09 މެއި 2020 - 10:24
ސަލްމާން ޚާންގެ ކެރިއަރުގައި ކާމިޔާބު ގިނަ ފިލްމުތަކެއް ކުޅެފައިވާ އިރު އޭނާއާ އެކީ އާ ބަތަލާއިންތަކެއް ތައާރަފު ވެސް ވެފައިވެ އެވެ. އޭގެ ތެރެއިން ބައެއް ބަތަލާއިން ވަރަށް ކާމިޔާބު ފިލްމީ ކެރިއަރެއް ބިނާކޮށް، ބިޑެތި ކާމިޔާބީތަކެއ ވެސް ހޯދާފައިވާ އިރު، ބައެއް ތަރިން މިހާރު ފިލްމުތަކުން ފެންނަލެއް ވެސް މަދެ އެވެ.
އަދި ސަލްމާނާ އެކު ބޮލީވުޑަށް ތައާރަފުކުރި ބައެއް ބަތަލާއިންނަކީ މާ ބޮޑު ކާމިޔާބީއެއް ވެސް ފަހުން ހޯދުނު ތަރިންނެއް ނޫނެވެ. މީގެ ތެރެއިން ބައެއް ބަތަލާއިންނަކީ ސަލްމާން ލޯބީގެ ގޮތުން ގުޅުނު ބައެއް ބަތަލާއިންނާ މާ ވައްތަރުވެގެން ފިލްމުތަކުން ފުރުސަތު ލިބުނު މީހުންނޭ ވެސް ކިޔަ އެވެ.
ސަލްމާނަކީ ވެސް އޭނާގެ ފިލްމުތަކުން އާ ފަންނާނުން ބޮލީވުޑަށް ނެރެދީފައިވާ ތަރިއެކެވެ.
* ސަލްމާންގެ ފުރަތަމަ ފިލްމު 1989 ގެ "މޭނޭ ޕިޔާރު ކިޔާ" އިން ތައާރަފުވި ބަތަލާ ބަގިޔާޝްރީ އަކީ އެ ފިލްމުން ވަރަށް ވިދައިލި ބަތަލާއެކެވެ. ސޫރަހް ބަރްޖަތިއާ ޑައިރެކްޓްކުރި އެ ފިލްމުގައި އޭނާ ކުޅުނު މައުސޫމުން ނިޔަނެތި އަންހެން ކުއްޖެއްގެ ރޯލް ބެލުންތެރިންގެ ހިތްތައް ފަތަހަކުރި އެވެ.
"މޭނޭ ޕިޔާރު ކިޔާ" އިން ކިތަންމެ ބޮޑު މަޝްހޫރުކަމެއް ލިބުނަސް ބަގިޔާޝްރީ އަކީ ފަހުން މާ ކާމިޔާބު ބަތަލާއެއް ނޫނެވެ. ވަރަށް އަވަހަށް އޭނާ ބޮލީވުޑުން ގެއްލުނެވެ. އަދި ކައިވެންޏެއްކޮށް ގެވެހި އަންބަކަށް ބަދަލުވި އެވެ.
ބަގިޔާޝްރީ، 51، އާއި ހިމާލަޔާ ދައްސާނީ 1990 ގައި ކުރި ކައިވެންޏަށް ދެ ކުދިން ވެސް ލިބިފައިވެ އެވެ. އޭގެ ތެރެއިން ފިރިހެން ދަރިފުޅު އަބިމަންޔޫ ދައްސާނީ، 30، އަކީ މިހާރު ބޮލީވުޑްގެ އެކްޓަރެކެވެ.
* ބަތަލާ ނަގްމާ އަކީ ސަލްމާނާ އެކު ފިލްމު "ބާގީ" އިން 1990 ގައި ބޮލީވުޑަށް ތައާރަފުވި ބަތަލާއެކެވެ. ނަގްމާ ފަހުން ވަނީ ބޮލީވުޑްގެ މަޝްހޫރު އެހެން އެކްޓަރުންނާ އެކު ވެސް ފިލްމު ކުޅެފަ އެވެ. އޭގެ ތެރޭގައި ޝާހްރުކް ޚާނާ އެކު 1993 ގައި ކުޅުނު ޑައިރެކްޓަރު ރާކޭޝް ރޯޝަންގެ "ކިންގް އަންކަލް" ހިމެނެ އެވެ.
