21 އޮކްޓޯބަރ 2019 - 06:38
އަންނަ މަހު ރިލީޒްކުރާ ފިލްމު "ބާލާ" ގެ ޕްލޮޓަށް ކޮޕީގެ ތުހުމަތުކޮށް، ފިލްމުގެ ޓީމަށް ދައުވާކުރާނެ ކަމުގެ އިންޒާރު މިދިޔަ ހަފުތާގައި ދީފައި ވަނިކޮށް، އަނެއްކާ ވެސް މިފަދަ އެހެން މައްސަލައެއް ކުރިމަތިވެއްޖެ އެވެ.
ޕްރޮޑިއުސަރު ދިނޭޝް ވިޖަންގެ ފިލްމު ކުންފުނި މެޑޮކް ފިލްމްސް އަށް ދައުވާކުރާނެ ކަމުގެ އިންޒާރު މި ފަހަރު ދިނީ ހުއްދަ ނެތި އެހެން މީހެއްގެ ލަވައެއް ބޭނުންކުރި މައްސަލަގައި އެވެ.
އެގޮތުން އިނގިރޭސިވިލާތަށް އުފަން އިންޑިއާ ދަރިކޮޅު މިއުޒިޝަން ޑރ. ޒިއަސް 2004 ގައި ނެރުނު ލަވަ "ޑޯންޓް ބީ ޝައި އެގެއިން" ގެ އާ ވާޝަނެއް "ބާލާ" ގައި ހިމަނާފައި ވަނީ ހުއްދަ ނެތި ކޮޕީރައިޓް ގާނޫނާ ހިލާފަށް ކަމަށް ވާތީ ދައުވާކުރާނެ ކަމުގެ އިންޒާރު އޭނާ ވަނީ ދީފަ އެވެ.
ޒިއަސް ކުރި ޓްވީޓެއްގައި "ބާލާ" ގެ މިއުޒިކް ލޭބަލް ސޮނީ މިއުޒިކް އިންޑިއާ އާއި ސޮނީ މިއުޒިކް ޔޫކޭ އާއި މެޑޮކް ފިލްމްސް އާއި ލަވަކިޔުންތެރިޔާ/ރެޕާ/ކޮމްޕޯޒަރު ބާދުޝާ އާއި މިއުޒިކް ޑައިރެކްޓަރުން ކަމަށްވާ ސަޗިން-ޖިގަރު ޓެގްކޮށް "ޑޯންޓް ބީ ޝައި އެގެއިން" އަކީ ކޮން އިރަކު ކޮމްޕޯޒްކުރި ލަވައެއްތޯ ސުވާލުކޮށްފައިވެ އެވެ.
"އަދި އަހަރެންގެ ކުރީގެ ހިޓް ލަވައެއް ބޭނުންކުރުމަކީ ކަލޭމެން ލަދުގަންނަން ޖެހޭނެ ކަމެއް. ނިކަން އޮރިޖިނަލް މަސައްކަތެއް ކޮށްބަލަ." ޒިއަސް ބުންޏެވެ. "އަހަރެން މި ދަނީ މި މައްސަލާގައި ލޯޔަރާ ވާހަކަ ދައްކަމުން."
ހުއްދަ ނެތި ލަވަ ކޮޕީކޮށް ބޭނުންކުރި މައްސަލާގައި "ބާލާ" ގެ ޓީމުން އަދި އެއްވެސް ވާހަކައެއް ނުދައްކަ އެވެ. ވީޑިއޯ ވެސް އާންމުކޮށްފައިވާ ފިލްމުގެ ލަވައިގެ މިއުޒިކް ކްރެޑިޓް ދީފައި ވަނީ ސަޗިން-ޖިގަރަށެވެ. އަދި ލަވަކިޔާފައި ވަނީ ބާދުޝާ އާއި ޝަލްމާލީ ޚޯލްގަޅޭ އެވެ.
އަންނަ މަހުގެ 7 ގައި ރިލީޒްކުރާ "ބާލާ" އަކީ އަމަރު ކޯޝިކް ޑައިރެކްޓްކޮށްފައިވާ ބްލެކް ކޮމެޑީއެކެވެ. މީގެ ކާސްޓުންނަކީ އަޔޫޝްމަން ކުރާނާ އާއި ބޫމީ ޕެޑްނޭކަރާއި ޔާމީ ގޯތަމެވެ.
އަންނަ މަހުގެ 8 ގައި ރިލީޒްކުރާ "އުޖްޅާ ޗަމަން" ގެ ޓީމުން ދައުވާކުރާ ގޮތުގައި "ބާލާ" އަކީ އެ މީހުންގެ ފިލްމުގެ ޕްލޮޓުން ވައްކަންކޮށްގެން ހަދާފައިވާ ފިލްމެކެވެ. ދެ ފިލްމުގައި ވެސް ކިޔައި ދެނީ ތަލަ ޒުވާނަކަށް ދިމާވާ ހެއްވާ މަޖާ ހާދިސާތަކެވެ.