18 އެޕްރީލް 2020 - 17:23
މުމްބާއީ (އެޕްރީލް 18) - އިންޑިއާގެ ހުޅަނގުގެ މުމްބާއީގެ ކަނޑުގެ ސިފައިންގެ މަރުކަޒެއްގައި ކޮރޯނާވައިރަސް ފެތުރެމުންދާ ކަމަށް ޑިފެންސް އޮފިޝަލުން ބުނެފި އެވެ.
އިންޑިއާގެ ކަނޑުގެ ސިފައިންގެ ވެސްޓަން ކޮމާންޑުން މިހާތަނަށް ވަނީ 21 މީހުން ޕޮޒިޓިވްވެފަ އެވެ. ނަމަވެސް އިންޑިއާގެ ކަނޑުގެ ސިފައިންގެ އެއްވެސް މަނަވަރެއް އަދި ސަބްމެރިންއެއްގައި ވައިރަސް ފެތުރެމުން ނުދާ ކަމަށް އޮފިޝަލުން ބުނެ އެވެ.
ވައިރަހަށް ޕޮޒިޓިވްވި 21 މީހުން ވެސް އުޅެނީ އެއް ބްލޮކެއްގަ އެވެ. އެހެންވެ އެ ބްލޮކް މިހާރު ވަނީ ލޮކްޑައުންކޮށްފަ އެވެ.
ކޮރޯނާވައިރަސް ފެތުރުން ހުއްޓުވަން އިންޑިއާ އިން ކުރާ މަސައްކަތުގައި އެ ގައުމުގެ ކަނޑުގެ ސިފައިން އަންނަނީ މުހިންމު ރޯލެއް އަދާކުރަމުންނެވެ.
އެމެރިކާ އަދި ފްރާންސް ފަދަ ގައުމުތަކުގެ ސިފައިންގެ މަނަވަރުތަކުގައި ދަނީ ކޮރޯނާވައިރަސް ފެތުރެމުންނެވެ. އެމެރިކާގެ މަތިންދާ ބޯޓު އުފުލާ މަނަވަރު ތިއޮޑޯ ރޫޒްވެލްޓުން 500 ފަޅުވެރިން ޕޮޒިޓިވްވިއިރު އެކަކު ވަނީ މަރުވެފަ އެވެ. ފްރާންސްގެ ޝަލެ ޑެ ގައުލްގެ 2،000 ފަޅުވެރިންގެ ތެރޭން 668 މީހުން ވަނީ ޕޮޒިޓިވްވެފަ އެވެ.
އިންޑިއާ އިން މިހާތަނަށް ވަނީ 14,425 މީހުން ޕޮޒިޓިވްވެ 488 މީހުން މަރުވެފަ އެވެ.