"ބާގީ" އަކީ ސަލްމާންގެ ވާހަކައަކަށް ދީޕަކް ޝިވްދަސާނީ ޑައިރެކްޓްކުރި ފިލްމެކެވެ.
ނަގްމާ، 47، އަކީ ހިންދީ ފިލްމުތަކުގެ އިތުރުން އިންޑިއާގެ ރީޖަނަލް ފިލްމުތަކުން ވެސް ފެނިފައިވާ ބަތަލާއެކެވެ. އޭގެ ތެރޭގައި ތެލެގޫ، ތަމަޅަ، ބޯޖްޕޫރީ، މަލަޔާޅަމް އަދ ކަންނާޑާ ފިލްމުތައް ހިމެނެ އެވެ.
* ނުވަ ދިހައިގެ އަަހަރުތަކުގައި ވިދައިލި ބަތަލާ އައިޝާ ޖުލްކާ ބޮލީވުޑަށް ތައާރަފުވީ ސަލްމާނާ އެކު 1991 ގައި ކުޅުނު "ގުރުބާނީ" އިންނެވެ. އެ ފިލްމަކީ ދީޕަކް ބަހްރީގެ ޑައިރެކްޝަނެކެވެ.
މިހާރު އުމުރުން 47 އަހަރުގެ އައިޝާ ކުޅުނު ފާހަގަކޮށްލެވޭ ބައެއް ފިލްމުތަކުގެ ތެރޭގައި "ކިލާޅީ"، "ބަލްމާ"، "ޖޯ ޖީތާ ވޮހީ ސިކަންދަރު" އަދި "ވަގުތު ހަމަރާ ހޭ" ފަދަ އެތައް ފިލްމެއް ހިމެނެ އެވެ. ކުރިން ލީޑް ބަތަލާގެ ރޯލް ކުޅުނު މިހާރު ވެސް މަދުމަދުން ފިލްމުތަކުން ފެންނަ އައިޝާ އާންމުކޮށް ކުޅެނީ ސަޕޯޓިން ރޯލްތަކެވެ.
* ފިލްމު "ސަނަމް ބޭވަފާ" އަކީ 1991 ގައި ރިލީޒްވި ސަލްމާންގެ ވަރަށް ކާމިޔާބު ފިލްމެކެވެ. ހިންދޫ އަދި މުސްލިމު އާއިލާއެއްގެ ދެ ޒުވާނަކު ލޯބީގެ ގޮތުން ގުޅުމުން އާއިލާތެރެއިން ކުރިމަތިވާ ހިތްދަތި ހާދިސާތަކެއް ކިޔައިދޭ ފިލްމުގައި ސަލްމާނާ އެކު ބަތަލާގެ ރޯލް ކުޅުނީ ޗާންދުނީ އެވެ.
އޭނާގެ ކެރިއަރިުގައި ފަހުން މާ ގިނަ ފިލްމުތަކެއް ކުޅެފައެއް ނުވެ އެވެ. ކައިވެނިކޮށް މިހާރު ދެ ދަރިން ވެސް ތިބި ބަތަލާ ފެނުނު ފިލްމުތަކުގެ ތެރޭގައި "ޖާންސޭ ޕިޔާރާ" އާއި "ޖޭ ކިޝަން" އަދި "އާޖާ ސަނަމް" ހިމެނެ އެވެ.
* ރިވަތީ އަކީ ސަލްމާނާ އެކު 1991 "ލަވް" ކުޅުނު ބަތަލާ އެވެ. ވަރަށް ރީތި ލަވަތަކެއް ވެސް ހިމެނުނު އެ ފިލްމަކީ ސުރޭޝް ކްރިޝްނާ ޑައިރެކްޓްކުރި ފިލްމެކެވެ.
