17 އެޕްރީލް 2020 - 19:05
މާލެއަށް މިހާރު ފެތުރެމުން ދާ ކޮވިޑް-19 ކުރިއަށް އޮތް 14 ދުވަހުގެ ތެރޭގައި އެންމެ ޕީކަށް އަރާނެ ކަމަށާއި އެހެންކަމުން ކުރިއަށް މިއޮތީ ވަރަށް ސަމާލުވެ ތިބެ، ބުރަ މަސައްކަތްތަކެއް ކުރަން ޖެހޭ ދުވަސްތަކެއް ކަމަށް، އެޗުޕީއޭގެ ޑރ. ނަޒްލާ ރަފީގު މިއަދު ވިދާޅުވެއްޖެ އެވެ.
ދަރުބާރުގޭގައި އޮންލައިންކޮށް ކުރިއަށް ގެންދިޔަ ނޫސްވެރިންގެ ބައްދަލުވުމުގައި ޑރ. ނަޒްލާ ވިދާޅުވީ މި ހާލަތުގައި ބަލީގެ އާލާމާތެއް ފެންނަ ކޮންމެ މީހަކު ވެސް އެ މައުލޫމާތު އެޗްޕީއޭއަށް އެންގުން މުހިއްމު ކަމަށެވެ. މީގެ އިތުރުން މި ބަލި ޖެހޭ މީހުންނާ ދިމާވި މީހުން ހޯދަން ކޮންޓެކްޓް ޓްރޭސިންގެ މަސައްކަތް ވެސް ވަރަށް ބާރށް ކުރިއަށް ގެންދާނެ ކަމަށް އޭނާ ވިދާޅުވި އެވެ.
މާލެ ތެރެއިން ކޮވިޑް-19 އަށް ފުރަތަމަ ފަހަރަށް މިދިއަ ބުދަދުވަހު މީހަކު ޕޮޒިޓިވް ވުމާ އެކު މާލެ ވަނީ ލޮކްޑައުން ކޮށްފަ އެވެ. މިހާތަނަށް މި ބައްޔަށް މާލެއިން އަށް މީހަކު ޕޮޒިޓިވްވެ، ރާއްޖެއިން މި ބަލި ޖެހުނު މީހުންގެ އަދަދު ވަނީ 28 އަށް އަރައިފަ އެވެ. އޭގެ ތެރޭގައި 13 މީހުންނަކީ ދިވެހިންނެވެ.
ޑރ. ނަޒްލާ ވިދާޅުވީ މިއަދު ޕޮޒިޓިވްވި ތިން ކޭސްގެ ތެރެއިން ދެ ކޭސް، އެންމެ ފުރަތަމަ މާލެ ތެރެއިން ޕޮޒިޓިވް ތިން ކޭސްއާ ގުޅުމެއް ނެތް ކަމަށެވެ.
އެހެންކަމުން މިހާރު މާލެ ތެރޭގައި ކޮރޯނާވައިރަސް އާއި ކޮވިޑް-19 ފަތުރައިދޭ ތިން ކްލަސްޓާއެއް ފާހަގަވެއްޖެ ކަމަށް އޭނާ ވިދާޅުވި އެވެ.
މިއަދު ޕޮޒިޓިވް ވި ތިން ވަނަ މީހާ ގުޅުން އޮތީ ކޭސް-23 އާ އެވެ.
މި ތިން މީހުންނާ އެކު ހަތަރު ސަރަހައްދެއް މިއަދު ވަނީ މޮނިޓަރިން ހާލަތަށް ގެނެސްފަ އެވެ.
"މިހާތަނަށް ކޮންޓެކްޓްސް އިން ގޮތުގައި ފުރަތަމަ 21، 22، 23 ކޭސްގެ 305 ކޮންޓެކްޓް ފެނިފައިވޭ. މި ކޮންޓެކްޓްތަކުގެ ތެރޭގައި ބައެއް މީހުން އަލާމާތްތައް ހުރުމާ އެކު ޓެސްޓް ކުރުމުގެ ކަންކަން އެބަ ކުރެވޭ،" ޑރ. ނަޒްލާ ވިދާޅުވި އެވެ.
ޕޮޒިޓިވް ވި ކޭސްތަކާ ގުޅިގެން ސުވާލުކުރާ މީހުން ވެސް ތެދު މައުލޫމާތު ދޭން އޭނާ ވަނީ އެދިވަޑައިގެންފަ އެވެ. އެހެން ނޫނީ އެއީ އެންމެންނަށް ވެސް އޮތް ނުރައްކަލެއްކަން ފާހަގަކުރައްވާ، ޑރ. ނަޒްލާ ވިދާޅުވީ ރަނގަޅު މައުލޫމާތު ނުލިބި ހޭދަވާ ކޮންމެ ގަޑި އިރަކީ ވެސް އިތުރު އެހެން ވައިރަސް އަރާފާނެ ފުރުސަތެއް ކަމަށެވެ.
ކޮވިޑް-19 ގެ ކަންކަމާ ގުޅޭ ތަރުޖަމާން މުހައްމަދު މަބްރޫކް އަޒީޒު ވިދާޅުވީ އެހެން ގައުމުތަކާ ހިލާފަށް ރާއްޖޭގައި ޕޮޒިޓިވް ވެފައިވާ މީހާ ކޮންޓެކްޓްވާ މީހުން ވެސް އިތުރު ކަމަށެވެ.
"ބައްދަލުވެފައި ތިބި މީހުން ގިނަ. އެއީ މިސާލަކަށް އެވްރެޖުކޮށް 30 މީހުންނަށް ކޮންމެ ދުވަހަކު ދިމާވާ އިރު ރާއްޖޭގައި އެކަން މިފެންނަނީ 40 އިން މަތީގައި ވެސް އެވްރެޖް ޑެއިލީ ކޮންޓެކްޓްސް އުޅޭތަން،" އޭނާ ވިދާޅުވި އެވެ.
މި ވާހަކައާ ގުޅިގެން އޭނާ ދެން ވެސް ދެއްވީ ކުރިންސުރެ ވެސް ދެއްވާ ނަސޭހަތެވެ: ގައިދުރުކުރުމެވެ. ބޭރަށް ނުކުންނަން ޖެހިއްޖެ ހާލަތެއްގައި ވެސް، އެހެން މީހުންނާ ދުރުގައި ތިބެން މަބްރޫކް އިލްތިމާސްކުރެއްވި އެވެ.