29 އެޕްރީލް 2020 - 19:03
ހެލްތު ޕްރޮޓެކްޝަން އެޖެންސީ (އެޗްޕީއޭ) އިން މޮނީޓަރިންގެ ހާލަތަށް ގެނެސްފައިވަނިކޮށް ނ. މިލަދޫން ފުރި ބަޔަކު މިއަދު ހައްޔަރުކޮށްފި އެވެ.
ފުލުހުން ބުނިގޮތުގައި ފުރުން މަނާކޮށްފައިވަނިކޮށް މިލަދޫ ޓާސްކް ފޯހާއި ފުލުހުންނަށް ސިއްރުން އެ ރަށުން ފުރައިގެން ދިޔައީ 23 އަހަރާއި 30 އަހަރާއި 36 އަހަރުގެ އިތުރުން 38 އަހަރުގެ ދިވެހި ހަތަރު ފިރިހެނުން ކަމަށެވެ. އެ ހަތަރު މީހުން މިއަދު ހަވީރު ހައްޔަރު ކުރީ އެނބުރި އެރަށަށް އައުމުން ކަމަށް ވެސް ފުލުހުން ބުންޏެވެ.
މިލަދޫ މޮނީޓަރިންގެ ހާލަތަށް ގެނައީ މާލެ އިން މި މަހުގެ 15 ވަނަ ދުވަހު ފުރައިގެން ދިޔަ ށ. ނަރުދޫ އަމާޒު ބޯޓުގެ ބައެއް މީހުން ބައްޔަށް ޕޮޒިޓިވްވުމުންނެވެ. އެ ބޯޓުން ދަތުރުކުރި 13 ރަށުގެ މީހުންގެ ތެރޭގައި މިލަދޫ ބައެއް ވެސް ހިމެނެ އެވެ.
ހަލުއިކަމާ އެކު މިހާރު ފެތުރެމުންދާ ކޮވިޑް-19 ކޮންޓްރޯލްކުރަން އިއުލާންކޮށްފައިވާ ކުއްލި ނުރައްކަލުގެ ހާލަތުގެ ދަށުން، ހުއްދަ ނެތި އެއްރަށުން އަނެއް ރަށަށް ދަތުރުކުރުމަކީ މަނާކަމެކެވެ. މި އެންގުމާ ހިލާފުވާ މީހުން މީގެ ކުރިން ވެސް ފުލުހުން ވަނީ ހައްޔަރުކޮށްފަ އެވެ.
މާލެ އިން ކޮވިޑް-19 ފެނި، މާލެ ލޮކްޑައުން ކޮށްފައިވާއިރު، އަތޮޅުތެރޭގެ ރަށްރަށުން ވެސް ޒަރޫރީ ބޭނުމަކަށް ނޫނީ ދަތުރުކުރުން މިހާރު ވަނީ މަނާކޮށްފަ އެވެ. ރާއްޖެ އިން ކޮރޯނާވައިރަހަށް 256 މީހަކު ވަނީ ޕޮޒިޓިވްވެފަ އެވެ. އަތޮޅުތަކުން މި ބަލި ފެނިފައި ވަނީ ހއ. އުލިގަމާއި ކ. ތުލުސްދޫގެ އިތުރުން ށ. ނަރުދޫ އާއި ށ. މިލަންދޫ އިންނެވެ.