16 އެޕްރީލް 2020 - 19:44
މާލެ އިން ކޮވިޑް-19 އަށް ފުރަތަމަ ޕޮޒިޓިވްވި މީހާއާ ހަމައަށް ކޮރޯނާ ވައިރަސް އައީ ކާކުގެ ފަރާތުންކަން ދެނެގަތުން (އިންޑެކްސް ކޭސް) ހޯދުން ވަރަށް ބޮޑަށް އުނދަގޫވެފައިވާކަމަށް ނެޝަނަލް އިމަޖެންސީ އޮަޕަރޭޝަން ސެންޓަރުން މިއަދު ބުނެފި އެވެ.
އެންއީއޯސީން މިއަދު ހަވީރު ބޭއްވި ޕްރެސް ބްރީފިންގައި އެޗްޕީއީގެ ޑޮކްޓަރު ޑރ. އިބްރާހީމް އަފްޒަލް ވިދާޅުވީ މާލޭގެ ފުރަތަމަ ކޭސްތަކުގެ އިންޑެކްސް ކޭސް ހޯދަން އެހާ އުނދަގޫވީ ޕޮޒިޓިވްވި މީހުންނާ ކޮންޓެކްޓްވެފައިވާ މީހުންގެ ގިނަ ކަމުން ކަމަށެވެ. އެގޮތުން މާލޭގެ ފުރަތަމަ ކޭސް ކަމަށް ބަލާ މީހާ އެ ބައްޔަށް ޕޮޒޓިވްވުމުގެ ކުރިން އެންމެ ފަސް ދުވަހުގެ ތެރޭގައި 200 އަށް ވުރެ ގިނަ މީހުންނާ އޭނާ ކޮންޓެކްޓްވެފައިވާ ކަމަށް ޑޮކްޓަރު ވިދާޅުވި އެވެ.
އަފްޒަލް ވިދާޅުވި ގޮތުގައި ކޮވިޑް-19 އަށް ޕޮޒިޓިވްވި މީހުން، ޕޮޒިޓިވްވި ފަހުން ބައްދަލުވި މީހުން ހޯދަން ކުރަމުން އަަންނަ މަސައްކަތާ އެކު ކުރަމުން އަންނަ އަނެއް މަސައްކަތަކީ އިންޑެކްސް ކޭސް ހޯދުމުގެ މަސައްކަތެވެ. އެކަމަކު އެއީ ވަކި މިވެނި މީހެއް ކަަމަށް ބަލާނެ އެކަކު ވެސް އަދި ފާހަގަ ނުވާ ކަމަށް އޭނާ ވިދާޅުވި އެވެ.
"އަޅުގަނޑުމެންނަށް ޝައްކު ކުރެވޭ، މިހާރު މިއީ ރަނގަޅު ކެންޑިޑޭޓެކޭ އިންޑެކްސް އަށް ވުމުގެ، އެގޮތަށް އައިޑެންޓިފައި ކުރެވިފައެއް އެކަކު ވެސް ނެތް. އެގޮތަށް ކެޓަގަރައިޒް ކުރެވޭނެ ވަރުގެ އިންފޮމޭޝަން ލިބިފައިވާ މީހަކު ނެތް. އެހެންވީމާ އަޅުގަނޑުމެންނަށް ކޮންމެވެސް ވަރެއްގެ ދަތިތަކެއް މިއުޅެނީ،" އަފްޒަލް ވިދާޅުވި އެވެ.
އޭނާ ވިދާޅުވި ގޮތުގައި ދުނިޔޭގެ އެހެން ގައުމުތަކުގައި އޮތް ފަދައިން ރާއްޖޭގައި އާއްމުންގެ ތެރޭގައި ކޮވިޑް-19 ހަގީގަތުގައި ފެތުރިފައި އޮތް ކަމަށް ބަލާނީ އިންޑެކްސް ކޭސް ނުހޯދިއްޖެ ނަމަ އެވެ. ބަލި ޖެހިފައި ނުވަތަ ބަލި ރަނގަޅު ވެފައިވާ، އެހެން ނަމަވެސް ނޭނގިވާ ބަޔަކު ރާއްޖޭގައި ތިބި ކަމަށް ބަލާނީ އެ ހިސާބުންނެވެ.
"އެހެންވީމާ އެ ހިސާބުން އެެއޮތީ ޓްރޫ ކޮމިއުނިޓީ ސްޕްރެޑްގެ ޕިކްޗާއަށް އައިސްފައިި،" ޑޮކްޓަރު ވިދާޅުވި އެވެ.
