29 އެޕްރީލް 2020 - 16:19
ނިއު ދިއްލީ (އެޕްރީލް 29) - ޗައިނާގެ ދެ ކުންފުންޏަކުން އުފައްދާ ރެޕިޑް ޓެސްޓް ކިޓްތަކުގައި މައްސަލަ އުޅޭ ކަމަށް ބުނެ އިންޑިއާ އިން، ބައި މިލިއަން އޯޑަރު ކެންސަލް ކޮށްފި އެވެ.
ޗައިނާގައި އުފައްދާފައިވާ ކިޓްތައް ބޭނުން ކުރުން ވެސް އިންޑިއާ އިން މިހާރު ވަނީ ހުއްޓުވައިފަ އެވެ.
ޗައިނާގެ ކިޓްތަކުން ބައިގަޑިއެއްހާ އިރު ތެރޭ ނަތީޖާ ލިބެ އެވެ. އަދި ބަލި ޖެހިފައި ހުރި މީހެއް ނަމަ އެންޓިބޮޑީސް ވެސް ދެނެގަނެ އެވެ. އެ ކިޓްތަކުގެ ސަބަބުން، ބަލި ބޮޑަށް ފެތުރޭ އޭރިއާތައް އަވަހަށް ދެނެގަނެވޭނެ ކަމަށް އިންޑިއާ އިން ކުރިން ބުނެފައިވެ އެވެ.
އިންޑިއާގައި އެކަށީގެންވާ ގޮތެއްގައި ކޮރޯނާވައިރަހަށް ޓެސްޓް ނުކުރެވޭތީ ބަލި ފެތުރިފައި އޮތް މިންވަރު ދެނެގަންނަން ނޭނގޭ ކަމަށް ތަޖްރިބާކާރުން ބުނެ އެވެ. އެހެންވެ އަވަހަށް ޓެސްޓް ކުރެވޭނެ ގޮތެއް ހޯދުމަށް އިންޑިއަން މެޑިކަލް ރިސާޗް ކައުންސިލް (އައިސީއެމްއާރް) އިން ވަނީ ޗައިނާގެ ދެ ކުންފުންޏެއްގެ ކިޓްތައް އެތެރެ ކުރުމުގެ ހުއްދަ ދީފަ އެވެ.
ނަމަވެސް އިންޑިއާގެ ގިނަ ސްޓޭޓްތަކުން ވަނީ ޗައިނާ އިން ގެނައި ކިޓްތަކުގެ އެކިއުރެސީ ރޭޓް އެވްރެޖްކޮށް އުޅެނީ ފަސް ޕަސެންޓުގައި ކަމަށް ބުނެ ޝަކުވާ ކުރަން ފަށައިފަ އެވެ. އަދި ކޮރޯނާވައިރަހަށް ޕޮޒިޓިވްވެފައިވާކަން ޔަގީންވެފައިވާ މީހުންނަށް އެ ކިޓްތައް ބޭނުންކޮށްގެން ޓެސްޓް ކުރުމުން ވެސް ދައްކާފައި ވަނީ "ނެގެޓިވް" ކަމަށް ބުނެފައިވެ އެވެ.
އިންޑިއާ އަށް އެތެރެކޮށްފައި ވަނީ ގުއާންޒޫ ވޮންޑްފޯ ބަޔޯޓެކް އަދި ޒޫހައި ލިވްޒޮން ޑައިގްނޮސްޓިކްގެ އުފެއްދުންތަކެވެ.
އިންޑިއާ އިން ވަނީ 31,332 މީހުން ޕޮޒިޓިވްވެ 1،008 މީހުން މަރުވެފަ އެވެ.