06 އޮކްޓޯބަރ 2016 - 09:39
ލަންޑަން (އޮކްޓޯބަރު 6) - ފުޓްބޯޅަ ކުޅުންތެރިންގެ އޭޖެންޓުންނަކީ ފުޓްބޯޅައަށް ޖެހިފައިވާ ކެންސަރެއް ކަމަށާއި ކުޅުންތެރިންނަށް އޭޖެންޓުން ބޭނުންނުވާ ކަމަށް އިޓަލީގެ ނަޕޯލީގެ ވެރިޔާ އޯރެލިއޯ ޑި ލޯރެންޓިސް ވިދާޅުވެއްޖެ އެވެ.
އިޓަލީގެ މަޝްހޫރު ފިލްމް ޕްރޮޑިއުސަރު ވިދާޅުވީ ހޮލީވުޑުގައި އޭޖެންޓުންނަށް އަގު ދޭނީ އެކްޓަރު ކަމަށާއި ފުޓްބޯޅައިގައި ކްލަބްތަކުން އޭޖެންޓުންނަށް ފައިސާ ދޭން ޖެހޭ ސަބަބެއް ނުވިސްނޭ ކަމަށެވެ.
އޭނާ ވިދާޅުވީ ކުޅުންތެރިން ގަނެ ވިއްކުމުގެ ބައެއް ޑީލްތައް، އޭޖެންޓުންގެ ސަބަބުން ކުރިއަށް ނުގޮސް އެބަހުރި ކަމަށެވެ.
"އޭޖެންޓުންނަކީ މި ކުޅިވަރަށް ޖެހިފައިވާ ކެންސަރެއް. އަހަރެން މި ދައްކަނީ ހުރިހާ އެންމެންގެ ވާހަކައެއް ނޫން. އަހަންނަށް ނުވިސްނޭ ކުޅުންތެރިންނަށް އޭޖެންޓުން ބޭނުންވާ ސަބަބެއް،" އޭނާ ވިދާޅުވި އެވެ.
ޑި ލޯރެންޓިސްގެ ވާހަކަތަކައް ރައްދު ދެއްވަމުން ފުޓްބޯޅަ އޭޖެންޓުންގެ އެސޯސިއޭޝަނުގެ ރައީސް މެލް ސްޓެއިން ވިދާޅުވީ ބައެއް ކްލަބްތަކުގެ ވެރިންނަކީ ވެސް އެފަދަ ކެންސަރެއް ކަމަށެވެ.
"ރަނގަޅު، އެބައުޅޭ ގޯސް އޭޖެންޓުން ވެސް. އެކަމަކު އޭޖެންޓުންނަށް ނިސްބަތްކޮށް ކެންސަރެކޭ ބުނުވޭނެ ޖާގައެއް ނެތް،" ސްޓެއިން ވިދާޅުވި އެވެ.
ކުޅުންތެރިންގެ އަގުބޮޑުކުރުމާއި ކުޑަކުރުމުގެ މައިގަނޑު ހުރިހާ ބާރެއް އޮންނަނީ އޭޖެންޓުގެ އަތުގަ އެވެ. އެގޮތުން ދާދި ފަހުން މެންޗެސްޓާ ޔުނައިޓެޑަށް ޔުވެންޓަސް އިން ވިއްކާލި ޕައުލް ޕޮގްބާގެ ޑީލުގެ އަގު ބޮޑުވުމުގައި އޭނާގެ އޭޖެންޓް މިނޯ ރައިއޯލާގެ ދައުރު ބޮޑެވެ. އަދި އެފަދަ ޑީލްތަކުން އޭޖެންޓުން ބޮޑު އަގެއް ވެސް ނަގަ އެވެ.