20 އޮކްޓޯބަރ 2019 - 06:21
ރަނގަޅަށް މޫނު ދޮންނަ ނަމަ އިތުރު އޮށާޅަތައް ނެގުމުން ދުރުކޮށްދީ ހަންގަނޑު ސާފުކޮށްދީ ހަމުގެ ދުޅަކަން ވެސް ކުޑަވާނެ ކަމަށް ހަމުގެ ޑޮކްޓަރުން ބުނެ އެވެ. ދޮވުމުގައި ތަފާތު ދައްކައިދެނީ ހަމައެކަނި ދޮންނަ ގޮތަކުން ނޫނެވެ. ދޮންނަނީ ކިތައް ފަހަރު ކަމާއި، ބޭނުންކުރާ ބާވަތްތައް ވެސް އެއީ މުހިންމު ކަންކަމެވެ.
މޫނު ދޮވެލުމަކީ އާދައިގެ ކަމެކެވޭ ހީވިޔަސް ބައެއްފަހަރު ކުދިކުދި ގޯސް ހެދިފައި ހުރެ އެވެ. ތިރީގައި މިހިމަނާލަނީ ފާހަގަކުރެވޭ މިފަދަ ބައެއް ކަންކަމެވެ.
މޭކަޕް ނުކުރާ މީހަކަށް ވިޔަސް ދުވާލުގެ ވަގުތު ހަމުގައި ހުންނަ ގުދުރަތީ ތެޔޮކަމާއި މޫނުން ހިއްލާ ދާ އެކުވެ އެވެ. އަދި ހަތަރުދަމު އެއްތަނުން އަނެއް ތަނަށް ގޮސް އުޅުމުގެ ތެރޭގައި ހިރަފުހާއި ހަޑީގެ އަސަރު ހަންގަނޑުގެ ބޭރުފުށަށް ކުރެ އެވެ. މިހުރިހާ އެއްޗެއް ސާފުކުރުމެއްނެތި އެ ހުރިގޮތަށް ނިދަން އޮންނަ ނަމަ ހިރުވުމާއި، އޮށާޅަ ނެގުމަށް މަގުފަހިވެ އެވެ.
މޫނު ދޮންނަ ބާވަތެއް އިހްތިޔާރު ކުރާއިރު ފުރަތަމަ ވެސް ބަލަން ވާނީ ތިމާގެ ހަމުގެ ވައްތަރާ ގުޅޭތޯ އެވެ. ހިކި ހަންގަނޑެއްތޯ ނުވަތަ ތެޔޮކޮށް ހުންނަ ހަން ނުވަތަ ދެބައި އެކުލެވޭ ހަންގަނޑެއް ނަމަވެސް އެހަމަކާ ގުޅޭގޮތުން ހޯދުމަކީ ވަރަށް މުހިންމު ކަމެކެވެ.
ގަނޑު ސައިބޯނި ބޭނުންކުރާ ނަމަ ހަމުގައި ހުންނަ ގުދުރަތީ ތެތްކަން ނެތުމުގެ ފުރުސަތު އޮވެ އެވެ. އޭގެ ބަދަލުގައި ބޭނުން ކުރަންވީ ހަމުގެ ޕީއެޗް ލެވެލް ހިފަހައްޓާ ކަހަލަ ތަންކޮޅެއް ބާރުގަދަ ނޫން ތަކެއްޗެވެ.
މޫނު ދޮންނަން އެންމެ ރަނގަޅީ ހެނދުނު އެއް ފަހަރު ރޭގަނޑު ނިދަން އޮށޯންނަމުން އެއް ފަހަރު އެވެ. ނަމަވެސް ގަދައަށް ދާ ހިއްލާ ކަސްރަތެއް ކަހަލަ ހަރަކާތެއް ކޮށްފި ނަމަ މޫނު ދޮވުން މުހިންމެވެ. މާގިނައިން ދޮންނަ ކަމުގައި ވާ ނަމަ ހަންގަނޑު ހިކުމުގެ ފުރުސަތު އޮވެ އެވެ. ފިޒީޝަން އެއް އަދި ޑަމަޓޮލޮޖިސްޓެއް ކަމަށްވާ ޖެރޯމް ގާޑަން ލަފާ ދެއްވާފައި އޮންނަ ގޮތުގައި މޭކަޕް ފިލުވަން ނުވަތަ ކަސްރަތަކަށް ފަހު ދާ ހިއްލައިގެން ދޮންނަ ދޮވުން ފިޔަވައި ދެން އެންމެ ރަނގަޅީ ކުރިން ބުނިހެން ދެފަހަރު މޫނު ދޮވުމެވެ.