އުމުރުން މިހާރު 53 އަހަރުގެ ރިވަތީ އަކީ ފިލްމުތަކުން މަންމައެއްގެ ރޯލުން ފެންނަ ބަތަލާއެކެވެ. ހިންދީ ސިނަމާ އަށް ވުރެ ބޮޑަށް އޭނާ ހަރަކާތްތެރީ އިންޑިއާގެ ދެކުނުގެ ފިލްމުތަކިގަ އެވެ. ރިވަތީ މި ފަހުން ކުޅުނު ހިންދީ ފިލްމަކީ 2014 ގެ "2 ސްޓޭޓްސް" އެވެ. އެ ފިލްމުގައި އޭނާ ކުޅުނީ އާލިއާ ބަޓްގެ މަންމަގެ ރޯލެވެ.
* ނުވަދިހައިގެ އަހަރުތަކުގައި އެންމެ ވިދައިލި ބަތަލާއިންގެ ތެރޭގައި ހިމެނޭ ރަވީނާ ޓަންޑަން ބޮލީވުޑަށް ތައާރަފުވީ ސަލްމާނާ އެކު 1991 ގައު ކުޅުނު "ޕައްތަރު ކޭ ޕޫލް" އިންނެވެ. އެ ފިލްމަށް ފަހު ރަވީނާ ވަނީ ކާމިޔާބު އެތައް ފިލްމެއް މަޝްހޫރު އެތައް އެކްޓަރަކާ އެކީ ކުޅެފަ އެވެ.
ރަވީނާގެ ފާހަގަކޮށްލެވޭ ބައެއް ފިލްމުތަކުގެ ތެރޭގައި "ދިލްވާލޭ" އާއި "މޮހޮރާ" އާއި "އަންދާޒް އަޕްނާ އަޕްނާ" ފަދަ ފިލްމުތައް ހިމެނެ އެވެ. ޕްރޮޑިއުސަރު އަނިލް ތަނަޑާނީއާ ކައިވެނިކޮށްގެން ރަވީނާ، 45، ގެ މިހާރު ދެ ކުދިން އެބަ ތިއްބެވެ. އޭނާ އަކީ މިހާރު ވެސް މަދުމަދުން ފިލްމުތަކުން ފެންނަ ބަތަލާއެކެވެ.
* ސަލްމާންގެ ކެރިއަރުގެ އެންމެ ފާހަގަކޮށްލެވޭ ފިލްމުތަކުގެ ތެރޭގައި ހިމެނޭ 2003 "ތެރެ ނާމް" އިން ބޮލީވުޑަށް ތައާރަފުވި ބޫމީ ޗާވްލާ އަކީ ދެކުނު ފިލްމުތަކުން ވިދައިލި ތަރިއެކެވެ.
ސަތިޝް ކޯޝިކް ޑައިރެކްޓްކުރި "ތެރެ ނާމް" އަށް ފަހު ވެސް އޭނާ ބޮލީވުޑްގެ ފިލްމުތަކެއް ކުޅުނެވެ. އެކަމަކު ބޫމީ، 41، އަކީ މާ ބޮޑު މަޝްހޫރުކަމެއް ހޯދުނު ބަތަލާއެއް ނޫނެވެ.
އޭނާ ކުޅުނު ހިންދީ ފިލްމުތަކުގެ ތެރޭގައި "ރަން" އާއި "ދިލް ނޭ ޖިސޭ އަޕްނާ ކަހާ" އަދި "ސިލްސިލޭ" ހިމެނެ އެވެ.
* ސުނޭހާ އުލާލަކީ ސަލްމާން ލޯބީގެ ގުޅުމެއް ބޭއްވި ބަތަލާ އައިޝްވާރިޔާ ރާއީއާ ވައްތަރުވެގެން އޭނާއާ އެކު ފިލްމެއް ކުޅެން ފުރުސަތު ލިބުނު ބަތަލާއެކެވެ. އެ ދެ މީހުން އެކީގައި ކުޅުނު ފިލްމަކީ 2005 ގެ "ލަކީ: ނޯ ޓައިމް ފޯ ލަވް" އެވެ.
