20 އޮކްޓޯބަރ 2019 - 13:51
މަޖީދިއްޔާ ސްކޫލްގެ ސްޕޯޓްސް ފެސްޓިވަލް 900 އަށް ވުރެ ގިނަ ދަރިވަރުންނާއެކު އިއްޔެ ފަށައިފި އެވެ.
އެ ސްކޫލްގެ ލީޑިން ޓީޗަރު އިސްމާއިލް މުހައްމަދު ވިދާޅުވީ ކީ ސްޓޭޖް 1 އަދި 2 ގެ ދަރިވަރުންނަށް ބާއްވާ ފެސްޓިވަލްގައި އަންހެން ދަރިވަރުންނަށް ހާއްސަކޮށްފައިވަނީ ހޭންޑްބޯލް ކަމަށެވެ. ފިރިހެން ދަރިވަރުން ކުޅޭނީ ފުޓްބޯޅަ އެވެ.
މުބާރާތަށް ކޮންމެ ކްލާހަކުން ވެސް ހޭންޑްބޯލް އަދި ފުޓްބޯޅަ ޓީމެއް ނަގާފައި ވެ އެވެ. އެ ކޮންމެ ކްލާހަކުން ވެސް، އެ ގްރޭޑުގެ އެހެން ކްލާހަކާ ދެކޮޅަށް ކުޅޭނެ އެވެ.
މި ކުޅިވަރު ހަރަކާތުގައި ބައިވެރިވި ޓީމުތަކުގެ މެޗުތައް އިއްޔެ ކުޅެ ނިންމައި، މިއަދު ހަވީރު 4:00 ގައި ހެންވޭރު ދަނޑުގައި އޮންނާނީ ފައިނަލް މެޗެވެ.
ކިިޔެވުމާއެކު ދަރިވަރުންނަށް ތަފާތު އެކި ހުނަރުތައް ދަސްކޮށްދިނުމަކީ ސަރުކާރުގެ އެންމެ ބޮޑު އެއް ވައުދެވެ. އެ ސިޔާސަތުގެ ދަށުން ސްކޫލުތަކުގައި އަންނަނީ ތަފާތު ހަރަކާތްތަކާއެކު ކިޔަވައިދެމުންނެވެ.
އިސްމާއިލް ވިދާޅުވީ އެގޮތަށް ބާއްވާ މުބާރާތްތަކުގައި ދަރިވަރުންގެ ފުރިހަމަ ބައިވެރިވުން އޮންނަކަމަށެވެ. ތަފާތު ކަންތައްތައް ދަސްވެ، ކިޔެވުމުގައި އިތުރަށް ޝައުގުވެރިވާކަން ފާހަގަވާ ކަމަށް ވިދާޅުވި އެވެ.
"ހުރިހާ ކުދިން ޝާމިލްކޮށްގެން މުބާރާތް ބާއްވާއިރު ވަރަށް މަޖާ މާހައުލެއްގައި ކުރިއަށްދަނީ. ވަރަށް ގިނަ ކަންތައްތައް ދަސްވެގެންދޭ. އިތުރު ހަރަކާތްތަކުގެ ހެޔޮ ފައިދާ ފެނޭ،" އޭނާ ވިދާޅުވި އެވެ.