05 މެއި 2020 - 15:32
ކޮވިޑް-19 ގެ ހާލަތު ކުރިމަތިވި ނަމަވެސް، މިރިހި އައިލެންޑް ރިސޯޓުގެ ހުރިހާ މުވައްޒަފުން ފުލް މުސާރައިގައި އަންނަ ޖޫން މަހުގެ ނިޔަލަށް ގެންގުޅެން ނިންމާފައިވާ ކަމަށް އެ ރިސޯޓުން ބުނެފި އެވެ.
އެ ރިސޯޓުގެ ޖެނެރަލް މެނޭޖަރު މުހައްމަދު ޝަރީފު ވިދާޅުވީ، އެ ތަނުގެ އެއްވެސް މުވައްޒަފަކު ކަނޑާނުލައި ގެންގުޅެން ނިންމީ، މި ހާލަތުގައި ވެސް މުވައްޒަފުންނަށް ލުއި ގޮތްތަކެއް ފަހިކޮށްދިނުމަށެވެ. މި މުއްދަތުގައި އެއްވެސް މުވައްޒަފެއްގެ މުސާރައެއް ވެސް ކުޑައެއް ނުކުރާނެ އެވެ.
ޝަރީފު ވިދާޅުވީ، މި ހާލަތުގައި ވެސް މުވައްޒަފުން ގެންގުޅެނީ ސަރުކާރުގެ ރިލީފް ފަންޑުގެ ތެރެއިން ލުއި ގޮތްތަކެއް ލިބޭނެ ކަމަށް ބަލައިގެން ކަމަށެވެ.
"އިއުލާނުކޮށްފައި އޮތީ، އެކަމަކު އެކަމުގެ އެކަމާ ބެހޭ އެއްވެސް ހަބަރެއް ނުވޭ އަދިނުވޭ. އުންމީދު ކުރަނީ ޖުލައި ހިސާބުގައި ހުޅުވައިގެން ވެސް މަސައްކަތްތައް ކުރިއަށް ގެންދެވޭނެ ކަަމަށް،" އޭނާ ވިދާޅުވި އެވެ.
އެ ރިސޯޓުގައި މަސައްކަތް ކުރަނީ 158 މުވައްޒަފުންނެވެ.
ތައިލެންޑްގެ ކުންފުންޏެއް ކަމަށްވާ ހޮޓެލްސްއިން 2018 ވަނަ އަހަރު ހުޅުވި މި ރިސޯޓަކީ ފަސް ތަރީގެ ރިސޯޓެކެވެ. މި ރިސޯޓަކީ 38 ރޫމްގެ ކުޑަ ރިސޯޓެކެވެ.
ކޮވިޑް-19 އާ ގުޅިގެން ރާއްޖޭގެ ގިނަ ރިސޯޓުތަކަކުން ގިނަ މުވައްޒަފުންތަކެއް ނޯޕޭއަށް ފޮނުވާފައިވާ އިރު އެތައް ބައެއްގެ ވަޒީފާ ވެސް ވަނީ ގެއްލިފަ އެވެ. އެހެން ނަމަވެސް ބައެއް ރިސޯޓުތަކުން މި ހާލަތުގައި ވެސް މުވައްޒަފުން ވަކި ނުކޮށް، މުސާރައިން މިންވަރެއް އުނިނުކޮށް އަންނަނީ ނަމޫނާ ދައްކަމުންނެވެ. ކޮވިޑް-19 އަށް ރާއްޖެއިން 500 އަށް ވުރެ ގިނަ މީހުން ޕޮޒިޓިވްވެފައިވާ އިރު ބައެއް ރިސޯޓުތައް ކަރަންޓީނު ފެސިލިޓީތަކުގެ ގޮތުގައި ވެސް ބޭނުން ކުރަމުންދެ އެވެ.