15 އެޕްރީލް 2020 - 12:22
ކޮވިޑް-19 ގެ ސަބަބުން އެކި ގައުމުތަކުގައި ތާށިވެފައި ތިބި ދިވެހިންނަށް އެހީވާން މިހާތަނަށް 7.5 މިލިއަން ރުފިޔާ ހަރަދުކޮށްފައިވާ ކަމަށް ސަރުކާރުން ރޭ ބުނެފި އެވެ.
ކޮވިޑް-19 ގެ މައުލޫމާތު ދިނުމަށް ނޭޝަނަލް އެމަޖެންސީ އޮޕަރޭޝަން ސެންޓަރު (އެންއީއޯސީ) ގައި ބޭއްވި ނިއުސް ކޮންފަރެންސްގައި، ތަރުޖަމާނު މަބްރޫކް އަޒީޒް ވިދާޅުވީ ރާއްޖޭން ބޭރުގައި ތިބި މީހުންގެ ކަންކަން ހަމަޖައްސަން ފޮރިން މިނިސްޓްރީން 7.5 މިލިއަން ރުފިޔާ ހަރަދުކޮށްފައިވާ ކަމަށެވެ. ނަމަވެސް ތަފްސީލުތަކެއް އަދި ހިއްސާއެއް ނުކުރައްވަ އެވެ.
މި ފައިސާ ޚަރަދުކޮށްފައިވަނީ އާސަންދަ އާއި އެންސްޕާގެ އެހީ ފިޔަވައި އެހެން ބޭނުންތަކުގައި އެކި ގައުމުތަކުގައި ގޮސް ތިބި މީހުންނަށް ކަމަށެވެ. އޭގެ ތެރޭގައި އެ ގައުމުތައް ލޮކްޑައުން ކުރުމުގެ ސަބަބުން ހާލުގައި ޖެހިފައި ތިބި މީހުން ހިމެނެ އެވެ.
ބޭސްފަރުވާ އަށް އިންޑިއާ އަދި ސްރީ ލަންކާގައި ތިބި މީހުންގެ ކެއުމާއި ހުރުމުގެ ކަންކަމަށް އާސަންދަ އާއި އެންސްޕާ އިން އަންނަނީ އެހީތެރިކަން ދެމުންނެވެ. އެ މީހުން ރާއްޖެ ނާދެވި ލަސްވަނީ، އެ ގައުމުތައް ލޮކްޑައުން ކުރުމުގެ ސަބަބުން ފްލައިޓުތައް ކެންސަލްވުމުންނެވެ.
އެންއީއޯސީން ބުނީ އާސަންދަ އަދި އެންސްޕާގެ އެހީގައި ބޭރުގައި ތިބި މީހުންގެ ކަންކަމަށް މިހާތަނަށް 1.5 މިލިއަން ރުފިޔާ ހަރަދުކޮށްފައިވާ ކަމަށެވެ.
ރާއްޖޭން މިހާތަނަށް ކޮރޯނާވައިރަހަށް ޕޮޒިޓިވް 21 މީހަކު ފެނިފައިވާއިރު މިއަދު ވަނީ ފުރަތަމަ ފަހަރަށް މާލޭން ވެސް ޕޮޒިޓިވް މީހަކު ފެނިފަ އެވެ. ދެން ޕޮޒިޓިވްވި ފަސް ދިވެހިންނަކީ ރާއްޖޭން ބޭރުން އައިސް ކަރަންޓީނުކޮށްފައި ތިބި ފަސް ދިވެއްސެކެވެ. އޭގެ އިތުރުން ޕޮޒިޓިވްވީ ޓޫރިސްޓުންނާއި ރިސޯޓްތަކުގެ ބިދޭސީ މުވައްޒަފުންނެވެ.