22 އެޕްރީލް 2020 - 13:24
ދައުލަތުގެ ހަރަދަށް ޒިންމާވުމުގެ ގާނޫނުގައިވާ ފިސްކަލް އުސޫލުތަކަށް އަމަލުކުރަން އުނދަވޫ ހާލަތެއް، މިހާރު އުފެދިފައިވާތީ އެ ގާނޫނުގެ ބައެއް މާއްދާތަކަށް އަމަލުކުރުން އެއް އަހަރު ދުވަހަށް ހުއްޓައިލުމުގެ ހުއްދަ އަށް ސަރުކާރުން މަޖިލީހުގައި މިއަދު އެދިއްޖެ އެވެ.
ފިނޭންސް މިނިސްޓަރު އިބްރާހީމް އަމީރު ރައްޔިތުންގެ މަޖިލީހުގެ ރައީސަށް މިއަދު ފޮނުވި ސިޓީއެއްގައި ވިދާޅުވެފައި ވަނީ ދައުލަތުގެ ހަރަދަށް ޒިންމާވުމުގެ ގާނޫގެ 32 ވަނަ މާއްދާގެ ހ. އާއި ރ. އަދި ބ. އަށް އަމަލުކުރުން އެއް އަަހަރު ދުވަހަށް ހުއްޓައިލުމުގެ ހުއްދަ ދިނުމަށެވެ.
ސަސްޕެންޑް ކޮށްދޭން ސަރުކާރުން އެދިފައިވާ އެއް މާއްދާ އަކީ، ދައުލަތުގެ ހަރަދަށް ޒިންމާވުމުގެ ގާނޫނުގެ 32 ވަނަ މާއްދާގެ ހ. ގައި ބުނެފައި ވަނީ ސަރުކާރުން ދަރަންޏަށް މަރުކަޒީ ބޭންކުން ފައިސާ ނެގޭނީ 91 ދުވަހުގެ ތެރޭގައި އަނބުރާ ދައްކާ ގޮތަށް ކަމަށެވެ. އެގޮތަށް ނެގޭނީ މާކެޓް އިންޓަރެސްޓް ރޭޓަށް ނުވެ ދަށް ނުވާ ރޭޓެއްގައި އެޑްވާންސްގެ ގޮތުގައި ކަމަށް ވެސް އެ މާއްދާގައި ބުނެފައި ވެ އެވެ. މަރުކަޒީ ބޭންކް އެމްއެމްއޭއިން ދަރަންޏަށް ފައިސާ ނެގޭނެ މިންވަރެއް ވެސް އެ މާއްދާގައި ބުނެފައި ވެ އެވެ.
ސަސްޕެންޑް ކޮށްދޭން އެދިފައިވާ އަނެއް މާއްދާއަކީ ދައުލަތުގެ ހަރަދަށް ޒިންމާވުމުގެ ގާނޫނުގެ 32 ވަނަ މާއްދާގެ ރ. އެވެ އެ މާއްދާގައި ބުނެފައި ވަނީ 2016 ވަނަ އަހަރުގެ ޖެނުއަރީ އެކަކުން ފެށިގެން ސަރުކާރަށް ދަރަނީގެ ގޮތުގައި ފައިސާ ނަަގަންވާނީ ތަރައްގީގެ މަޝްރޫއުތަކަށާއި އިގުތިސާދީ ވަސީލަތްތައް ހޯދުމަށް އެކަނި ކަމަށެވެ. ދަރަނި އަދާކުރުމަށް ދަރަނި ނެގުން އެ މާއްދާއިން މަނާކޮށްްފައި ވެ އެވެ.
ސަސްޕެންޑް ކުރަން އެދިފައިވާ އަނެއް މާއްދާ ކަމަށްވާ 32 ވަނަ މާއްދާގެ ބ. ގައި އޮންނަނީ ރ. ގައިވާ އުސޫލުގެ އިސްތިސްނާ ހާލަތެވެ. އެއީ ދައުލަތުގެ ކޭޝްފްލޯ މެނޭޖް ކުރަން އެމްއެމްއޭއިން ފައިސާ ނަަގަން ދީފައިވާ ހުއްދަ އެވެ. އެ މާއްދާގައިވާ ގޮތުން އެގޮތަށް ނަގާ ފައިސާ 14 ދުވަހުގެ ތެރޭގައި އެމްއެމްއޭ އަށް އަނބުރާ ދައްކަން ޖެހޭނެ އެވެ.
ސަރުކާރުގެ ފަރާތުން ފިނޭންސް މިނިސްޓަރު އަމީރު ފޮނުއްވި ސިޓީގައި ވިދާޅުވެފައި ވަނީ ކޮވިޑް-19 ގެ ސަބަބުން ރާއްޖޭގެ އިގުތިސާދަށާއި މާލިއްޔަތަށް މިހާރު ކުރިމަތިވެފައިވާ ހާލަތަކީ ދައުލަތުގެ ހަރަދަށް ޒިންމާވުގެ ގާނޫނުގެ 32 މާއްދާގެ 36 ވަނަ މާއްދާގައި ބުނާ އިސްތިސްނާ ހާލަތަށް މިހާލަތް ފެތޭ ކަމަށެވެ.
"...މިހާރު އަމަލުކުރަމުންދާ ގާނޫނު، ގާނޫނު ނަމްބަރު 7/2013 ، ދައުލަތުގެ ހަރަދަށް ޒިންމާވުމުގެ ގާނޫނުގެ ދަށުން ކަނޑައަޅާފައިވާ ފިސްކަލް ހަމަތަކަކީ އެއަށް މިި މިނިސްޓްރީން އަމަލުކުރުން ލާޒިމު ހަމަތަކެއް ނަމަވެސް މިވަގުތު ދުނިޔެ އަށް ކުރިމަތިވެފައިވާ ކޮރޯނާ ވައިރަސް، ކޮވިޑް-19 ގެ ސަބަބުން ގައުމުގެ އިގުތިސާދީ އަދި މާލީ ހާލަތަށް ދިމާވެފައިވާ ގޮންޖެހުންތަކާ އެކު މިގާނޫނުގެ 32 ވަނަ މާއްދާގައި ކަނޑައަޅާފައިވާ ބައެއް ފިސްކަލް ހަމަތަކާ އެއްގޮތަށް އަމަަލުކުރުމަކީ އިގުތިސާދީ ގޮތުން ކުރެވޭނެ ކަމެއް ނޫނެވެ،" އަމީރުގެ ސިޓީގައި ވިދާޅުވެފައި ވެ އެވެ.