ސަލްމާނާ އެކު ބޮލީވުޑަށް ތައާރަފުވާން ފުރުސަތު ލިބުނަސް ސްނޭހާ، 35، އަކީ މާ ބޮޑު ކުރިއެރުމެއް ހޯދުނު ބަތަލާއެއް ނޫނެވެ. އޭނާ ފަހުން ކުޅުނު ފިލްމުތަކުގެ ތެރޭގައި "އަރިއަން" އާއި "ކާޝް...މޭރޭ ހޯތޭ" ހިމެނެ އެވެ.
* ސޮނާކްޝީ ސިންހާ އަކީ ސަލްމާނާ އެކު 2010 ގެ "ދަބަންގް" އިން ބޮލީވުޑަށް ނުކުތް ބަތަލާއެކެވެ. އެ ފިލްމަށް ފަހު، ކުރީގެ އެކްޓަރު ޝަތުރުގަން ސިންހާގެ ދަރިފުޅު ވަނީ "ދަބަންގް" ފްރެންޗައިޒްގެ ދެ ފިލްމުގައި ވެސް ސަލްމާނާ އެކު މަސައްކަތްކޮށްފަ އެވެ.
ސޮނާކްޝީ، 32، އަކީ ފަހުން މަޝްހޫރު އެކްޓަރުންނާ އެކު ފިލްމުތައް ކުޅުނު އަދި މިހާރު ވެސް ކުޅެމުން އަންނަ ބަތަލާއެކެވެ. އޭނާ މިހާތަނަށް އެންމެ ގިނަ ފިލްމު ކުޅުނީ އަކްޝޭ ކުމާރާ އެކީގަ އެވެ.
* ފިލްމު "ވީރު" އިން 2010 ގައި ސަލްމާނާ އެކު ބޮލީވުޑަށް ނުކުތް ޒަރީން ޚާން، 32، އަކީ ސަލްމާން ފަހުން ލޯބީގެ ގުޅުމެއް ބޭއްވި ބަތަލާ ކެޓްރީނާ ކެއިފާ ވައްތަރު ބަތަލާއެކެވެ. ޒަރީން އަކީ އަލަތު ފިލްމަށް ފަހު، މާ ރަނގަޅު ފުރުސަތުތަކެއް ލިބުނު ބަތަލާއެއް ނޫނެވެ.
އޭނާ ކުޅުނު ފިލްމުތަކުގެ ތެރޭގައި "ހައުސްފުލް 2" އާއި "ހޭޓް ސްޓޯރީ 3" އަދި "އަކްސަރު 2" ހިމެނެ އެވެ.
* ޑެއިޒީ ޝާހް ބޮލީވުޑަށް ތައާރަފުވީ ސަލްމާނާ އެކު 2014 ގެ "ޖޭ ހޯ" އިންނެވެ. ބޮކްސް އޮފީހުގައި މާ ބޮޑު ކާމިޔާބީއެއް ނުލިބުނު އެ ފިލްމަށް ފަހު، ޑެއިޒީ އަށް މިހާތަނަށް މާ ރަނގަޅު ފުރުސަތުތަކެއް ވެސް ލިބިފައެއް ނުވެ އެވެ.
އޭނާ ފަހުން ކުޅުނު ފިލްމުތަކުގެ ތެރޭގައި "ހޭޓް ސްޓޯރީ 3" އާއި "ރޭސް 3" ހިމެނެ އެވެ. ޑެއިޒީ، 35، އަކީ އިންޑިއާގެ ރީޖަނަލް ފިލްމުތަކުގައި ވެސް މަސައްކަތްކުރާ ބަތަލާއެކެވެ.
* ސަލްމާނާ އެކު އެންމެ ފަހުން ބޮލީވުޑަށް ތައާރަފުވީ 21 އަހަރުގެ ސާއީ މަންޖްރޭކަރެވެ. އެއީ މިދިޔަ އަހަރު ރިލީޒްކުރި "ދަބަންގް 3" އިންނެވެ.
ސާއީ އަކީ އެކްޓަރު މަހޭޝް މަންޖްރޭކަރްގެ ދަރިއެކެވެ. މަހޭޝް އަކީ ސަލްމާންގެ ވަރަށް ގާތް އެކުވެރިއެކެވެ.