ގިނަވަގުތު ހަންގަނޑު އުނގުޅުމަކީ ބޮޑަށް ސާފުވާނެ ކަމެއް ނޫނެވެ. ދޮންނަ ހޭދަކުރަންވީ 20 ނުވަތަ 30 ސިކުންތެވެ. އެއަށްވުރެ ގިނައިރުވާ ނަމަ ހަންގަނޑަށް ވާ ފައިދާއަށް ވުރެ ލިބޭ ގެއްލުން ބޮޑެވެ. އޭގެ ސަބަބުން ހަންގަނޑު ތުނިވެ ހިރުވާގޮތް ވެ އެވެ. ޑރ. ގާޑަންގެ ލަފަ އަކީ ތާފަނާ ފެނުން މޫނު ތެންމައިލުމަށް ފަހު އަތުގެ އިނގިލިތަކުގެ ކުރި ބޭނުންކޮށްގެން، ދަތްދޮޅި އާއި ދެ ކޯތާފަތުގެ ކައިރި ވެސް ހިމެނޭނެހެން އުނގުޅައި ފެނުން ދޮވެލުމަށް ފަހު ސާފު ތުވާއްޔަކުން މަޑުމަޑުން އޮއްބައި ހިއްކުމެވެ.
ގިނަ މޭކަޕްގެ ބާވަތްތަކަކީ ސްމަގް ޕްރޫފް ނުވަތަ ވޯޓަ ޕްރޫފް ބާވަތްތަކެވެ. މިހެންވެ މިހުންނަ އާދައިގެ އެއްޗަކުން މިމޭކަޕްތައް ފިލުވުން ވާނީ ބޮޑު މަސައްކަތަކަށެވެ. އެހެންވެ، މޭކަޕް ފިލުވަން ބޭނުން ކުރަންވާނީ އެކަމަށް ހާއްސަކޮށް އުފައްދާފައި ހުންނަ ތަކެއްޗެވެ.
ހަމައެކަނި މޭކަޕް ވައިޕަކުން ސާފުކޮށްލުމަށް ފަހު ދޫކޮށްނުލާށެވެ. އެއަށް ފަހު ވެސް މޫނު ދޮވެލަން ވާނެ އެވެ.
ތަކުރާރުކޮށް އެކައްޗަކުން މޫނު ފޮހޭ ނަމަ ބެކްޓީރިއާ ފެތުރޭނެ އެވެ. އޭގެ ބަދަލުގައި މޫނު ފޮހެން ތުވާލިކޮޅުތަކެއް އެކަމަށް ހާއްސަކޮށް ހޯދާފައި ބަހައްޓާށެވެ.
ފެންވަރާ ނިމިގެން ހިއްކާ ތުވާލިން މޫނު ފޮހެންދޯ އެވެ. ފެންވެރުމަށް ފަހު މުޅި ހަށިގަނޑު ސާފުވެފައި ހުއްޓަސް އެތަންމިތަނުގައި ހުންނަ ބެކްޓީރިއާ މޫނަށް ފެތުރެން އެކަކު ވެސް ބޭނުމެއް ނުވާނެ އެވެ. އެހެންވެ ރަނގަޅީ މޫނަށް ވަކިން ތުވާލިކޮޅުތަކެއް ގެންގުޅުމެވެ.
މާސްކެއް ބޭނުންކޮށްފައި މޫނު އެ ދޮންނަ ދޮވުމަށް ފަހު އަލުން ދޮންނާކަށް ނުޖެހޭނެ އެވެ. ގިނަ މާސްކްތައް ބޭނުންކުރުމުގެ ކުރިން މޫނު ދޮވެލަން އިރުޝާދު ދީފައި ހުންނަނީ ވެސް މޫނު ސާފުކޮށް ހުރެމެ މާސްކްގެ އަސަރު އެންމެ ފުރިހަމައަށް ކުރާނެ ގޮތަށެވެ. ފެންފަދަ އެއްޗެއް ނުލައި އަތުގެ އިނގިލިތަކުން ފިލުވާލެވޭ ނަމަ ރަނގަޅީ ވެސް އެގޮތަށް މާސްކް ފިލުވާލުމަށް ފަހު ނުދޮވެ ދޫކޮށްލުމެވެ.