08 މެއި 2020 - 13:45
ކޮވިޑް-19 ފެތުރެން ފެށުމުން ދަތުރުފަތުރު ހުއްޓުމަކަށް އައުމުން، އެކި ގައުމުތަކުގައި ތާށިވެފައި ތިބި އިންޑިއާ މީހުން އަނބުރާ ގައުމަށް ގެންދަން އެ ގައުމުން ހިންގާ ބޮޑު އޮޕަރޭޝަނުގައި، ރާއްޖޭގައި ތިބި އިންޑިއާ މީހުން ބަލައި އިއްޔެ އައި މަނަވަރަށް މީހުން އަރުވައި ފުރަން ތައްޔާރުވާން ފަށައިފި އެވެ.
މަނަވަރުގައި 752 މީހުން ގެންދަން އިންޑިއާ އިން ނިންމާފައިވާއިރު މިއަދު ހެނދުނުން ފެށިގެން މަނަވަރަށް މީހުން އަރުވަން ވަނީ ފަށައިފަ އެވެ.
މާލޭގެ އެކި ހިސާބުން މީހުން ގޮވައިގެން، މަނަވަރަށް ދިއުމުގެ ކުރިން އިމިގްރޭޝަނުން ނިންމަންޖެހޭ ކަންކަން ނިންމަން އެމްޕީއެލްގެ ބަހުގައި ފުރަތަމަ ގެންދަނީ ވެލާނާ އިންޓަނޭޝަނަލް އެއާޕޯޓަށެވެ. އެއަށް ފަހު، މާލޭ ކޮމާޝަލް ހާބަރުގައި ބަނދަރުކޮށްފައިވާ މަނަވަރަށް މީހުން އަރުވަނީ އެވެ.
"މިހާތަނަށް 300 އެއްހާ މީހުން މަނަވަރަށް އަރުވައިފިން. މިބަލަނީ މިއަދު ހަވީރު ވާންވާއިރަށް އެންމެން އަރުވައި ނިމޭނެ ކަމަށް،" ފުރާ މީހުން އުފުލުމުގެ މަސައްކަތުގައި އުޅޭ އެމްޕީއެލްގެ އިސް އޮފިޝަލަކު ވިދާޅުވި އެވެ.
މީހުން އަރުވައި ނިމުނުހާ އަވަހަކަށް މަނަވަރު ފުރަން ވަނީ ނިންމައިފަ އެވެ.
ފުރާ މީހުންގެ ކަންކަން ހަމަޖެއްސުމަށް ހަރަކާތްތެރިވާ ކަސްޓަމާއި އެމްޕީއެލްގެ މުވައްޒަފުން ތިބީ ސަލާމަތީ ގޮތުން އަޅަން ޖެހޭ ފިޔަވަޅުތައް އަޅައިގެންނެވެ. އަދި ފުރަން ދާ މީހުންވެސް ބައިތިއްބަނީ ދުރުދުރުގަ އެވެ.
އިންޑިއަން ހައި ކޮމިޝަންގެ ޑެޕިއުޓީ ކޮމިޝަނަރު ރޯހިތު ރަތިޝް އިއްޔެ "މިހާރު" އަށް ވިދާޅުވިގޮތުގައި މި ދަނޑިވަޅުގައި ވަޒީފާ ގެއްލިފައިވާ މީހުންނަށާއި މާބަނޑު އަންހެނުންނާއި މެޑިކަލް އިމަޖެންސީތަކުގައި އަނބުރާ ދާންޖެހޭ މީހުންނަށާއި އެނބުރި ނުދެވި ރާއްޖޭގައި ތާށިވެފައި ތިބި ޓޫރިސްޓުން އެ ގައުމަށް ގެންދަން އިސްކަން ދޭނެ އެވެ.
އެ މަނަވަރު ކޮޗިންނަށް ދާން 24-36 ގަޑިއިރުގެ ވަގުތެއް ނަގާނެ ކަމަށް ރޮހިތު ވިދާޅުވި އެވެ. އެ މީހުން ކޮޗިންއަށް ގެންދިއުމަށް ފަހު 14 ދުވަސް ވަންދެން އެ ސިޓީގައި ކަރަންޓީނު ކުރާނެ އެވެ. އެ މީހުން ދާން ބޭނުން ތަނަކަށް ދިއުމުގެ ފުރުސަތު ލިބޭނީ އޭގެ ފަހުންނެވެ.
މީގެ އިތުރުން، ރާއްޖޭގައި ތިބި އިންޑިއާ މީހުން އެ ގައުމަށް ގެންދަން އިތުރު މަނަވަރެއް ދެ ދުވަހެއްގެ ތެރޭގައި އަންނާނެ ކަމަށް ވެސް އޭނާ ވިދާޅުވި އެވެ. އެ މަނަވަރު ހަމަ އެ ދުވަހު، ނުވަތަ އޭގެ އަނެއް ދުވަހު ފުރާނެ ކަމަށް ރޮހިތު ވިދާޅުވި އެވެ. އެ ދަތުރުގައި ގެންދާނީ 200-250 އެއްހާ މީހުންނެވެ.
ފަރުވާއެއް ނެތް ކޮވިޑް-19 އަށް ރާއްޖޭން މިހާތަނަށް ޕޮޒިޓިވްވި މީހުންގެ ތެރޭގައި އިންޑިއާގެ 52 މީހަކު ހިމެނެ އެވެ.
ލަފާ ކުރެވޭ ގޮތުގައި ރާއްޖޭގައި އިންޑިއާގެ 30،000 މީހުން ދިރިއުޅެ އެވެ. އޭގެ ތެރޭގައި ޓީޗަރުންނާއި ޑޮކްޓަރުން ފަދަ ޕްރޮފެޝަނަލް މަސައްކަތު މީހުންގެ އިތުރުން ލޭބަރުން ހިމެނެ އެވެ.
އެކި ގައުމުތަކުގައި ތިބި އިންޑިއާ މީހުން ގައުމަށް ގެންދަން ހިންގާ އޮޕަރޭޝަންގައި 200،000 މީހަކު ގައުމަށް ގެންދާނެ ކަމަށް ލަފާކުރެވެ އެވެ. ގަލްގުގެ ގައުމުތަކާއި އެމެރިކާ އާއި ޔޫރަޕްގެ އެކި ގައުމުތަކުން ވެސް އިންޑިއާ މީހުން ގައުމަށް ގެންދަން އަންނަނީ ވައިގެ މަގުން ވެސް ދަތުރުތައް ހަމަޖައްސަމުންނެވެ. މިއީ އިންޑިއާ އިން މިހާތަނަށް ހިންގާ މިފަދަ އެންމެ ބޮޑު އޮޕަރޭޝަނެވެ.