މާލެ ލޮޮކްޑައުންކޮށް، މިހާރު އަޅާފައިވާ ފިޔަވަޅުތަކަކީ އިންޑެކްސް ކޭސް ހޯދުމާއި ޕޮޒިޓިވްވި މީހުންގެ ކޮންޓެކްޓްސް ހޯދަން ކުރަން ޖެހޭ މަަސައްކަތްތަކަށް ޓަކައި އަޅާފައިވާ ފިޔަވަޅުތަކެވެ. އަފްޒަލް ވިދާޅުވި ގޮތުގައި އިންޑެކްސް ކޭސް ނުހޯދި، ކޮމިއިނިޓީީ ސްޕްރެޑް އޮތް ކަމަށް ބަލާ ހިސާބުން ފިޔަވަޅުތައް ތަފާތުވާނެ އެވެ އެއީ މާލެ އަބަދު ލޮކްޑައުންގައި ނުބޭއްވޭނެތީ ކަމަށް އޭނާ ވިދާޅުވި އެވެ.
"ކޮމިއުނިޓީ ސްޕްރެޑް އުޅެއޭ ކިޔާފައި އަޅުގަނޑުމެންނަކަށް ތާއަބަދަލު ލޮކްޑައުން އަކު ނުބޭތިެއްބޭނެ. ދެން އަޅުގަނޑުމެން ޖެހޭނީ ސެކަންޑް އޮފްޝަންއަކަށް ދާން،" އޭނާ ވިދާޅުވި އެވެ. އެހިސާބުން ޖެހޭނީ އޭނާ ވިދާޅުވި ގޮތުގައި "ކޮވިޑާ އެކު ދިރިއުޅެން" ދަސްކުރާށެވެ.
- ކޮވިޑް-19 އަށް ޕޮޒިޓިވްވި މީހާގެ ފަރާތުން އަލާމާތްތައް ފެނުނު ތާރީހުގެ ދެ ދުވަސް ކުރިން ބައްދަލުވި މީހުން ހޯދުން
- އަލާމާތް ފެނުނު ތާރީހާ މެދު ޚިޔާލު ތަފާތު ވާނަމަ( ދެ ތާރީޚެއް އޮތް ނަމަ) ބަލާނީ ކުރީގެ ތާރީހަށް.
- އެކަމަކު އޭނާ އަށް ބަލި ޖެހުނު ގޮތް ބަލަން، ޖެހޭތީ، ބަލި ޖެހުނު ތާރީހުން ފެށިގެން ފަހަތަށް 14 ދުވަސް ގުނައި، އެ މުއްދަތުގައި ބައްދަލުވި މީހުން ހޯދުން.
- ބައެއް ހާލަތްތަކުގައި 28 ދުވަސް ނަގާނެ.
މާލޭގެ ފުރަތަމަ ކޭސް ކަމަށް ބަލާ އަންހެން މީހާގެ ފިރިމީހާ ކޮވިޑް އަށް ނެގެޓިވް ވިޔަސް އޭނާއާ މެދުގައި ވެސް އަދި ގިނަ ކަންތައްތަކެއް ބަލާނެ އެވެ އަފްޒަލް ވިދާޅުވީ އޭނާ ދެ ހަލާތެއްގައި ހުރެދާނެ ކަމަށެެވެ. އެއް ހާލަތަކީ އޭނާ ބަލި ޖެހުމަށް ފަހު ރަނގަޅުވެފައި ހުރުމެވެ. އަދި އަނެއް ހާލަތަކީ ޓެސްޓުން ފެންނަވަރުގެ ވައިރަލް ލޯޑެއް އޭނާގެ ނެތުމެވެ.
"އެންޓި-ބޮޑީ ޓެސްޓުން އިނގޭނެތާ އޭނާއަށް ބަލި ޖެހިފައިތޯ ހުރީ ކުރިން،" އަފްޒަލް ވިދާޅުވި އެވެ.
ޑޮކްޓަރު ވިދާޅުވީ އެ މުއްދަތުގައި ބައްދަލުވި މީހުން ހޯދާނީ އޭނާގެ ހަނދާނާއި، އޭނާ ގޮސްފައިވާ ތަންތަން ދެނެގަނެގެން ކަމަށެވެ. އެހެންވެ، ޕޮޮޒިޓިވް ކޭސްތަކުގައި ހިމެނޭ މީހުންނާ ކޮންޓެކްޓްވި ފަރާތްތައް އަމިއްލަ އަށް އެޗްޕީއޭ އަށް ރިޕޯޓް ކުރަން އެންއީއޯސީން އިލްތިމާސް ކުރެ އެވެ.