއްޖެ ކޮޅަށް ޖަހާނަން،" ނޭޝަނަލް އިމަޖެންސީ އޮޕަރޭޝަން ސެންޓަރު (އެންއީއޯސީ) ގައި ބޭއްވި ނިއުސް ކޮންފަރެންސްގައި އޭނާ ވިދާޅުވި އެވެ.
އަލީ ވަހީދު ވިދާޅުވީ، މި އަހަރުގެ ފުރަތަމަ ކުއާޓަރުގައި 100 އަށް ވުރެ ގިނަ ރިސޯޓުން ލޭންޑް ރެންޓް ވެސް ދައްކާފައިވާ ކަމަށެވެ. އަދި ހާލަތު ބަދަލު ކުރުމަށްޓަކާއި ވަޒީރުންގެ މަޖިލީސް އޮތީ އެކަތިގަނޑެއްގައި ކަމަށާއި އިގްތިސާދީ ހާލަތު ރަނގަޅު ކުރުމަށް ވެސް ހުރިހާ ވަޒީރުން އެކީ މަސައްކަތްތައް ކުރަމުން އަންނަ ކަމަށް އޭނާ ވިދާޅުވި އެވެ
އަލީ ވަހީދު ވިދާޅުވީ، މި ސަރުކާރު ވެރިކަމަށް އައި ފަހުން މަޓީގެ ފުރިހަމަ އެއްބާރުލުން ދޭ ކަމަށެވެ. މިހާރު ގައުމަށް ދިމާވެފައިވާ ހާލަތުގައި ވެސް އެ އެސޯސިއޭޝަނުން ވެސް ބޮޑު އެއްބާރުލުމެއް ލިބުނު ކަމަށެވެ.
"އަޅުގަނޑުދެކޭ ގޮތުގައި މީ ދަތި ހާލަތެއް. މިއީ ޓޫރިޒަމަށް ދިމާވި އެންމެ ބޮޑު ގޮންޖެހުން. ސުނާމީ އަށް ވުރެ ވެސް ބޮޑު ދަތި ހާލަތެއް. އެހެންވީމަ މަޓީ އަކީ ރާއްޖޭގެ ރައްޔިތުން. އެއީ ވަކި ވިޔަފާރިވެރިންތަކެއް ކަމަށް އެއްވެސް ހާލެއްގައި ވިސްނައިގެން ނުވާނެ،" އޭނާ ވިދާޅުވި އެވެ.
އަލީ ވަހީދު މިހެން ވިދާޅުވެފައިވާ އިރު މިދިޔަ ހަފްތާގައި ބޭއްވި ނޫސްވެރިންގެ ބައްދަލުވުމުގައި އިކޮނޮމިކް މިނިސްޓަރު ފައްޔާޒު އިސްމާއިލް ވިދާޅުވީ، ކޮވިޑް-19 ގެ ސަބަބުން ގެއްލުންވާ ވިޔަފާރިތަކަށް އެހީވުމަށް ސަރުކާރުން އިއުލާންކުރި އިގްތިސާދީ އެހީގެ ޕެކޭޖް ކަނޑައެޅީ މަޓީއާ މަޝްވަރާ ނުކޮށް ކަމަށް ބުނުމަކީ ސަރުކާރުގެ ގައިގައި ކޮޅުފަައިންް ޖެހުން ކަމަށެވެ.
ކޮވިޑް-19 ގެ ސަބަބުން ކުރިމަތިވި އިގްތިސާދީ ގޮންޖެހުންތަކާ ހެދި ސަރުކާރުން ވަނީ 2.4 ބިލިއަން ރުފިޔާގެ އެހީގެ ޕެކޭޖެއް އިއުލާނުކޮށްފަ އެވެ. މި ޕެކޭޖުގެ ތެރެއިން ރިސޯޓްތަކަށް ހަތް މިލިއަން ރުފިޔާއާ ހަމައަށް، ޝަރުތުތަކަކާ އެކު ލޯނު ދޫކުރާނެކަން ސަރުކާރުން ބުނެފައިވެ އެވެ.
މަޓީން މިދިޔަ ހަފްތާގައި ނެރުނު ބަޔާނުގައި ބުނީ ރާއްޖޭގެ އިގްތިސާދުގެ ބޮޑު ބައެއް ބިނާވެފައިވަނީ ޓޫރިޒަމް ދާއިރާއަށް ކަމަށްވާ އިރު، ދައުލަތަށް އެންމެ ބޮޑު އާމްދަނީއެއް ލިބެނީ އެ ދާއިރާ އިން ކަމަށެވެ. މިކަން މިހެން އޮތް އިރު ސަރުކާރުގެ އެހީގެ ޕެކޭޖް ކަނޑައަޅާފައިވަނީ ޓޫރިޒަމް ދާއިރާ ތަމްސީލްކުރާ މަޓީއާ މަޝްވަރާ ކުރުމެއް ނެތި ކަމަށެވެ. އަދި ކޮވިޑް-19 ގެ ސަބަބުން ވިޔަފާރިތައް ބަނގުރޫޓްވެ، ވަޒީފާތައް ސަލާމަތް ކުރުމަށްޓަކައި އެކަށީގެންވާ ފިޔަވަޅުތައް އަޅަންޖެހޭ ކަމަށާއި އެކަމަށް ސަރުކާރުގައި އެކި ގޮތްގޮތުން އެދުނަސް، އެދެވޭ ފިޔަވަޅެއް ނުފެންނަ ކަމަށެވެ.