31 މެއި 2016 - 11:36
ބެންކޮކް (މެއި 31) - ތައިލެންޑުގެ މަޝްހޫރު ފައްޅިއެއްގައި ގެންގުޅޭ 137 މިނިކާވަގު ހިފުމުގެ މަސައްކަތް ކަމާބެހޭ ފަރާތްތަކުން ފަށައިފި އެވެ.
އެ މަސައްކަތަށް ހުރަސް އެޅުމަށް "ޓައިގަރު ޓެމްޕަލް" ނަމުން މަޝްހޫރުވެފައިވާ ފައްޅީގެ ހާމުދުރުން ވަނީ ގަސްދުގައި އެ މިނިކާވަގުތައް ދޫކޮށްލާފައިވާ ކަމަށް އޮފިޝަލުން ވިދާޅުވި އެވެ.
"އަޅުގަނޑުމެންގެ ޓީމުތައް އެ ތަނަށް ދިޔައިރު، މިނިކާ ވަގުތައް މުޅިތާ އުޅޭ. އަޅުގަނޑުމެންނަށް ގަބޫލު ކުރެވެނީ މިނިކާ ވަގުތައް ގަސްދުގައި ދޫކޮށްލީ އަޅުގަނޑުމެންގެ މަސައްކަތަށް ހުރަސްއަޅަން ވެގެން ކަމަށް،" ވައިލްޑް ލައިފް ކޮންސަވޭޝަން އޮފީހުގެ އޮފިޝަލަކު ސީއެންއެން އަށް ވިދާޅުވި އެވެ.
މިނިކާވަގުތަކާ އެކީ ފޮޓޯ ނަގަން ލިބޭތީ، އެ ފައްޅިއަކީ ޓޫރިސްޓުންގެ މެދުގައި ވަރަށް މަގުބޫލު ތަނެކެވެ. ނަމަވެސް، އެ މިނިކާވަގުތަކަށް އިހާނެތިކޮށް ހިތާ، ބައެއް ޓޫރިސްޓުންނަށް ހަމަލާދޭ ކަމަށް ބުނެ ކުރި ޝަކުވާތަކަކާ ގުޅިގެން، އެތަނުން މިނިކާވަގުތައް ގެންދިއުމަށް ތައިލެންޑުގެ ކަމާބެހޭ ފަރާތްތަކުން ވަނީ ނިންމައިފަ އެވެ.
ކޯޓު އަމުރެއްގެ ދަށުން އެ މިނިކާވަގުތައް ގެންދިއުމުގެ މަސައްކަތުގައި 2،000 ވުރެ ގިނަ އޮފިޝަލުން މަސައްކަތް ކުރަމުން އަންނަ ކަމަށް މީޑިއާ ރިޕޯޓްތައް ބުނެ އެވެ.
އެ ފައްޅީގެ އޮފިޝަލަކު ވިދާޅުވީ އެ ކޯޓު އަމުރަށް ތަބާވާނެ ކަމަށެވެ. އެހެން ނަމަވެސް، އެ މިނިކާވަގުތައް އެ ތަނުން ގެންދިއުމަކީ އެ އަވަށުގެ ޓޫރިޒަމަށް އިޔާދަ ނުކުރެވޭ ވަރުގެ ގެއްލުން ވާނެ ކަމެކެވެ.
ވައިލްޑް ލައިފް ކޮންޒަވޭޝަން އޮފީހާއި އެ ފައްޅިއާ ދެމެދު 2001 ވަނަ ވެވުނު އެއްބަސްވުމެއްގެ ދަށުން، މާލީ އެއްވެސް މަންފާއެއް ނުވާ ގޮތަށް ޝަރުތުކޮށް، އެ މިނިކާވަގުތައް އެ ފައްޅީގައި ގެންގުޅުމުގެ ހުއްދަ ވަނީ ދީފަ އެވެ. ނަމަވެސް، އެ މިނިކާވަގުތަކާ އެކީ ފޮޓޯ ނެގުމާއި، ކާން ދިނުމުގެ ފުރުސަތު ޓޫރިސްޓުންނަށް ލިބެނީ ފީއެއް ދައްކައިގެންނެވެ. އެކަމުގެ ދިފާއުގައި އެ ފައްޅީގެ އޮފިޝަލުން ވިދާޅުވެފައި ވަނީ، އެ ފައިސާ ބޭނުންކޮށްފައި ވަނީ އެ މިނިކާވަގުތަކަށް ކާންދީ ބެލެހެއްޓުމަށް ކަމަށެވެ. --ބީބީސީ